Ov, Urund Wey ni Yehova Udi Wakin?

1. Ov, mulong wak urund wetu ni Yehova ufanyidin kwikal ukash?

OV, WIPANIN kal, watambwil kal dibatish mudi Kaman wa Yehova? Anch chidi mwamu, ukwet chom cha usey nakash​—urund wey ni Nzamb. Pakwez, urund winou akat kuurishish kudi mangand ma Satan ni kudi mwikadil wetu wa kuburen kuwanyin. Yakamish yiney yikat kuyishiken in Kristu awonsu. Chawiy lel, chifanyidin kusal usu chakwel urund wetu ni Yehova wikala ukash.

2. (a) Ov, urund chom ik? (Tal mazu ma kwinshin.) (b) Ov, mutapu ik tukutwisha kukasikesh urund wetu ni Yehova?

² Ov, urund wey ni Yehova udi wakin? Ov, usotin kuukasikesh? Jakobu 4:8 ukulejin mutapu ukutwisha kusal mwamu: “Sejany piswimp ni Nzamb, chad niyend ukusej piswimp ni yenen.” Ijik anch urund wey ni Yehova ukutadin ey ni Yehova.a Anch wamusejin Nzamb, niyend ukukusejin. Anch twasal mwamu, urund wetu ni Yehova ukudandamen kuya ni kukasikan. Mudi chibudikin, urund winou ukwikal wakin nakash kudi etu. Tukwiyov mudi mwiyovay Yesu palonday anch: “Wantuma am udi wakin . . . Am yam nimwija.” (Yoh. 7:28, 29) Pakwez, yom ik ukutwisha kusal chakwel useja piswimp ni Yehova?

3. Ov, mutapu ik tukutwisha kwambamb ni Yehova?

³ Kwambamb chisu chawonsu ni Yehova kudi kwa usey nakash mulong wa kusej piswimp nend. Ov, mutapu ik ukutwisha kwambamb ni Nzamb? Chad ey, mutapu ik ukata kwambambang ni murund ney ushicha kulemp? Ukutwish kufundijadinany mikand ap kwambamb ku telefon. Wambambining ni Yehova chisu ukata kumulembil. (Tang Kuseng 142:2.) Niyend ukat kwambambang ney chisu utangininga Bibil, Dizu diend, ni kutongijokin piur pa yiutangina. (Tang Isay 30:20, 21.) Tushinshikinany amboku mutapu ukutwisha mambamb mey ni Yehova kukasikesh urund wey nend ni kusal anch ikala murund ney wakin.

YEHOVA UKAT KWAMBAMBANG NEY​—KUSUTIL KU DILEJAN DIA BIBIL

4, 5. Ov, mutapu ik ukatay Yehova kwambamb ney kusutin ku Bibil? Pan chilakej.

⁴ Witiyijining chakin kamu anch mu Bibil mudi rusangu ra Nzamb rimutadina muntu mwawonsu. Pakwez, ov, Bibil ukutwish kukukwash ey chakwel useja piswimp ni Yehova? Mwaning. Ov, mutapu ik? Chisu utangininga ni kwilej Bibil, shinshikin mutapu ukata kwiyov piur pa yom utangina ni mutapu ukutwisha kuyisadil mu mashakamin mey; mwamu usadin anch Yehova ambamba ney kusutin ku Dizu diend. Chom chinech chikukasikesh urund wey ni ndiy.​—Heb. 4:12; Jak. 1:23-25.

⁵ Chilakej, tang ni tongijokin pa mazu ma Yesu malonday anch: “Kangal wikumangejinany mapit ma pansh pa mangand.” Anch utekin yisakin ya Want pa ndond ya kusambish mu mwom wey, Yehova ukwikal ni musangar piur peyey. Chikwau kand, anch ukwet kuswir kwa kuswapej mwom wey ni kwipan nakash mulong wa yisakin ya Want, Yehova ukudandamen kukukwash chakwel wijika chifanyidina kusal mulong wa kusej piswimp nend.​—Mat. 6:19, 20.

