“Nading mwin chisum”

CHINADINGA PASAK:

Napamina mu chisak chimwing cha antu a mudimu adinga mu musumb udia ku chau wa Turku. Tatukwam wading champion mu boxe, am ni mwancham twading tusadil niyetu box nakash. Padingau ni kwinsarumun chakwel tubulijana ku shikol; nading ni kubulan yinkany nakash. Pinadinga ni mivu dikum, nandama mu chisak chimwing cha antu a chisum, yawiy yasala anch nikala muntu wa kupwitijan ni chisum nakash. Nasambisha kand kuwang mizik ya heavy-metal, ni nasambisha kutong anch nifanyidin kwikal mwin kuwang mujim utazikiningau anch rock star.

Nalanda yisaj yimwing ya kubul nich mizik ni nasala chisak chimwing, ni kupwa nikala kand mwant wa in kuwang mu chisak chetu. Nasambisha kwikal ni mwikadil uyimp nakash. Mulong chisak chetu chading cha chisum ni nading nimeken kwikal mwin chisum, asambisha pakemp-pakemp kusal ma publicite mavud mulong wetwetu. Twasambisha kuwang kurutu kwa antu avud, ni twakwatish mizik yikemp, ni wansudiel pakach pa mizik yiney wayisangaresha antu avud. Kwinsudiel kwa muvu wa 1980, twaya ku Etats-Unis mulong wa kukasikesh chisak chetu. Twabula mizik mu New York ni mu Los Angeles pakemp ni twamanijana ni antu amwing ija nakash kubul mizik kurutu kwa kuchirik ku Finlande.

Ap anch nasangara kwikal mu chisak chinech, pakwez nasota kwijik kurumburik kwa mwom wam. Nasambisha kukis yaku ya kubambel ni chisum ya antu awangina mizik. Nasambisha kand kwov kuyip mulong wa mashakamin mam mayimp. Namana anch nading muntu muyimp, ni nasambisha kwov wom wa karung kamisiny. Nasala usu chakwel nitana yakul ku yipul yimwing mu ma buku ma mitapu ni mitapu ma chirelijon. Nalembila kand nakash chakwel nitambula ukwash wa Nzamb, ap anch niyova anch nelap kumusangaresh.

MUTAPU WAKARUMUNAY BIBIL MWOM WAM:

Nasambisha kusal mu buro umwing wa poste wa kwol kwetu, chakwel niwanyisha maswir mam. Dichuku dimwing, namana anch mbay nam umwing wa mudimu wading Kaman wa Yehova. Nasambisha kumwipul yipul yivud. Yakul yend yiwamp ni yambatena nich Mukand wa Nzamb yansangaresha, chawiy lel nitiyija kwilej nend Bibil. Kupwa kwa kwilej nend mwi mbing jimwing, chisak cham cheza kwinlej anch tuya ku États-Unis chakwel tuwanga mizik yimwing yikeza kusal anch tubudisha album umwing mujim nakash. Niyam namana anch nelap kushadish chisu chinech mu mwom wam.

Namuleja Kaman twading kwilej nend Bibil anch nisotin chakin kamu kuya kand kuwang chakwel tusala album mukwau ni kupwa kwa kusal mwamu, nikez kand kusadil nawamp yijidik ya Bibil mu mwom wam. Ndiy kaletap yitongijok yend; wanleja kusu anch nitanga mazu ma Yesu madia mu Mateu 6:24. Verse winou ulejen anch: “Kwikil muntu ukutwisha kuyisadil ansalejend aad nawamp.” Nakashimuka pinatesha kurumburik kwa mazu minam ma Yesu. Pakwez, kupwa kwa machuku makemp, muntu wadinga kwinlej Bibil wakashimuka ni ndiy! Mulong namuleja anch nisotin kumulondul Yesu, nalik kal chisak chinech!

Bibil wading mudi dikalash diamekesha yilim yam patok. (Jakob 1:22-25) Namana anch mwikadil wam wading wa chisum: Nading ni chibud, ni maku ma ris. Nasadila mazu mayimp, nading nikat kubulijan, ni kupandikesh kumeshan maar. Pinamana anch mashakamin mam mading makad kwambatan nich yijidik ya Bibil, niyova nayimp amwinam. Pakwez, ap anch chading chikasiken, nading tayad chakwel nikarumuna mwom wam.—Efes 4:22-24.

Kwinsambishil, nading nikat kwifish nich mulong wa yisal yiyimp nasala pasak. Pakwez, Kaman unadinga nilejina nend Bibil wankwasha nakash. Ndiy wanleja yilondinay Bibil mu Isay 1:18 anch: “Yitil yen yasuzap nchik, yikez kikal yitok mudi mbundu.” Verse winou ni maverse makwau madia mu Bibil masala anch nikal nich kashinsh anch Tatukwetu wa mwiur ukwet riy ni usotin kwok yitat ya antu awonsu akata kukarumuk ku yitil yau.

Pinashikena ku kumwijik ni kumukat Yehova, nasota kupan mwom wam kudi ndiy. (Kuseng 40:8) Natambula dibatish mu muvu wa 1992 ku chitentam cha mangand mawonsu cha Atuman a Yehova chasadika mu ul wa Saint-Pétersbourg, mu Russie.

MUTAPU NATANA CHIYUKISH:

Nikala ni arund awamp avud pakach pa in kumwifukwil Yehova. Yisu yivud, twading tukat kuwang pamwing mizik yiwamp ni kusanger chipan chinech chidiokila kudi Nzamb. (Jakob 1:17) Chiyukish cha pakampwil natambula chading uruu wam pinamwata mukajam mukatish, Kristina. Ni ndiy, twakwashijana mu yom yivud—mu musangar ni mu mar, ni mu yovil yam yikash.

Anch nikalap Kaman wa Yehova, nelap kwikal mwom nlel unou. Pasak, nawila mu milong ni mu mar makash. Katat nikwet rutong rakin mu mwom, niyovil anch yom yawonsu yiwapin kamu.