Kuyikwash Anamakwend a Kristu Nich Kushinshaman

1, 2. (a) Ov, chishimu ik chayilejay Yesu arund nend a piswimp? (Tal chipich cha kwinsambishil.) (b) Ov, chom ik tuswirikedina kwijik piur pa chishimu cha amikoku ni ampemb?

YESU wambamba ni arund nend a piswimp: Pita, Andre, Yakob nenday Yohan. Ading apwish kal kutesh padingay kulond piur pa chishimu cha kashalapol ushinshamena ni kubabal, cha ayangadim dikum akad kal kwachik, ni cha talent. Yesu wapwisha mambamb mend nich chishimu chikwau kand. Walonda piur pa chisu chikezay “Mwan a Muntu” kuyirumburish “antu a michid yawonsu.” Chishimu chinech chafanyina kuyishimokish in kwilejend mud ik! Mu chishimu chinech, Yesu washinshikina pa yisak yaad, chimwing mud amikoku ni chikwau mud ampemb. Walejana kand piur pa chisak chakasatu cha usey nakash cha ‘anamakwend’ a “Mwant.”​—Tang Mateu 25:31-46.

² Antu a Yehova abanginang nakash piur pa chishimu chinech ni kurumburik kwach kwakin, mulong chading chilondina piur pa rufu ni mwom wa antu. Yesu walonda anch antu amwing akez kutambul mwom wa chikupu ni akwau akez kajiy chikupu. ​Mwom wetu wimedin pa kutesh ni pa kusadin uyakin wapanay Yesu. Chawiy lel, mu mutu wa mulong winou tukwakul ku yipul yilondwilaku ey: Ov, mutapu ik utukwashinay Yehova kutesh chishimu chinech pakemp pakemp? Mulong wak tukutwish kulond anch chishimu chinech chimedin pa usey wa mudimu wa kulejan? Ov, anany akweta chisend cha kulejan? Ni mulong wak chinech chawiy chisu cha kwikal ashinshamena kudi “Mwant” ni antu atazukinay anch “anamakwam”?

OV, MUTAPU IK UTUKWASHINAY YEHOVA KUTESH KURUMBURIK KWA CHISHIMU CHINECH?

3, 4. (a) Ov, yom tufanyidina kwijik mulong wa kutesh nawamp chishimu cha amikoku ni ampemb? (b) Mu muvu wa 1881, ov, mutapu ik warumburilau chishimu chinech mu Chinong cha Kalam cha Zion?

³ Mulong wa kutesh kurumburik kwa chishimu cha amikoku ni ampemb nawamp, tukwet kuswir kwa kwijik yom yisatu ya usey yidia mu rusangu riner: antu alondinau, chisu cha dirumburish, ni mayingishin mamekeshina anch antu ay adi amikoku ap ampemb.

⁴ Mu muvu wa 1881, Chinong cha Kalam cha Zion (Inglish) chalonda anch “Mwan a muntu,” utazukinau kand anch “Mwant,” udi Yesu. In kwilej Bibil a kusambish atesha kurumburik kwa dizu “anamakwam” didia mu dikarumun dia King James Version (Inglish) anch dilondin piur pa antu akeza kuyikel ni Kristu mwiur ni antu awonsu akushakam pa divu pakwikalau awanyidina. Atesha anch kwauril kwa amikoku ni ampemb kukez kusadik mu Mivu Kanan ya Winyikel wa Kristu. Ni itiyija kand anch antu afanyina kwikal amikoku ching antu ading kwilikej rukat ra Nzamb mu yom yawonsu.

5. Mu muvu wa 1923, ov, mutapu ik watoka mutapu wetu wa kutesh?

⁵ Mu muvu wa 1923, Yehova wayikwasha antwend chakwel atesha nawamp kurumburik kwa chishimu chinech. Chinong cha Kalam cha Mwinkind 15, 1923, (Inglish) chalonda anch “Mwan a muntu” udi Yesu. Pakwez, asadina maverse ma mu Bibil mulong wa kumekesh anch anamakwend ni Yesu adi antu akwikala mwiur mu Mivu Kanan ya Winyikel wa Kristu, ni amikoku adi antu akweta ruchingej ra kwikal ni mwom pa divu mu winyikel wa Kristu. Ov, chisu ik chikezau kuyauril amikoku ni ampemb? Mutu wa mulong winou walonda anch anamakwend a Kristu afanyina kuyikel nend mwiur mu mivu Kanan, chawiy kakutwishap kulik kukwash ap kudiwul chisak cha antu akushakama pa divu. Chawiy lel, kuyauril amikoku ni ampemb kufanyidin kusadik kurutu kwa Winyikel wa Mivu Kanan kusambish. Piur pa diyingish dia kwijik muntu udia mudi mukoku, mutu wa mulong winou walonda anch antu afanyidin kuyirumburish mulong amwitiyijin Yesu mudi Mwant wau ni kwitiyij anch Want winou wawiy ukuleta mashakamin mawamp.

