Mwawiy Ikala Ching Kusu Mwawiy

“Londany kusu anch: ‘Mwawiy, nikusal,’ ap ‘Bwat, kinikusalap.’”—MAT. 5:37.

TAL ANCH UKUTWISH KWAKUL:

Ov, chom ik chalonday Yesu piur pa kuchip machip?

Ov, mulong wak Yesu wading chilakej chiwamp mu kulond uyakin?

Ov, mu mikadil ik ya mwom mufanyidina kwikal Mwaning wetu Mwaning?

1. Ov, chom ik chalejanay Yesu piur pa kuchip machip, ni mulong wak?

YISU yivud, in Kristu akin kakatap kuchipang machip. Mulong akat kumuziyil Yesu, walonda anch: “Londany kusu anch: ‘Mwawiy,’ nikusal.” Ndiy wasota kulond anch muntu ufanyidin kusal kwambatan ni dizu diend. Kurutu kwa kulet chijil chinech Yesu walonda anch: “Kangal wez wachipany anch washilanyamu.” Ndiy walonda mwamu mulong wa kufish nich chaku chadingau nich antu cha kuchip machip yisu yawonsu mu mambamb mau ma dichuku ni dichuku pa chom ni chom, pakad kusal kwambatan ni yilondinau. Mu ‘kuwejaku’ ku Mwawiy ap ku Bwat mulong wa kulond yisotinau kusal, antu inay akutwish kumekan anch kakwetap chakin kamu ruchingej ni adi mwishin mwa usu wa “muyimp.”—Tang Mateu 5:33-37.

2. Rumburil mulong wak chiyimpinap kuchip machip.

² Ov, mazu ma Yesu marumburikin anch kuchip machip kwawonsu kuyipin? Chinech chikutwish kwikal mutapu ik? Mudi mutwilejina mu mutu wa mulong wasutina, Yehova Nzamb ni kashalapol wend ushinshamena Aburaham achipa machip pa yisu yimwing ya usey. Chikwau kand, Chijil cha Nzamb chita anch kwikala machip mulong wa kupwish kupwitijan. (Kub. 22:10, 11; Kuch. 5:21, 22) Chawiy lel, chitwishikin kudi mwin Kristu kuchip machip mulong wa kulejan uyakin papaninay uman ku dirumburish dia chijil. Ap yisu yimwing, mwin Kristu ukutwish kuman anch chidi cha usey kuchip machip mulong wa kuyilej antu akwau yitongijok yend ap kuyikwash chakwel apwisha mulong. Chakin kamu, Yesu pafanyidinay kuchip machip amwinend kusutil ku kwikal mwin kupesh mujim, kaburedinap kuchip pakwez wakula nich kashinsh kudi in Sanedrin in Yuda. (Mat. 26:63, 64) Pakwez, Yesu kadingap nich kuswir kwa kuchip machip kudi muntu ap umwing. Ap mwamu, mulong wa kukasikesh anch uruu wend wading wakin, ndiy walonda yisu yivud mu mutapu wa pakampwil anch: “Nakulejany chakin, [chirumburikin anch, “Chakin, chakin kamu”].” (Yoh. 1:51; 13:16, 20, 21, 38) Talany amboku chom chikwau tukutwisha kwilej kusutil ku chilakej cha Yesu, cha Paul, ni cha antu akwau ija anch Mwawiy, ufanyidin kwikal Mwawiy.

YESU—CHILAKEJ CHIWAMP NAKASH

3. Ov, chom ik chashilayimu Yesu kudi Nzamb mu malembil, ni mutapu ik witiyijay Tatukwend wa mwiur?

³ “Tal, am nez kal kusal rusot rey, A Nzamb.” (Heb. 10:7) Nich mazu minam ma usey, Yesu wipana amwinend kudi Nzamb chakwel awanyisha yom yawonsu yatakelau kulejan piur pa Mbut ya kushilamu, kuwejaku ni ‘kumuchany ku kapolantundu kend’ kudi Satan. (Dis. 3:15) Kwikil muntu mukwau wipana kal mwamu kwa kwisotil mulong wa kusend chisend chilimina mudi chinech. Mwiur, Yehova wamekesha ruchingej rend rawonsu mudi mwanend, pakad kumwit Yesu chakwel achipa machip anch dizu diend dikez kwikal diakin ap bwat.—Luka 3:21, 22.

