Muziyilany Nzamb ni Tanany Yiyukish mu Kushilamu Kwend Kwachipay
“Mulong [Nzamb] kakwetingap mukwau upandiken wa kuchipil, ndiy wachipa kudi amwinend.”—HEB. 6:13.
TAL ANCH UKUTWISH KWAKUL:
Ov, mulong wak tukutwish kwikal nich kashinsh anch jintong ja Nzamb jikez kusadik chakin kamu?
Ov, kushilamu kwisu kwasalay Nzamb kupwa kwa Adam nenday Ev kusal chitil?
Mutapu ik tukutwisha kutaninamu mu machip ma kushilamu kwa Nzamb kudi Aburaham?
1. Ov, mutapu ik dizu dia Yehova dishalijadin ni dia antu akayitil?
YEHOVA udi “Nzamb wa uyakin.” (Kus. 31:5) Chitwishikinap kuyichingejin yisu yawonsu antu akayitil, pakwez “Nzamb kakutwishap kudimban.” (Heb. 6:18; tang Kuchind Michid 23:19.) Yom yitonginay mulong wa yiyukish ya antu yiding kwau yakin. Chilakej, chawonsu chalonday Nzamb anch ukez kuchisal kudiosh kwinsambishin kwa kutang kwend “mwamu muchadinga.” Chawiy lel, kwinsudiel kwa dichuku dia kutang, “Nzamb wamana yom yawonsu yatangay, ni kuyital yading yiwamp kamu.”—Dis. 1:6, 7, 30, 31.
2. Ov, dichuku dia kwiswedish dia Nzamb chom ik, ni mulong wak “waditumbisha kand”?
2 Pamanay midimu yend ya kutang, Yehova Nzamb walejana disambishil dia dichuku dia sambwad—diadingap dichuku dia asaa 24 bwat, pakwez chisu chilemp cha kwiswedish kwend kupwa kwa midimu yend ya kutang pa divu. (Dis. 2:2) Dichuku dia kwiswedish dia Nzamb kandikal dipwa. (Heb. 4:9, 10) Bibil kalejenap chakin kamu pa chisu chasambisha dichuku dined. Chikutwish kwikal pamwing ap chisu chikemp kupwa kwa kumutang Ev, mukajend a Adam, pasutin kal piswimp mivu 6 000. Kurutu kwetu kudi Winyikel wa Mivu Kanan wa Yesu Kristu, mukezay kumekesh kuwanyin kwa rutong ra Nzamb ra kutang divud chakwel dikala paradis wa chikupu wizwila antu atentamina. (Dis. 1:27, 28; Kuj. 20:6) Ov, ukutwish kwikal nich kashinsh anch ukez kwikal nich machuku minam ma kurutu masangareshina? Mwaning ukutwish! Mulong “[Nzamb] wadiyukisha dichuku dia sambwad, waditumbisha kand.” Chinech chamekesha anch chikalap nchik milong yakad kuchingejin yashikena, rutong ra Nzamb rikez kusadik chakin kamu kwinsudiel kwa dichuku diend dia kwiswedish.—Dis. 2:3.
3. (a) Pasambisha dichuku dia kwiswedish dia Nzamb, ov, kubwambul ik kwasambisha? (b) Ov, mutapu ik Yehova walejana rutong rend ra kupwish kubwambwil?
3 Pakwez, uyimp wasambisha kwinsambishil kwa dichuku dia kwiswedish dia Nzamb. Satan, mwangel mwan a Nzamb, witeka amwinend mudi nzamb. Ndiy walonda makasu ma kusambish ni wamudimba Ev walika kumuziyil Yehova. (1 Tim. 2:14) Ev, ni ndiy wasala anch nfumwend inunga ku kubwambwil. (Dis. 3:1-6) Ap kwinsambishil kwinoku kwa rusangu ra mangand pa chisu ukinakin wa Nzamb autadika, Yehova kamanap usey wa kukasikesh nich machip anch rutong rend rikez kusadik chakin kamu. Pakwez, mu mazu mafanyidinau kutesh pa chisu chatenchikay Nzamb, ndiy walejana ching kusu mutapu ufanyidinay kudiosh kubwambul kwinoku anch: “Am nikez kutek rukuny pakach pey [Satan] ni mband, ni pakach pa mbut yey ni mbut ya mband. Ndiy [Mbut ya kushilamu] ukez kukuchany ku mutu wey, niyey ukez kumusum ku kapolantundu kend.”—Dis. 3:15; Kuj. 12:9.