6. Mu muvu wa 1995, ov, mutapu ik watoka nakash mutapu wetu wa kutesh?

⁶ Mudi chibudikin cha kutesh kurumburik kwinoku, antu a Yehova ijika anch antu akuyirumburish mudi amikoku ap ampemb kwinsudiel kwa ditenchik dined dia yom, kukwatijan ni mutapu wakwilau ku rusangu ra Want. Pakwez, mu muvu wa 1995, mutapu wetu wa kutesh watoka nawamp. Mitu ya milong yaad ya pa Mwinkind 15, 1995, mu nimero wa Chinong cha Kalam yalejana kwovijan kudia pakach pa mazu ma Yesu madia mu Mateu 24:29-31 (tang) ni madia mu Mateu 25:31, 32. (Tang.)a Ov, chom ik tukutwisha kulond? Mutu wa mulong wakusambish walonda anch: “Kuyirumburish antu mudi amikoku ap ampemb kudi mulong wa machuku ma kurutu.” Ov, chisu ik? “Dirumburish dikusadik kwinyim kwa ‘mar makash’ malondinau mu Mateu 24:29, 30 ni pakwezay Mwan a muntu ‘mu uyaj wend.’ . . . Kwinsudiel kwa ditenchik dined diyimp, Yesu ukusambish milong ni kulet dirumburish.”

7. Ov, kutesh ik kuwamp tukweta katat?

⁷ Nlel, tuteshin nawamp chishimu cha amikoku ni ampemb. Piur pa antu alejenau, Yesu ndiy “Mwan a muntu,” Mwant. Antu amekeshinau mudi ‘anamakwend’ adi amakundj ni amband azizidilau many ma muspiritu, akuyikela nend Kristu mwiur. (Rom 8:16, 17) “Amikoku” ni “ampemb,” amekeshin antu a michid yawonsu. Antu inay kayizizidilap many nich mwiku utumbila. Ov, chidi nchik piur pa chisu cha dirumburish? Dirumburish dined dikez kusadik kwinsudiel kwa mar makash. Ni diyingish ik dikusal anch ayirumburisha antu mudi amikoku ap ampemb? Antu akez kuyirumburish kukwatijan ni mutapu ukezau kayisadin anamakwend a Kristu azizidilau many ma muspiritu adia pa divu. Mutapu waseja kal disudiel piswimp, tukwet kujikitish mud ik kudi Yehova utukwashina pakemp pakemp kutesh nawamp chishimu chinech ni yikwau yilondinau mu Mateu 24 ni 25!

CHISHIMU CHITUFUNDISHIN ANCH MUDIMU WA KULEJAN UDI WA USEY

8, 9. Ov, mulong wak Yesu ayitazukin amikoku anch “atentamina”?

⁸ Mu chishimu cha amikoku ni ampemb, Yesu kajimbwilap patok mudimu wa kulejan. Ov, mulong wak tukutwisha kulond anch chishimu chinech chikasikedin pa usey wa mudimu wa kulejan?

⁹ Chakusambish, ijik anch Yesu wading kufundish kusutil ku chishimu. Chidi chakin anch kadingap ni kulond piur pa kwauril kwakin kwa amikoku ni ampemb. Mu mutapu umwing, kalondap anch muntu mwawonsu udia mukoku ufanyidin mu mutapu umekena, kudish, kudjik, kwokish, ni kuyiman anamakwend a Kristu adia mu rukan. Pakwez, mu chishimu chend wading kumekesh mwikadil wa mu chifanikesh wafanyinau amikoku kumekesh kudi anamakwend. Yesu watazuka amikoku mudi “atentamina” mulong akat kwitiyij anch Kristu ukwet chisak cha anamakwend azizidilau many chidia panap pa divu, ni amikoku akat kuyikwash nich kushinshaman in Kristu azizidilau many mu machuku minam mayimp.​—Mat. 10:40-42; 25:40, 46; 2 Tim. 3:1-5.

