MUTU WA MULONG WA PA CHIBUR | YESU UKAT KUPANDISH—OV, KU CHOM IK?
Mulong Wak Tukwet Kuswir kwa Kupand
“Antu awonsu akwet mwom wa mivu yikemp, pakwez wizwil sens nich mar. Ufanaken mudi chisalamb chikat kubudik, chad kuruk, ukat kuchin mudi urel wakad kwiman.”—Job 14:1, 2.
Kudiosh pasak, antu akat kulat piur pa mutapu ukutwishau kudandamen kwikal nich usu wa ku usand, ni kushakam chikupu. Cha ushon, mulong uyimp wakin udi anch: Tukat kufang. Mazu minam ma Job, amalonda kwasutin kal mivu tunan tusatu, mad makin kushik ni nlel.
Kuswir kwa kushakam chikupu kud mu michim ya antu a pa mangand mawonsu. Bibil utulejin anch Nzamb wateka mu michim yetu rusot ra kushakam chikupu mud mutapu utusotina kwijik. (Mulej 3:11) Anch chidi mwamu, ov, utongin anch chidi chakin anch Nzamb wa rukat wateka rusot mu michim yetu rikasiken kuriwanyish? Anch wakul anch bwat, uyingin. Dizu dia Nzamb ditazukin rufu anch mukankuny ni dikanin anch ‘akez karishesh.’—1 Korint 15:26.
Chakin rufu udi mukankuny. Muntu ap umwing kakutwishap kurikat. Pakata ubaj kushej piswimp, tukat kuwiyep, kujingam, ap kuya mau. Chisu tukata kuyel, tukat kusal usu wa kuyerik. Tukutwish kusal yawonsu yitwishikina mulong wa kwipuk yom yikutwisha kutuletin rufu.
Ov, kud kand diyingish dia kwitiyij anch mukankuny winou mukur akez kumushesh? Mwaning, didiaku. Yehova Nzamb, Sakatang, kayitangap kwend antu mulong wa kushakam kwau mivu yikemp ni kupwa afa. Kufa kwa antu kwadingap kwinsambishil mu rutong ra Nzamb. Watenchika anch antu afanyidin kushakam chikupu pa divu, ni ukat kuwanyish kushilamu kwend.—Isay 55:11.
Ov, mutapu ik lel, ukezau kushesh rufu? Kudiosh pakuru, antu arisha nakash mulong wa kupwish mulong wa rufu, pakwez katwishap. Mu machiku minam, kurish kwinoku kudandamedin. In siyans asala mon mulong wa kukangesh mayej kanang. Ashinshikina pa yom yasalau yom yikweta mwom. Mu jindond jivud, antu avud ashiching mivu yivud kusutamu mu mivu chitot yasutina ey. Pakwez, chiyikasikedin nakash antu kuwin rufu. Mudi mulondinay Bibil, ‘awonsu akat kuchirik ku rufunfut.’—Mulej 3:20.
Rusangu ruwamp rid anch tufanyidinap kuchingejin ukwash wa antu mulong wa kupwish mulong winou ukur. Yehova Nzamb watenchikin kal yom mulong wetwetu chakwel tupanda ni tukwolika ku rufu, ni muntu ufanyidina kutenchik mulong winou udi Yesu Kristu.