Ikalany Piswimp ni Nzamb
‘Muchim Wey Ukat Kwizul Sens Nich Runeng’
KWITUDISH kuding kuwamp nakash. Tusotining kwikal arund ni antu akweta muchim wa kwitudish. Cha ushon, mulong chikasiken kutan antu itudishina chakin kamu nlel unou mu mangand—nakash pakach pa antu akata kuyikel akwau. Ov, chidi nchik piur pa Yehova, mwin dikand diawonsu mu mangand mawonsu? Ov, ndiy witudishin? Shinshikinany amboku mazu ma muprofet Jeremiy madia mu Madil ma Jeremiy 3:20, 21.—Tang.
Jeremiy wafunda Madil ma Jeremiy pa chisu chimwing chikash cha rusangu ra Isarel. Ndiy wapana uman wa chom chamunenganesha nakash—kusheshik kwa Yerusalem wend mukatish kudi in Babilon. Muprofet wadinga wovila ushon wading wija anch mar minam madinga dirumburish dia Nzamb piur pa in Isarel mulong wa yitil yau. Ov, Jeremiy washala pakad ruchingej? Ov, ndiy wamana anch Yehova wading kulemp chakwel amana antu akarumukina ni ayinkisha ruchingej? Tesh mutapu mulondinay Jeremiy mudi ulondina pa ndond pa antwend.
Ap anch antu avud ova ushon, Jeremiy wading ni ruchingej. Ndiy wadila kudi Yehova anch: “Pinikata kuyivurik yom yiney, muchim wama ukat kwizul sens nich runeng.” (Verse wa 20) Jeremiy kidjidjekap. Ndiy wading wija anch Yehova kakezap kumuvuramen ndiy—ap antu akarumuka pakach pa antwend. Ov, chom ik chelay kusal Nzamb wa dikand diawonsu?—Kujingunik 15:3.
Jeremiy wij anch Yehova ukez “kwizul sens nich runeng” piur pa antu akarumukina chakin kamu. Dikarumwin dikwau dilejen anch: ‘O vurik amboku, nzengamina.’ Mazu minam mamekeshin anch Yehova udi muntu muwamp. Yehova, “Udia Piur pansh pawonsu,” ukez kuzengam, chakwel alonda, ni kuyidiosh in kumwifukwil end mu mwikadil wau wa kwikal mwishin ni kuyichirishin dilau diend. (Kuseng 83:18) Mulong wa ruchingej rend, Jeremiy watana dikasikesh diakin ku muchim wend. Muprofet ushinshamena wachingela djat ni pa chisu chatekay Yehova mulong wa kuyikol antwend akarumukina.—Verse wa 21.
Mazu mafundau kudi Jeremiy matufundishin chakin kamu yom yaad piur pa Yehova. Chakusambish, ndiy udi mwin kwitudish. (Kuseng 18:35) Ap anch “ukwet ukash,” Yehova usotining kushirik kwikal pa ndond yetu chakwel atukwasha pitumena mar. (Job 37:23; Kuseng 113:5-7) Ov, chinech chitukasikeshinap? Cha kaad, Yehova ukwet riy; ndiy udi “witenchikin mu kulikishilan” pantaliken ni akayitil akarumukina ni kuyinkish dilau diend. (Kuseng 86:5) Mikadil yiney yaad—kwitudish ni riy—yikat kusal pamwing.
Tujikitishin mud ik anch Yehova kadiap mudi anyikel a chiuntu, akweta chibud chisadila anch ikala in kwitutul ni akad kutesh chiyul! Ov, usotin kwijik yom yivud piur pa Nzamb mwin kwitudish usotina ‘kuzengam’ chakwel ayinkisha in kumwifukwil end ruchingej padiau mu mar?
[Dizu didia Kwishin kwa paj]
a In kufund a pasak aswimpa verse winou ni kufund anch “muchim wam,” mudi wading ni kwisambin piur pa Jeremiy. Awiy itiyija chakin kamu anch chading kuburen kalimish kulond anch Nzamb udi mupim, dizu dia Bibil disadidinau mulong wa kujimbul yitangil yidia pa divu. Pakwez, yisu yivud Bibil ukat kumujimbulang Nzamb mu mazu ma ukauntu mulong wa kutukwash tutesha nawamp piur pend. Mulong dizu ‘mupim’ ap “muchim” dikutwish kurumburik ‘mwom tukweta,’ chawiy lel dizu “muchim wey” dirumburikin “ey.”
[Tablo wa jinsangu udia pa paj wa 32]
Yehova usotin kuzengam chakwel ikala piswimp netu, ni kutukwash pitudia mu mar