4. Ov, mu chilik ik chasalay Yesu chakwel Mwawiy wend ikala Mwawiy?

⁴ Yesu wadandamena kusal yom yalejanay kusutil ku kusal anch Mwawiy wend ikala Mwawiy. Ndiy kalikidinap chom ap chimwing chakwel chimukangesha kusal mudimu wa kulejan rusangu ruwamp ra Want wa Nzamb wamwinkishau kudi Tatukwend ni kwikadish in kwilej awonsu aletinay Nzamb kudi Yesu. (Yoh. 6:44) Bibil ulejen kujimb kwa uyakin wa Yesu mu mazu minam mijikena nawamp anch: “Ndiy udi ‘Mwaning’ ku kushilamu kwawonsu kwa Nzamb.” (2 Kor. 1:20) Chikwau kand, Yesu udi chilakej chiwamp nakash cha muntu wamekesha uyakin wa yom yashilayimu kudi Tatukwend. Chikwau kand, shinshikinany pa muntu umwing wasala usu wend wawonsu chakwel amwimburija Yesu.

PAUL—MUNTU WASALA YALONDAY

5. Ov, chilakej ik chatushilay Paul?

⁵ “Ov, Nsalejam, chom ik chinfanyidina kusal?” (Mid. 22:10) Nich mazu minam ma kashinsh, Paul wadinga wijikena mudi Saul, witiya umutakel wa Mwant Yesu watumbishau, wamumekena mu chishimushimu mulong wa kumukangesh kudandamen kuyizengol in kwilej a Kristu. Chibudikin cha kusankanijan kwinoku chidi anch, Saul wakarumuka nich kwitudish mulong wa mwikadil wend wa pasak, watambula dibatish, ni witiyija chisend cha pakampwil chamwinkishau cha kupan uman piur pa Yesu ku michid. Kudiosh pinipa, Paul wadandamena kumutazuk Yesu mudi ‘Nsalejend,’ ni kusal yom kwambatan ni mazu mend djat ni kwinsudiel kwa mwom wend pa divu. (Mid. 22:6-16; 2 Kor. 4:5; 2 Tim. 4:8) Paul kadingap mudi antu akwau alejau kudi Yesu anch: “Ov, mulong wak ukata kwintazukany anch: ‘Nsalejetu, Nsalejetu,’ chad en kiukusalanganyap yom yinikulejinanya?” (Luka 6:46) Mwaning, Yesu wachingejina anch antu awonsu akeza kumwitiyij mudi Mwant asala chakin kamu kwambatan nich mazu mau, mudi mwasalay kambuy Paul.

6, 7. (a) Ov, mulong wak Paul waswimpa mupak wend wa kuyendil in Korint, ni mulong wak in kumulondin nayimp kayingap mu kutadik ukashinsh wend? (b) Ov, mutapu ik tufanyidina kuyiman antu atondau mulong wa kututakel?

⁶ Paul wapalangesha nich mushiku rusangu ra Want mu Aziy Mukemp ni mwi Mputu, mulong wa kutenchik ni kwendil yikumangen yivud. Yisu yimwing, ndiy wamana anch chading cha usey kuchip machip piur pa uyakin wa yom yafunday. (Gal. 1:20) Pamufundau Paul kudi in Korint amwing anch kalejenap uyakin, ndiy wafunda anch: “Mudi mudiay Nzamb mwin yakin, dizu dietu kudi en kidiadingap anch: ‘Mwaning,’ ap anch: ‘Bwat,’ kapamp kamwing.” (2 Kor. 1:18) Pafunday yom yiney, Paul wabudika ku Efes ni waya ku Makedonia kupwa waya ku Korint. Chakusambish, wakwata mupak wa kwendil kand ku Korint kurutu kwa kuya ku Makedonia. (2 Kor. 1:15, 16) Pakwez, mudi musadinau atulam a munyingumuku nlel unou, yisu yimwing, afanyidin kuswimp jinjil jikatau kulondul. Kuswimp kwinoku kakatap kukusal mulong wa mayingish makad usey, ap ma choy bwat pakwez asadining mwamu mulong wa kuswapej kumwing. Ku mutambu wa Paul, ndiy walaba pa kukwat mupak wa kuya ku Korint mulong wa uwamp wa chikumangen. Ov, mutapu ik?

