Yakul ku Yipul ya Bibil
Mulong wak tufanyidin kuvurik rufu ra Yesu?
Yom ik yikuwanyishau kudi rufu ra yesu mu machuku ma kurutu?—Isay 25:8; 33:24
Rufu ra Yesu rading ra usey nakash mu rusangu ra antu—wafa mulong wa kuchirish mwom wadingau nich antu kuswir. Muntu kamutangap nich rutong ra kov nayimp, kuyel, ap kufa. (Disambishil 1:31) Pakwez chitil chandama mu mangand kusutil kudi muntu wa kusambish, Adam. Yesu wapana mwom wend chakwel atukwola ku chitil ni rufu.—Tang Mateu 20:28; Rom 6:23.
Nzamb wamekesha rukat rend ripandikena pa kumutum Mwanend pa divu chakwel afa mulong wetwetu. (1 Yohan 4:9, 10) Yesu wayileja in kwilejend chakwel avurikang rufu rend pa kusal musambu uswapela, nich dibot ni maar ma nviny. Kusal mwamu muvu ni muvu udi mutapu wa kumekesh kujikitish kwetu mulong wa rukat ramekeshau kudi Nzamb ni Yesu.—Tang Luka 22:19, 20.
Ov, nany ufanyidina kudia dibot ni kuna maar ma nviny?
Chisu chayilejay Yesu in kwilejend kapamp ka kusambish mulong wa kuvurik rufu rend, wayileja piur pa manswik ap kovijan. (Mateu 26:26-28) Manswik minam mayinkisha amwing pakach pau ruchingej ra kuyikel mwiur mudi ant ni in kupesh nenday Yesu. Ap anch ma miliyon ma antu makat kuvirik rufu ra Yesu, ching kusu antu adia mu manswik minam awiy akata kudia dibot ni kuna maar ma nviny mu chivurikish.—Tang Kujingunik 5:10.
Kwasutin kal mivu piswimp ni 2 000, Yehova watonda kal antu afanyidina kwikal ant. (Luka 12:32) Uvud wau udi kwau akemp anch twaufanikesh ni uvud wa antu akwikala nich mwom wa chikupu pa divu.—Tang Kujingunik 7:4, 9, 17.