Aburaham Muntu wa Ritiy
Aburaham wiminy pol pa chisu cha zoong uchuku. Patadilay mwiur mutokina nich atutumbu, utongijokidin piur pa kushilamu kwa Nzamb anch anend akez kwikal avud mudi atutumbu inay. (Disambishil 15:5) Kudi Aburaham, atutumb yidi yom yimekena yikata kumuvurish kushilamu kwa Yehova. Yidi yom yimwinkishin kand kashinsh. Kupwa, anch Yehova wading ni usu wa kutang diur dipandikena kujimb ni yom yawonsu yidiamu, ov, kakutwishap kand kusal anch Aburaham nenday Sara avala mwan? Mwawiy mutapu wadinga ritiy ra Aburaham.
OV, RITIY CHOM IK? Mudi mulejenau mu Bibil, “ritiy” rikat kumekesh chitiyij chikash mu chom chakad kumekan. Chitiyij mudi chinech chimedina pa kashinsh kakash. Muntu utekina ritiy mudi Nzamb udi muntu ukata kushinshikin pa kuwanyin kwa kushilamu kwa Yehova, nich kashinsh anch yikez kuwanyin.
MUTAPU IK WAMEKESHAY ABURAHAM RITIY? Aburaham wamekesha anch ndiy witiyija mu kushilamu kwa Nzamb. Ku ritiy, Aburaham wadiokala kwi ngand kwavadikinay, nich ruchingej anch Yehova ukez kuwanyish kushilamu Kwend kwa kumulej ngand yikwau. Ku ritiy, Aburaham watongina piur pa Kanan, nich kashinsh anch anend akez kutambul ngand. Ku ritiy, Aburaham wapakisha nich kuziyil kumupan Isak mudi cha kulambul, nich ruchingej anch Yehova ukez kumusangul Isak.—Hebereu 11:8, 9, 17-19.
Aburaham watongina pa machuku ma kurutu pa ndond pa kutongin pa yom ya pasak. Ap anch Aburaham nenday Sara ading nich mwikadil uwamp wa mwom mu Ur kupandakanamu wa mu Kanan, ‘awiy katonginap kand piur pa ngand yashau.’ (Hebereu 11:15) Pakwez, awiy ashinshikina piur pa mutapu ukezay Nzamb kuyiyukish awiy ni anau mu machuku ma kurutu.—Hebereu 11:16.
Ov, ritiy ra Aburaham rading rakin? Mwaning. Yehova wawanyisha kushilamu kwend kwawonsu. An a Aburaham avulijana ni ikala muchid watazukau anch Isarel. Kupwa, in Isarel eza kushakam mu Kanan, ngand yashilayimu Yehova kudiay Aburaham.—Joshua 11:23.
CHOM IK TWILEJINA PA MULONG WINOU? Tukutwish kwikal nich kashinsh anch Yehova ukez kuwanyish kushilamu kwend. Ap anch kushilamu kumwing kumeken anch kukutwishap kuwanyin kwambatan nich chitongijok cha antu, tuchingejin anch “anch chakasikanap nchik Nzamb ukutwish kusal.”—Mateu 19:26.
Chilakej cha Aburaham chitulejin kand anch tufanyidinap kuchingejin ching kusu pa yom yashikena pasak, pakwez pa yikeza kushiken mu machuku ma kurutu. Chawiy chilejay kusal muntu umwing watazukau anch Jason. Jason wading ni mayej ma kuburen manangu masala anch ikala wakad kwendang ap kusal chom chawonsu. Jason ulejen anch: “Nifanyidin kwitiy anch kudi yisu nikata kutongin amwinam pa yom ya pasak.” Ulejen kand anch: “Pakach pa yom yikemp nakanganya kusal, pading yom mudi kumubwikat mukajam, Amanda.”
Pakwez, Jason wading ni ritiy rikash anch Yehova ukez kuwanyish yakushilamu yend kuwejaku ku kushilamu kwa kwel anch piswimp ap divu dietu dikez kwikal paradis ni antu ashinshamena akez kwikal ni mwom wa chikupu ni ukash wa mujimbu uwanyidina.a (Kuseng 37:10, 11, 29; Isay 35:5, 6; Kujingunik 21:3, 4) Jason ulejen anch: “Nikat kwivurish yisu yiwamp yikeza kwikalaku mu machuku ma kurutu,” urumburil kand anch: “Piswimp ap mar minam makupwa—yikokujol, wom, ushon, ni kwifish nich—yikez kupwa chikupu.” Chidi chilakej chiwamp mud ik cha ritiy chidia mudi cha Aburaham!
[Dizu didia Kwishin kwa paj]
a Anch usotin kwilej yom yivud piur pa paradis pa divu mu machuku ma kurutu, tal shapitre wa 3, 7, ni wa 8 wa buku Chom ik Chakin Kamu chifundishinay Bibil? wapalangeshau kudi Atuman a Yehova.