⁷ Chisu chimwing kupwa kwa kukwat mupak wend wa kusambish, Paul watambula rusangu riyimp piur pa matend ni masandj madinga mu Korint. (1 Kor. 1:11; 5:1) Mulong wa kurijek mwikadil winou, ndiy wafunda chiyul chikash mu mukand wend wa kusambish kudi in Korint. Pa ndond pa kuya kapamp kamwing ni waat kudiosh ku Efes kushik ku Korint, Paul wakwata mupak wa kuyinkish akadivar nend chisu cha kusadil chiyul chend chakwel pa chisu chikezay kushik kwinikwa, kuyendil kwend kukez kuyikasikesh nakash. Mulong wa kuyilej uyakin wa diyingishil diasala anch aswimpa mipak yend, Paul wafunda mukand wend wa kaad anch: “Nikat kumutazuk Nzamb mudi kaman wam anch, am nalikin kwez kudi en ku Korint mulong kinasotap milong.” (2 Kor. 1:23, TMK) Kangal twikalany mudi antu adinga alondin yom yiyimp piur pa Paul; pakwez, yilimishany nakash antu atondau mulong wa kututakel. Uyakin udi anch chiwapin kwimburij chilakej chakin cha Paul, mudi kamu mwa mwimburijay Kristu.—1 Kor. 11:1; Heb. 13:7.

YILAKEJ YIKWAU YIWAMP NAKASH

8. Ov, chilakej ik chatushilay Rebeka?

⁸ “Mwaning, am nikatil kwam.” (Dis. 24:58) Mu mazu minam maswapela kutesh, Rebeka wamwakula makwend ni mwanamakwend ni kulimish rusot rau ra kubudik ku chikumbu pa dichuku dinidia ni ku kas weny ni kuya ni ngendj ku a kilometre 800 chakwel ikala mukajend a Isak mwanend a Aburaham. (Dis. 24:50-58) Mwaning wa Rebeka wading chakin kamu Mwaning, ni ndiy wamekesha kudi Isak anch ndiy wading mband umwovila Nzamb wom. Mu mwom wend wawonsu, ndiy washakama mu antent mudi mweny mwin Ngand ya Kushilamu. Ndiy watambula difut mulong wa kushinshaman kwend mu kwikal ngak wa Mbut yashilaumu, Yesu Kristu.—Heb. 11:9, 13.

9. Ov, mutapu ik wasalay Rut chakin kamu kwambatan ni yalonday?

⁹ “Bwat mwan, tuyil kamu ney kudiau ayey.” (Rut 1:10) Adia-afu in Mowab, Rut nenday Oripa adandamena kumulej mwamu mawenau mufir, Nawom, wading udiokil kwin ngand ya Mowab ni kuchirik ku Betlehem. Kupwa, pateshay dizu dia Nawom, Oripa wachirika mwingand yend. Pakwez Bwat wa Rut wadinga chakin kamu Bwat. (Tang Rut 1:16, 17.) Ndiy winunga mu mutapu ushinshamena kudi Nawom, walika chikupu dijuku diend, ni relijon wa makasu wa in Mowab. Ndiy wajijamana mudi mwin kumwifukwil ushinshamena wa Yehova ni watambula difut dia kwikal umwing pakach pa amband atan ajimbulay Mateu mu dijuku dia Kristu.—Mat. 1:1, 3, 5, 6, 16.

10. Ov, mulong wak Isay wadinga chilakej chiwamp?

¹⁰ “Yam unou, ntuma.” (Isay 6:8) Kurutu kwa kulond mwamu, Isay wamana chishimushimu chimwing chamushena cha Yehova ushicha pa nkwas Yend piur pa chikumbu cha Nzamb cha mu Isarel. Pashinshikinay pa uyaj winou wamany, Isay wamutesha Yehova ulondin anch: “Ov, nany nikutumap? Ov, nany ukwikala muruu wetu?” Dined diading diladikij dia kwikal muruu wa Yehova mulong wa kulejan uruu wa Nzamb kudi antwend abwambwila. Isay wasala chakin kamu kwambatan ni dizu diend—Mwaning wend wadinga chakin kamu Mwaning. Pasuta mivu 46, ndiy wasala mu mutapu ushinshamena mudi muprofet, wapana uruu ukash wa kulejan patok yakushilamu yamushena piur pa kutenchik kwa difukwil diakin.