10. Ov, mutapu ik ukutwishau amikoku kumekesh ranaken kudi anamakwend a Kristu?

¹⁰ Chakaad, shinshikin pa yom yifundinau piswimp ni mazu ma Yesu minam. Yesu wambambina piur pa chijingidij cha kwikalaku kwend ni nsudiel ya ditenchik dia yom dined. (Mat. 24:3) Kwinsambishil kwa mambamb mend, Yesu walejana chijingidij chafanyina kwikal chijim nakash​—Kulejan rusangu ra Want afanyina ‘kurilejan bil ku mangand mawonsu.’ (Mat. 24:14) Ni kurutu kwa kulond piur pa amikoku ni ampemb, walonda chishimu cha talent. Ching mudi mulondina mutu wa mulong twisambinanga, Yesu wapana chishimu chinech chimedina pa in kwilejend azizidilau many, ‘anamakwend,’ anch afanyidin kwipan mu mudimu wa kulejan nich mushiku. Pakwez, chisak chikemp cha antu azizidilau many adia pa divu mu machuku minam ma kwikalaku kwa Yesu akwet chikokujol chikash​—kulejan rusangu ruwamp pa “mangand mawonsu” kurutu kwa nsudiel kwez. Chishimu cha amikoku ni ampemb chimekeshin anch azizidilau afanyidin kuyikwash. Chikwau kand, chom cha kusambish chikutwishau antu adia mudi amikoku kusal chidi kumekesh ranaken kudi anamakwend a Kristu pa kuyikwash mu mudimu wa kulejan. Ap mwamu, ov, ukwash winou wovikeshin chom ik? Ov chinech chidi ching mulong wa kuyinkish yom ya ku mujimbu ni kuyongoj, anch kudi yom yikwau yivud?

OV, NANY UFANYIDINA KULEJAN?

11. Ov, chipul ik chikutwisha kulank, ni mulong wak?

¹¹ Nlel unou, in kwilej a Yesu adi ma miliyon chinan pakwez kadiap azizidilau many. Katambulap talent japanay Yesu kudi atushalapol end azizidilau many. (Mat. 25:14-18) Chipul chikutwish kulank, ‘Chisend cha kulejan, ov, akutwish kuchikal nich kudi antu akad kwikal azizidilau many nich mwiku utumbila?’ tushinshikinany mayingish matubachikina kulond anch mwaning.

12. Ov, chom twilejina mu mazu ma Yesu madia mu Mateu 28:19, 20?

¹² Yesu wayifundisha in kwilejend awonsu kulejan. Kwinyim kwa kuvumbuk kwend, Yesu wayileja in kwilejend kuyikadish antu in kwilejend, kuyifundish “yom yawonsu” yayilejay. Pa yom yiney padi ni chisend cha mudimu wa kulejan. (Tang Mateu 28:19, 20.) Chawiy lel, in kwilej awonsu a Kristu afanyidin kulejan, chikalap nchik ruchingej rau ra kwikal mwiur ap kushakam panap pansh.​—Mid. 10:42.

13. Ov, chom twilejina ku chishimushimu chamanay Yohan?

¹³ Mukand wa Kujingunik umekeshin anch mudimu wa kulejan akuusal kudi azizidilau many ni antu akwau. Yesu wamuleja kambuy Yohan chishimushimu cha “ngachik,” azizidilau many 144 000 akuyikela ni Kristu mwiur, ayitazukin antu chakwel ‘atambula mem ma mwom mamwamu.’ (Kuj. 14:1, 3; 22:17) Mem madi ditenchik diatenchikay Yehova mulong wa kuyikol antu ku chitil ni rufu kusutil ku cha kupesh cha difut dia Kristu. (Mat. 20:28; Yoh. 3:16; 1 Yoh. 4:9, 10) In Kristu azizidilau many akat kuyilej antu nich mushiku piur pa difut diafutay Yesu, ni yom yikezau kutaninamu. (1 Kor. 1:23) Pakwez mu chishimushimu, Yohan wamana antu akwau, adinga akad kwikal mu chisak cha ngachik. Antu ay niyawiy ayileja anch alonda: “Ez!” Antu inay akat kuziyil ni ayitazukin antu kwez kutambul mem ma mwom. Chisak chakad chidi cha antu akwet ruchingej ra kushakam pa divu. Chawiy lel, chishimushimu chinech chimekeshin patok anch antu awonsu itiyijin ku kutazuk kudi anch “ez” akwet niyau chisend cha kuyilej antu akwau.

