Harmagedon Chom Ik Chilondinau Antu Akwau?

“Chad ayilembil ayikumangeja ant awonsu kwi ndond yipidilau mu win Hebereu anch, Harmagedon.”—KUJINGUNIK 16:16.

OV, chom ik utongina piukata kutesh dizu “Harmagedon”? Ukutwish pamwing ap kutongin piur pa kusheshik kumwing kujim nakash. Ap anch dizu dined dimeken ching kusu kapamp kamwing mu Bibil, dizu dined akat kudichirikinang yisu yivud mu jinsangu ni kudi amakurump a ma relijon.

Ov, chitonginau antu avud piur pa Harmagedon chawiy chifundishinay Bibil? Chakul chidi cha usey. Mulong wak? Mulong uyakin piur pa Harmagedon ukutwish kukudiosh mu uswik wa wom wa chamwamu, kutokish chitongijok chey piur pa machuku ma kurutu, ni ukwikal nich usu pa mutapu utongina piur pa Nzamb.

Shinshikin piur pa yipul yisatu yilondwilaku, ni ilikej yitonginau antu avud piur pa Harmagedon nich yifundishinay chakin kamu Bibil.

1. OV, HARMAGEDON MADI MAR MAKEZAU KULET KUDI ANTU?

In kupan jinsangu ni in kukimbijol asadidil dizu “Harmagedon” yisu yivud mulong wa kwisambin piur pa mar maletinau kudi antu. Chilakej, Njit ja Mangand ja I ni ja II ajitazuka anch Harmagedon. Kupwa kwa jinjit jinej, antu asambisha kwov wom anch États-Unis ni Union Soviétique akutwish kubulijan umwing ni mukwau mabomb atomik. Ku ma radio ni ku ma televizion isambidina piur pa kupwitijan kwinoku anch “Harmagedon termonikleyer.” Nlel unou, in kukimbijol akwet wom anch kuyipish kwa chipepil kukez kusal anch kwikala kukarumuk kukash kwa mashakamin ma divu kukeza kusal anch “Harmagedon wa murungul” ikala piswimp.

Chisotinau kulejan: Antu akwet usu wa kutakel yikeza kushiken mu machuku ma kurutu, ni pa mwom udia pa divu. Anch winyikel wakangany kusal yom nich manangu, divu dikez kuyip.

Chifundishinay Bibil: Nzamb kakezap kuyilikidil antu chakwel ashesha divu bwat. Bibil utukasikeshin anch Yehovaa katangap divu mulong wa “kwikal ndond yamwamu.” Pakwez, ndiy waditanga “chakwel antu ashakamamu.” (Isay 45:18) Pa ndond pa kuyilikidil antu adandamena kushesh divu, Nzamb ukez “kuyishesh awonsu akata kushesh mangand.”—Kujingunik 11:18.

2. OV, HARMAGEDON MADI MAR MA CHITANGIL?

Yisu yimwing in kupan jinsangu akat kusadilang dizu “Harmagedon” mulong wa kwisambin piur pa mar makash ma chitangil. Chilakej, mu muvu wa 2010, rapor umwing walejana piur pa “‘Harmagedon’ mu Haïti.” Rapor winou walejana mar, kusheshik, ni kufa kwa antu kudiokila ku kunyikek kukash kwa divu kwashesha ngand yiney. In kupan jinsangu ni in kukwat mafilim kasadidinap dizu dined piur pa yinship kusu yashikena kal pakwez kand pa yinship yakaminau anch yikez kushiken. Chilakej, awiy asadila dizu “Harmagedon” mulong wa kulejan usu wa kushesh wa chitonginau piur pa kuwa kwa diyal dijim nakash dia mwiur ditazukinau anch astéroïde.

Chisotinau kulejan: Atongin anch Harmagedon chidi chinship chikata kushiken pakad kuchingejin ni kuyijip antu akad mulong. Chiswapelap kwiking anch washiken.

Chifundishinay Bibil: Harmagedon chidiap chinship chikata kushiken pakad kuchingejin mulong wa kuyishesh antu awonsu. Pakwez, pakeza kushiken Harmagedon, ching kusu antu ayimp awiy akeza kusheshik. Bibil ukat kushilamu anch piswimp ap “antu ayimp kakwikalikup kand. Inge, ukez katalijol mwi ndond yau, kwamwamu kand.”—Kuseng 37:10.

3. OV, NZAMB UKEZ KUSHESH DIVU KU HARMAGEDON?

Antu avud adia mu marelijon akat kwitiyij anch kukez kukwikal kubulijan kwa nsudiel pakach pa uwamp ni uyimp ukeza kushiken ku disudiel dia divu dietu. Kukimbijol kwasalau mu États-Unis kudi Princeton Survey Research Associates kwamekesha anch amakurump 40 pa chitot ipulau, awiy itiyija anch mangand makez kushik kwinsudiel mwi “njit ja Harmagedon.”

Chisotinau kulejan: Antu kakutwishap kushakam pa divu chikupu, ni divu kaditangap chakwel dikalaku chikupu. Nzamb wayitanga antu nich chitongijok chakwel anch afa awonsu chilik chimwing.

Chifundishinay Bibil: Bibil ulejen patok anch Nzamb “wasa rubumbu ra divu chakwel kidikushemunikip chikupu ni chikupu.” (Kuseng 104:5) Piur pa antu adia pa divu, Bibil ulejen anch: “Mwin kutentam ukez kaswan ngand, ukez kashakamamu chikupu.”—Kuseng 37:29.

Chimeken patok anch, Bibil ulejen yom yishalijadina ni malejan mavud ma antu piur pa Harmagedon. Chad, wisu uyakin?

[Dizu didia Kwishin kwa paj]