11. (a) Ov, mulong wak kusal kwambatan ni dizu dietu kudi kwa usey kamu? (b) Ov, yilakej ik yibabeshina yitwinkishinau kudi antu aburena uyakin?

¹¹ Ov, mulong wak Yehova wasala anch afunda yilakej yiney yidia kwiur oku mulong wetwetu mu Dizu diend? Ni mulong wak chidi cha usey kusal anch Mwaning wetu ikala chakin kamu Mwaning? Bibil ulejen patok anch ang muntu “kakat kuwanyishap kushilamu kwend” udi pakach pa antu “afanyidin kufa.” (Rom 1:31, 32) Farao wa Idjibit, Sedikias Mwant mwin Yuda, ni Ananias nenday Safira adi pakach pa yilakej yiyimp yilejenau mu Bibil ya antu akad kulond chakin kamu anch Mwaning. Awonsu amana yibudikin yiyimp ni adi yilakej yibabeshina kudi etu.—Kub. 9:27, 28, 34, 35; Ezek. 17:13-15, 19, 20; Mid. 5:1-10.

12. Ov, chom ik chikeza kutukwash chakwel tusala kwambatan ni dizu dietu?

¹² Pitudia mu “machuku ma kwisudiel,” tudi pakach pa antu “akad kulimish yom yitumbila,” antu “[afanikena] yitongijok mudi in kwitiyij, pakwez [alikin] ukash wa ritiy rakin.” (2 Tim. 3:1-5) Tufanyidin kusal usu wetu wawonsu chakwel twipuka urund winou uyimp. Pakwez, tufanyidin kukumangan pakad kujing pamwing ni antu amekeshina anch Mwaning wau udi chakin kamu Mwaning.—Heb. 10:24, 25.

MWANING WEY WA USEY NAKASH

13. Ov, Mwaning ik wa usey nakash ukatau kulond kudi in kumulondul Yesu Kristu?

¹³ Cha kushilamu chimwing cha usey nakash chikutwishay muntu kutongijokin chidi kwipan kwend kudi Nzamb. Pa yisu yiney yisatu ya pakampwil, antu asotina kwipan ayinau mudi in kwilej a Yesu akwet chisu cha kulond anch Mwaning mulong wa kushinshikin piur pa yitongijok yau. (Mat. 16:24) Pakatau amakurump aad kwambamb ni muntu usotina kwikal mwin kulejan wakad kutambul dibatish, akat kumwipulang muntu winou anch, “Ov, usotil chakin kamu kwikal umwing wa Atuman a Yehova?” Kupwa, anch muntu wayil kal kurutu mu spiritu ni usotil kutambul dibatish, amakurump akez kushakam nend ni kumwipul kand anch, “Ov, wipanin kal kudi Yehova kusutil mu malembil?” Kupwa, pa dichuku dia dibatish, muntu ni muntu pakach pa antu afanyidina kutambul dibatish akat kumwipul anch, “Pa dishin dia yakupesh ya Yesu Kristu, ov, wakarumukinany kal kudiokal ku yitil yen ni kwipan ayinen kudi Yehova mulong wa kusal rusot rend?” Chawiy lel, kurutu kwa atuman, antu inay asu akat kulond anch Mwaning akulimish kushilamu kwau kwa kumusadil Nzamb chikupu.

14. Ov, kwishinshikin ik tufanyidina kusal chisu ni chisu?

¹⁴ Ap anch udi muntu musu watambwila katat dibatish ap wamusadina kal Nzamb pasutin kal dikum dia mivu, ufanyidin kwishinshikin amwiney chisu ni chisu ni kwiyipul yipul mudi yiney anch: ‘Mu kumwimburij Yesu Kristu, ov, nidandamedin kusal chakin kamu kwambatan nich Mwaning wam wa usey nakash? Ov, nidandamedin kumuziyil Yesu ni kusal anch kulejan ni mudimu wa kuyikadish in kwilej wikala rutong nitekina pa ndond ya kusambish mu mwom wam?’—Tang 2 Korint 13:5.