KUCHIP—CHOM CHIMWING CHA USEY NAKASH
4, 5. Ov, chom ik cha usey chasalay Aburaham pa chisu chinicha?
4 Kwinsambishil kwinoku kwa rusangu ra muntu, chimeken patok anch kuchip piur pa uyakin wa mulong winou kwading kwa usey mu yom yayilejau Adam nenday Ev kudi Nzamb. Yitangil yiwanyidina yimukatina Nzamb ni kumwimburij yikwetap kuswir nich kuchip machip; mulong yilondining chisu chawonsu uyakin ni yikat kwichingejin nakash umwing ni mukwau. Pakwez yom yakarumuka nich chitil chasalau antu ni kuburen kuwanyin. Kupwa, pasambishau antu awonsu kulond makasu ni kudimban, chikala cha usey kudi awiy kuchip piur pa ukinakin wa milong ya usey.
5 Kuchip machip chading chom cha usey chasalay nshakur Aburaham tupamp tusatu, mulong wa yisakin yiwamp. (Dis. 21:22-24; 24:2-4, 9) Chilakej, chinech chashikena, pa chisu chachirikay kwinjit jarishay ni mwant wa Elam ni ant akwau. Mwant wa Salem ni wa Sodom eza kumusankan Aburaham. Melkizedek, mwant wa Salem, wading kand “mwin kupesh wa Nzamb Upandakena Piur.” Chawiy lel, ndiy wamuyukisha Aburaham ni kumushiman Nzamb mulong wa mukwasha kuwin njit jinej pantaliken ni akankuny nend. (Dis. 14:17-20) Kupwa, pasotay mwant wa Sodom kumufut Aburaham mulong wa kuyipandish antu a mwant kudi amasalay eza kuyandamin, Abraham wachipa anch: “Am nachip kal kurutu kwa [Yehova] Nzamb Upandakena Piur pa yawonsu watanga diur ni divu: Kinikutambulap kwam ap kusu kadand, ap kusu mwoj wa yisapat, ap kusu chom chey chimwing, chakwel wez ulika kulond anch: ‘Yam namupitisha Abram.’”—Dis. 14:21-23.
YEHOVA WACHIPA KUSHILAMU KUDI ABURAHAM
6. (a) Ov, chilakej ik chatushilay Aburaham? (b) Mutapu ik tukutwisha kutaninamu yiyukish mu kuziyil kwa Aburaham?
6 Mulong wa chiyukish cha antu akayitil, Yehova Nzamb wachipa machip kusutil ku kusadil mazu mudi “Yehova Nsalejetu ulondil anch:‘Mudi munidia am Nzamb mwom.’” (Ezek. 17:16) Bibil ulejen tupamp 40 ni kusut yisu kushalijan ya kuchip machip kudi Yehova Nzamb. Chilakej chimwing chijikena nawamp pamwing ap chidi chom chasalay Nzamb kudi Aburaham. Pasuta mivu yivud, Yehova wasala manswik mavud ma kushilamu kudi Aburaham mawonsu mamekesha anch Mbut ya kushilamu yikez kudiokil kudi Aburaham, kusutil kudi mwanend Isak. (Dis. 12:1-3, 7; 13:14-17; 15:5, 18; 21:12) Kupwa Yehova wamuteka Aburaham mu kupak kumwing kukash, pamulejay anch amupana mwanend mukatish. Pakad kwidjidjek, Aburaham waziyila ni wading piswimp ni kumupan Isak mudi chakupesh kupwa mwangel wa Nzamb wamulikisha kusal mwamu. Chawiy lel Nzamb wachipa mwamu anch: “Nichipil kal mu dijin diam amwinam . . . mulong ey wasalang kal chom chinech, kiwankishangap mwaney kapokal. Nikez kukwizwish nich yiyukish, nikez kuvudish majuku mey mudi atutumbu a mwiur, mudi kand usukuril udia ku chikum cha karung, ni a majuku mey akez kupandakan mal ma akankuny. Ku a majuku mey kwawiy kukez kuyukila michid yawonsu ya pansh mulong ey waziyil kal dizu diam.”—Dis. 22:1-3, 9-12, 15-18.