14. Ov, mulong wak tuziyidil ku “chijil cha Yesu”?

¹⁴ Antu awonsu aziyidina ku “chijil cha Kristu” afanyidin kulejan. (Gal. 6:2) Yehova kakwetap yijil mitapu yaad. Chilakej, wayileja in Isarel anch: “Kukez kwikal chijil cha mutapu umwing kudi mwin ngand ni kudi mweny ukweza ni kushakam mukach mwen.” (Kub. 12:49; Lev. 24:22) In Kristu kadiap mwishin mwa chijil cha Moses. Pakwez etu awonsu, twikalap azizidilau many ap bwat, tudi mwishin mwa “chijil cha Kristu.” Mu chijil chinech mudi yom yawonsu yafundishay Yesu. Chipandikena mu mafundish ma Yesu chidi anch in kwilejend afanyidin kumekesh rukat. (Yoh. 13:35; Jak. 2:8) Ni mutapu umwing wa kusambish tumekeshina rukat kudi Nzamb, kudi Kristu, ni kudi mutej netu udi kulejan rusangu ruwamp ra Want.​—Yoh. 15:10; Mid. 1:8.

15. Ov, mulong wak tukutwish kulond anch antu in kwilej a Yesu afanyidin kuziyil chijil cha Yesu?

¹⁵ Mazu malonday piur pa kachisak kakemp akutwish kumasadil pa chisak chijim. Chilakej, Yesu wasuka manswik mulong wa Want ni in kwilej 11 kusu, pakwez manswik minam madiaku mulong wa antu 144 000 awonsu. (Luka 22:29, 30; Kuj. 5:10; 7:4-8) Chilik chimwing, Yesu wayileja antu akemp a pakach pa in kwilejend kusu​—antu amekenay kwinyim kwa kuvumbuk kwend—​chakwel alejana. (Mid. 10:40-42; 1 Kor. 15:6) Pakwez in kwilejend awonsu a mu mivu chitot ya kusambish itiyija anch chijil chinech chading mulong wawawiy, ap anch kateshap ni matu mau mutapu walonday Yesu. (Mid. 8:4; 1 Pita 1:8) Chilik chimwing kand lel, antu ma miliyon chinan ipanina nich mushiku mu mudimu wa kulejan kateshap nich matu mau Yesu palonday piur pa kulejan. Pakwez etu awonsu chisend cha kwikal ni ritiy mudiay Yesu ni kumekesh ritiy retu pa kusal mudimu wa kupan uman.​—Jak. 2:18.

CHAWIY CHISU CHA KWIKAL ASHINSHAMENA

16-18. Ov, mutapu ik ukutwisha antu adia mudi amikoku kuyikwash anamakwau ni Kristu, ni mulong wak afanyidin kusal mwamu katat?

¹⁶ Satan ukat kuyirishikish anamakwend a Kristu azizidilau many ma spiritu adia pa divu, ni ukudandamen kwas njit mulong “chisu chend chashal kal chikemp” cha kwikalaku kwend. (Kuj. 12:9, 12, 17) Ap anch muyirishinau kudi Satan, in Kristu azizidilau many adandamedin kutakel mudimu wa kulejan ni kudi antu avud ateshina rusangu riner. Chidi chakin kamu anch, Yesu udi ni yawiy, utakedin usu wau.​—Mat. 28:20.

¹⁷ Chisak chijim cha amikoku akwet chisend chijim cha kuyikwash a Kristu kulik ching mu mudimu wa kulejan pakwez mu mitapu kushalijan kand. Chilakej, apanin milambu yau ya kwisotil ni akwashin kutung Yot ya Want, Yot ya Yitentam, ma biro ma mutiy, ni akat kuyiziyil nich kushinshaman antu atondau kudi “kashalapol ushinshamena ni kubabal” anch atakela.​—Mat. 24:45-47; Heb. 13:17.

¹⁸ Piswimp ap ku mar makash angel akulikaku rinkind wa kushesh nich. Chinech chikez kusadik kupwa kwa anamakwend ni Kristu adia pa divu kutambul chijingidij cha nsudiel. (Kuj. 7:1-3) Kurutu kwa Harmagedon kusadik, azizidilau many akez kuya mwiur. (Mat. 13:41-43) Chawiy lel, chawiy chisu chifanyidinau antu akweta ruchingej ra kushakam pa divu adi mudi amikoku kuyikwash anamakwend ni Kristu nich kushinshaman.