15. Ov, mu milad ik ya mwom chidia cha usey kusal anch Mwaning ikala chakin kamu Mwaning?

¹⁵ Kushakam kwambatan ni kwipan kwetu kurumburikin kand kushinshaman pa milong yikwau ya usey. Chilakej: Ov, udi ngatan? Dandamen kulimish machip ma usey wachipa chakwel kumukat ni kumusanger mbay ney wa uruu. Ov, wizwishin kal fomu chakwel uwanyisha yisend ya uteokras? Chawiy lel, sal yom kwambatan ni yom wafundina ni kushilamu kwey. Ov, witiyija diladikij dimwing dia kuya kudia kwenday kazwendj? Chad kangal walik kuya mulong akutazuk kal kudi muntu windjing. Ov, wamukana muntu kanang wasankena mu mudimu wa kulejan ku chis ni chis anch ukuchirik kakwau chakwel kumukwash kand muspiritu? Chawiy lel mu mitapu yawonsu sal anch Mwaning wey ikal kamu Mwaning, ni Yehova ukez kuyukish mudimu wey wa kulejan.—Tang Luka 16:10.

YIYUKISH YIDIOKILA KUDI MWIN KUPESH MUJIM NI MWANT WETU

16. Anch twakangany kusal mudi mutwalonda, ov chom ik tufanyidina kusal?

¹⁶ Bibil ulejen anch pitudia antu akad kuwanyin, “etu awonsu tukat kurumbok mu mitapu yivud,” pakampwil mu kusadil rudim retu. (Jak. 3:2) Ov, chom ik tufanyidina kusal anch twaman anch twakangeny kusal kulondulijan ni yitwalodina? Mu Chijil cha Nzamb chayinkishau in Isarel, kwading mupak wa riy pantaliken ni muntu “wachipa nich kan kend mulong wa kusal kuyip.” (Lev. 5:4-7, 11) Kwading kand mupak wa rukat pantaliken ni in Kristu asala chitil chinech. Anch twit dilikishin mulong wa chitil kanang pantaliken ni Yehova, ndiy ukez kutulikishin nich riy kusutil ku mudimu wa Mwin kupesh wetu Mujim, Yesu Kristu. (1 Yoh. 2:1, 2) Pakwez, mulong wa kudandamen kushakam mu kwitiyik kudi Nzamb, tufanyidin kumekesh mabuj mamekeshina kukarumuk kwakin mu kwipuk kusal yitil mudi yiney ni mu kusal usu wetu wawonsu chakwel twita dilikishin mulong wa uyimp wawonsu twasala kusutil ku kulond kuyimp. (Jinsw. 6:2, 3) Chakin kamu, chiwapidil kutongijokin nakash kurutu kwa kushilamu piur pa yom yitwakad kutwish kuwanyish.—Tang Mulej 5:2.

17, 18. Ov, machuku ik mawamp mayichingedina antu awonsu ikasikeshina kusal anch Mwaning wau ikala chakin kamu Mwaning?

¹⁷ Machuku ma kurutu mawamp mud ik mayichingedina in kumwifukwil Yehova awonsu asadila usu wa kusal anch Mwaning wau ikala chakin kamu Mwaning! Kudi antu azizidilau many 144 000, chikez kurumburik kudi awiy kwikal nich mwom wakad kufang mwiur, mukezau kushakam ni Yesu mu Want wend ni “akez kuyikel pamwing nend Kristu mu mivu kanan.” (Kuj. 20:6) Mulong wa mamiliyon makwau ma antu akad kuchind, chikez kurumburik kutambul yiyukish yidiokila ku umutakel wa Want wa Kristu mu paradis pa divu. Ni akez kuyikwash chakwel akula ku mujimbu ni mu manangu mawanyidina.—Kuj. 21:3-5.

¹⁸ Kusutil ku kumekesh kushinshaman mu choziu cha nsudiel kwinsudiel kwa Mivu Kanan ya Kuyikel kwa Yesu, tukezap kand kwikal ni diyingish dia kwidjidjek pa yom yilondinay muntu mwawonsu. (Kuj. 20:7-10) Mwaning mwawonsu ukez kwikal kamu Mwaning, ni Bwat kamu Bwat. Antu awonsu akez kumwimburij mu mutapu uwanyidina Tatukwetu wa mwiur ukweta rukat, Yehova, “Nzamb wa uyakin.”—Kus. 31:5.

[Chipich chidia pa paj wa 

Kudiosh pamubatishau djat ni ku rufu, Yesu wamekesha kwikal wakin ku yom yashilayimu kudiay Tatukwend

[Chipich chidia pa paj wa 31]

Ov, uding mwin kashinsh piulondila anch Mwaning?