7, 8. (a) Ov, mulong wak Nzamb wachipa kudi Aburaham? (b) Mutapu ik “amikoku akwau” a Yesu akez kutaninamu yiyukish mu kuchip kwa kushilamu kwa Nzamb?
7 Ov, mulong wak Nzamb wachipa kudi Aburaham anch yakushilamu Yend yikez kwikal yakin? Chading mulong wa kuyikasikesh antu afanyidina kwikal answan pamwing nenday Kristu, ni kwikal chikunku chikwau cha “mbut” ya kushilamu ni kukasikesh ritiy rau. (Tang Hebereu 6:13-18; Gal. 3:29) Mudi mwalejanay kambuy Paul, anch “chawiy chawejinayiku [Yehova] machip mend. Kushilamu kwa Nzamb ni kuchip kwa Nzamb kiyikutwishap kukarumuk, [mu kushilamu ni kuchip kwend] yiney yaad Nzamb kakutwishap kudimban. Chawiy etu . . . tukutwish kwikal nich mushiku wa kulam daang ruchingej raturijekinay.”
8 In Kristu azizidilau many kadiap ayinau kusu akeza kutaninamu yiyukish mu kuchip kwa Nzamb kudi Aburaham. Kusutil ku “mbut” ya Aburaham, Yehova wachipa anch “kwawiy kukez kuyukila michid yawonsu ya pansh.” (Dis. 22:18) Pakach pa antu inay akeza kutambul yiyukish kudi kand ni “amikoku akwau,” akata kumuziyil Kristu, ayitekina kurutu kwau ruchingej ra kwikal nich mwom wa chikupu mu paradis pa divu. (Yoh. 10:16) Ap anch ruchingej rey ridi ra kushakam mwiur ap pa divu, ufanyidin “kulam daang” ruchingej mu kudandamen kumuziyil Nzamb.—Tang Hebereu 6:11, 12.
YAKUSHILAMU YA NZAMB
9. Ov, machip ik machipay Nzamb padingau anend a Aburaham mu uswik mu Idjibit?
9 Pasuta mivu chitot, Yehova wachipa kand nich kalimish yakushilamu yilejenau pamutumay Moses chakwel ayileja anend a Aburaham, adinga mu uswik mu Idjibit. (Kub. 6:6-8) Pa chisu chinech, Nzamb wayileja anch: “Pinayitonda in Isarel, . . . nayishilamu kuyidiosh mu Idjibit ni kuyitwal mwi ngand yinayitodila.Yawiy kamu ngand ya dipit yifukila.”—Ezek. 20:5, 6.
10. Ov, kushilamu ik kwapanay Nzamb kudi in Isarel kupwa kwa kuyikol mu Idjibit?
10 Chawiy lel, kupwa kwa kukolik kwa in Isarel mu Idjibit, Yehova wachipa kand machip makwau kudi awiy anch: “Chawiy anch en wez waziyilany dizu diam ni kulam manswik mam, en ukez kwikalany amam pakach pa antu awonsu, mulong divu diawonsu didi diamam. En ukez kwikalany want wa in kupesh ni muchid utumbila kudi am.” (Kub. 19:5, 6) Chading chisend chiwamp mud ik chapanay Nzamb kudi in Isarel! Chinech chirumburikin anch akat kuziyil, antu adiokila ku michid ela kwikal nich ruchingej ra kuyisadil kudi Nzamb mudi want wa in kupesh mulong wa yiyukish ya antu akwau. Kupwa, palejanay yom yasalay mulong wa in Isarel pa chisu chinicha, Yehova walonda anch: “Am nakudjika . . . nashilamu anch nikukatil ey. Chakin kamu twatijana uruu wa manswik, ey wikal iwam.”—Ezek. 16:8.
