Yakul ku Yipul ya Bibil
Ov, dijin dia Nzamb nany?
Yid yetu yawonsu ya dijuku yikwet muntu ni muntu dijin. Ap kand anam akwet majin! Ov, chikwikalap chovikena kudi Nzamb kwikal ni dijin? Mu Bibil, Nzamb ukwet yijiken yivud, mudi Nzamb Mwin Dikand Diawonsu, Nsalej, ni Sakatang, pakwez ukwet kand dijin diend.—Tang Isay 42:8.
Yikarumun yivud ya Bibil yikwet dijin dia Nzamb mu Kuseng 83:18. Chilakej, mu Les Saintes Écritures — Traduction du monde nouveau, verse winou ulondin anch: “Ey mwin dijin Yehova, yey kusu amwiney udia Piur Nakash pa divu diawonsu.”
Ov, mulong wak tufanyidin kusadil dijin dia Nzamb?
Tukat kusadil dijin dia muntu pitukata kwambamb ni antu tukatila, mudi arund netu a piswimp
Nzamb usotil etu tusadila dijin diend amwinend. Tukat kusadil dijin dia muntu pitukata kwambamb ni antu tukatila, mudi arund netu a piswimp—pakampwil anch atwit kusal mwamu. Ov, chinech chifanyidin kushalijan pitukata kwisamb ni Nzamb? Chikwau kand, Yesu Kristu watukasikesha kusadil dijin dia Nzamb.—Tang Mateu 6:9; Yohan 17:26.
Pakwez, chakwel kwikal murund nend Nzamb, tuswiridin kwijik nawamp piur pend kupandakanamu kusu kwijik dijin diend. Chilakej, ov, yom ik yikatilay Nzamb? Ov, chitwishikin chakin kamu kumushejin Nzamb? Ukutwish kutan yakul ku yipul yiney mu Bibil.