Yakul ku Yipul ya Bibil

Ov, Nzamb Uteshining Malembil Mawonsu?

Nzamb uyiteshining antu a michid yawonsu. (Kuseng 145:18, 19) Bibil, dizu diend, ditukasikeshin kumulej milong yetu yawonsu. (Filip 4:6, 7) pakwez, malembil mamwing mamusangareshiningap Nzamb. Chilakej, kuchirikin malembil malaminau kal mu manangu kukatap kumusangareshang.​—Tang Mateu 6:7.

Chikwau kand, Yehova ukisining malembil ma antu alikining kwa kwisotil chijil chend. (Jinswir 28:9) Chilakej, pa chirung cha Bibil, Nzamb walika kuyitesh in Isarel awila mu kujipan. Chimeken patok anch, tufanyidin kuwanyish yom yimwing yitinau chakwel atutesha kudi Nzamb.​—Tang Isay 1:15.

Ov, chom ik tufanyidina kusal chakwel atutesha kudi Nzamb?

Tukutwishap kumusejin Nzamb mu malembil pakad ritiy. (Jakobu 1:5, 6) Tufanyidin kwikal nich kashinsh anch udiaku ni utubangidining. Tukutwish kukasikesh ritiy retu mu kwilej Bibil mulong ritiy rakin rimedin pa uman ni kashinsh yidia mu Dizu dia Nzamb.​—Tang Hebereu 11:1, 6.

Tufanyidin kumulembil nich kashinsh ni kwitudish. Ap Yesu, Mwan a Nzamb, witudisha ni ndiy padingay ni kulembil. (Luka 22:41, 42) Chawiy lel, pa ndond pa kumwipul Nzamb piur pa chitufanyidina kusal, tufanyidin kusal usu wa kutesh yijil yend mu kutang Bibil. Kupwa tukutwish kulembil kukwatijan nich rusot ra Nzamb.​—Tang 1 Yohan 5:14.