11. Mutapu ik wakulau in Isarel payitazukau kudi Nzamb chakwel eza mu manswik ma urund nend mudi antwend atonday?
11 Pa chisu chinicha, Yehova kayilejap in Isarel anch afanyidin kuchip machip anch akez kuziyil; ap Nzamb kayishindilap in Isarel chakwel itiyija urund winou wamushena. Pakwez, awiy alonda kwa kwisotil anch: “Yawonsu yalonday [Yehova], tukez kuyisadil.” (Kub. 19:8) Pasuta mivu yisatu, Yehova Nzamb wayileja in Isarel chom chafanyidina kusal muchid wend watonday. Chakusambish, awiy atesha Yijil Dikum, ni kupwa Moses wayinkisha kand yijil yikwau yifundinau mu Kubudik 20:22 kushik mu Kubudik 23:33. Ov, chom ik chasalau in Isarel? “Antu awonsu amwakula ni dizu dimwing, alond anch: ‘Yijil yawonsu yalonday kal [Yehova], tukez kayisadil.’” (Kub. 24:3) Kupwa Moses wafunda kand yijil mu “mukand wa manswik” ni wayitanga nich dizu dia piur chakwel muchid wawonsu utesha kand. Kupwa, antu achipa machip tupamp tusatu anch: “Yom yawonsu yalonday kal [Yehova], etu tukez kuyisadil ni kuyiziyil.”—Kub. 24:4, 7, 8.
12. Ov, mutapu ik wakulay Yehova ni antwend atonday piur pa manswik matekay pakach pau?
12 Kapamp kamwing Yehova wasambisha kuwanyish Chijil chend cha manswik kusutil ku kutenchik tent wa difukwil ni wa win kupesh ni kusal anch akayitil amushejina. Pakwez, in Isarel avuramena swaa kwipan kwau kudi Nzamb ni “amupaka Utumbila wa Isarel.” (Kus. 78:41) Chilakej, padingay Moses ni mudimu wa kutambul malejan makwau ku Mukandu wa Sinai, in Isarel asambisha kushadish kushimpish muchim ni kushadish ritiy rau mudi Nzamb, ni kutong anch Moses wayilik kal. Chawiy chasalau chirumbidij cha musamb a ngomb ni kuyilej antu anch: “Isarel, tal [Nzamb] wey, ndiy winou wakudiosh[a] kwi ngand ya Idjibit.” (Kub. 32:1, 4) Chawiy lel asala chatazukau anch “musambu wa kumulimish nich [Yehova]” asambisha kumuzengamin ni kulambul yakupesh ya kwosh ku chirumbidij chau chasalau. Pamanay mwamu, Yehova wamuleja Moses anch: “Awiy adiokal kal swa kusha njil nayileja!” (Kub. 32:5, 6, 8) Cha ushon, kudiosh pinipa in Isarel adinga akat kuchip machip kudi Nzamb ni kulik kuziyil ku mazu mau.—Kuch. 30:2.
YA KUSHILAMU YIKWAU YAAD
13. Ov, kuchip ik kwasalay Nzamb kudi Mwant David, ni mutapu ik yisambidina piur pa Mbut ja kushilamu?
13 Mu winyikel wa Mwant David, Yehova wachipa tupamp tukwau twaad mulong wa yiyukish ya antu awonsu akata kumuziyil. Chakusambish wachipa kudi David anch nkwas yend yikez kwikalaku chikupu. (Kus. 89:35, 36; 132:11, 12) Chinech chirumburikin anch Mbut ja kushilamu akez kujitazuk anch “Mwan a David.” (Mat. 1:1; 21:9) Nich kwitudish, David wamutazuka mwanend wafanyidina kuvadik kurutu anch ‘Nsalejend’ mulong Kristu ukez kwikal pa ndond ya piur nakash.—Mat. 22:42-44.
