Antakel a Chipolitik Alejen Anch Harmagedon Ukushik Piswimp ap—Bibil Ulondinap ik?

Diakajikamu pamanch, machuku ma ngond 10 Ngond wa 10, 2022, mulong wa kufundakesh, Risi wadjubwil mabomb mu misumb yimwing ya Ikren machuku maad kupwa kwa kuyisheshin chilal chijim nakash chisankeshina Crimée ni Risi. Yom yiney yasadikin machuku makemp kupwa kwa antakel a chipolitik kulejan anch Harmagedon ukutwish kushik piswimp ap.

• “Kandikal tusejangap piswimp ni Harmagedon mwamu kudiosh kamu pa chirung cha [Ntakel wa États-Unis John F.] Kennedy ni pakunau ma misil mu Kiba. . . . Nitongidinap anch tukutwish kusadin mabomb nikleyer pakad kuletish Harmagedon.”—Kukwatijan ni Ntakel wa États-Unis Joe Biden, 6 Ngond wa 10, 2022.

• “Nikwet kashinsh anch tukutwish kushik ku Harmagedon, ni divu diawonsu did mu ubaj.”—Mazu ma Ntakel wa Ikren Volodymyr Zelensky, pamwipwilau piur pa yibudikin yikutwisha kwikalaku anch asadin mabomb nikleyer, BBC News, 8 Ngond wa 10, 2022.

Anch mud asadin mabomb nikleyer, ov, yikutwish kuletish Harmagedon? Bibil ulondinap ik?

Ov, mabomb nikleyer makuletish Harmagedon?

Bwat. Dizu “Harmagedon” adisambidin kusu kapamp kamwing mu Bibil mu Kujingunik 16:16. Disambidinap njit ja an a antu, pakwez disambidin njit pakach pa Nzamb ni “ant a mangand mawonsu.” (Kujingunik 16:14) Nzamb ukusadin njit ja Harmagedon mulong wa kujiyish winyikel wa an a antu.—Daniel 2:44.

Mulong wa kwijik yom yivud piur pa yibudikin ya Harmagedon pa divu, tang mutu wa mulong Njit ja Harmagedon Chom ik?

Ov, njit ja mabomb nikleyer jikutwish kushesh divu ni kuyinongish antu?

Bwat. Ap anch mu machuku ma kurutu antakel a mangand asadin mabomb nikleyer, Nzamb kakwitiyap anch divu adishesh. Bibil ulondin anch:

• “Mangand mashiching chikupu.”​—Mulej 1:4.

• “Mwin kutentam mwawonsu ukez kaswan ngand, ukez kashakamamu chikupu.”​—Kuseng 37:29.

Pakwez, uprofet wa Bibil ni yom yisadikina nlel yimekeshin anch chisu cha pakampwil nakash chikuswimpa yom pa divu chasej kal piswimp. (Mateu 24:3-7; 2 Timote 3:1-5) Jingunin yom yilondinay Bibil piur pa machuku ma kurutu kusutin kwilej Bibil ni muntu mukwau pakad kufut.