14. Ov, kuchip ik kwasalay Yehova piur pa Mbut ya kushilamu, ni mutapu ik tukata kutaninamu yiyukish?
14 Cha kaad, Yehova wamupepila David chakwel atakela kulejan anch Mwant winou ukez kusal kand mudi Mwin Kupesh Mujim wa antu. Mu Isarel want ading awauril nakash ni win kupesh. In kupesh adiokala ku muchid wa in Levi, ni ant adiokala ku muchid wa in Yuda. Pakwez piur pa answan end inay atumbila a mu machuku ma kurutu, David watakela kulejan anch: “Dizu dia Nzamb[Yehova] kudi Nsalejam: ‘Shakam kwey ku chikas cham cha katatuku kushik pinikeza kuyitek akankuny ney ikal chitwam chey.’ Yehova wachipa (ni kakezap kwov ushon): ‘Ey udi mwin kupesh chikupu, mudi mudiay Melikizedek.’” (Kus. 110:1, 4) Mu kuwanyin kwa uprofet winou, Yesu Kristu, Mbut ya kushilamu, ukat kuyikel katat mwiur. Ndiy usadil kand mudi Mwin Kupesh Mujim wa antu kusutil ku kuyikwash antu itina dilikishin chakwel andama mu urund umwing witiyikina ni Nzamb.—Tang Hebereu 7:21, 25, 26.
ISAREL MUSU WA NZAMB
15, 16. (a) Ov, Isarel ik mwaad wisambidinau mu Bibil, ni wisu ukweta chiyukish cha Nzamb nlel unou? (b) Ov, chijil ik chayinkishay Yesu in kumulondul end piur pa kuchip machip?
15 Mulong wamulika Yesu Kristu, muchid wa in Isarel washadisha dilau diau dia kwitiyik kudi Nzamb ni ruchingej rau ra kwikal “want wa in kupesh.” Mudi mwayilejay Yesu antakel in Yuda anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” (Mat. 21:43, TMK) Muchid winou usu wavadika pa Pantekot mu muvu wa 33 C.C. payizizilau mwiku wa Nzamb in kwilej a Yesu 120 akumangana mu Yerusalem. Antu inay ikala “in Isarel akin a Nzamb” ni kupwa ashikena ku uvud wa tunan ni tunan adiokila kudi antu a michid yawonsu ya mangand ma katat.—Gal. 6:16.
16 Chinyim ni Isarel wa ku mujimbu, muchid usu wa muspiritu wa Nzamb wadandamena kumekesh mabuj mawamp kusutil ku kudandamen kumuziyil Nzamb. Chijil chimwing chifanyidina yid ya muchid winou kuziyil chidi piur pa kuchip machip. Padingay Yesu pa divu, antu kadingap ni kuziyil ku machip mau, ading akat kuchip machip ma makasu ap kuchip mulong wa yom yakad usey. (Mat. 23:16-22) Yesu wayileja in kumulondul end anch: “kangal wez wachipany . . . Londany kusu anch: ‘Mwawiy, nikusal,’ ap ‘Bwat, kinikusalap.’ Yom yawonsu yiukuwejanyaku yidiokil kudi Sakudimban, ndiy kamu Muyimp.”—Mat. 5:34, 37.
17. Ov, yipul ik yikezau kwisambin mu mutu wa mulong wa kwilej udia kurutu?
17 Ov, chinech chirumburikin anch chiwapinap kuchip machip? Cha usey nakash, ov chom ik chirumburikina Mwawiy, nikusal? Yipul yiney akez kuyisambin mu mutu wa mulong ulondwilaku. Pitukata kudandamen kutongijokin piur pa Dizu dia Nzamb, tusalany usu wa kudandamen kumuziyil Yehova. Chawiy lel, ni ndiy ukez kusanger kutuyukish chikupu kwambatan nich yakushilamu yend ya usey.
[Tablo wa jinsangu udia pa paj wa 27]
Kushilamu kwa Yehova kuding kwau kwakin
[Chipich chidia pa paj wa 25]
Aburaham ukez kuman piswimp ap kusadik kwa kushilamu kwa Yehova