6, 7. (a) Pitwilejina Bibil, ov, chom ik chikushikena piur pa rukat retu mulong wa Yehova ni rukat rend mulong wetwetu? (b) Ov, risu rifanyidina kwikal rutong retu chisu twilejina Bibil?

⁶ Ijik anch chisu twilejina Bibil, tukat kwilej yom tufanyidina kuswimp mulong wa kumusadil Yehova nawamp. Kwilej kand kusutil ku yom yasalay nich rukat ni piur pa untu wend uwamp, kukat kusal anch tumukata nakash. Chikwau kand, anch rukat retu ni Nzamb rakul, rukat rend kudi etu rikukasikan, mwamu urund wetu ni ndiy ukukasikan kand.​—Tang 1 Korint 8:3.

⁷ Chakwel anch tusheja piswimp ni Yehova, chidi cha usey kwilej Bibil nich rutong ruwamp. Yohan 17:3 ulondin anch: “Winou wawiy mwom wa chikupu, ashikena kukwijik ey, Nzamb umwing kusu wakin, ni watuma ey, Yesu Kristu,” NWT. Chawiy lel, rutong retu rifanyidinap kwikal ching kwikal ni ronganyin pakwez rifanyidin kwikal ra kushiken ku ‘kumwijik’ Yehova mudi muntu wakin.​—Tang Kubudik 33:13; Kus. 25:4.

8. (a) Ov, chom ik chikutwishau antu amwing kutong piur pa mutapu wamusalau Mwant Azaria kudiay Yehova, mudi mulejenau mu 2 Ant 15:1-5? (b) Ov, anch umwij Yehova nawamp, mutapu ik ukwiyova piur pa yom yasalay?

⁸ Anch twashiken ku kumwijik Yehova mudi murund netu wakin, tukezap kwakam anch karumburilap nawamp mu Bibil mulong wak wasala mwamu. Chilakej, chom ik ukutwisha kulond piur pa mutapu wasalay Yehova piur pa Azaria Mwant wa Yuda? (2 Ant 15:1-5) Ap anch “antu achading ni kupesh, ni kwoshil diseng dia malash pa jindond ja piur,” Azaria amwinend “wasala yom yitentamina kurutu kwa [Yehova].” Pakwez, “[Yehova] wamubula mwant nich musong wa mak, ni kushik ku dichuku diend dia rufu.” Ov, mulong wak? Rusangu rirumburilap chom. Ov, ufanyidin kushimok mulong Yehova wamupupa Azaria pakad mulong? Ukutwishap kushimok anch umwij Yehova nawamp. Chifanyidin kwijik anch Yehova ukat kupup muntu “mudi mudia yisalijok” yend. (Jer. 30:11) Kwijik mwamu kukez kutukasikesh ap anch twijap mulong wak Yehova wasala mwamu mulong wa Azaria, tukutwish kwikal nich kashinsh anch dirumburish Diend diading ditentamina.

9. Ov, yom ik yitukwashina etu kwijik mulong wak Yehova wamubula Azaria musong wa mak?

⁹ Pakwez, pa mulong wa Mwant Azaria, Bibil uturumburidin yom yivud. Mwant winou ading kand kumutazuk anch Mwant Ozias. (2 Ant 15:7, 32) Mu rusangu ridia 2 Jinsangu 26:3-5, 16-21, twilejinamu anch ap anch Ozias wasala yom yitentamina kurutu kwa Yehova chisu chimwing, kupwa mu mwom wend “muchim wend wibaza kwa kujiy.” Nich kwibaz, wapakisha kusal chom chimwing chadingau kusal ching kudi in kupesh. In kupesh Makum chinan ni umwing amukangesha ni apakisha kumuyul. Ov, chom ik chasalay Ozias? Wamekesha mutapu wikalay mwin kwibaz. Mwant ‘wayijimena nakash’ in kupesh. Chinech chitukwashin etu kutesh mulong wak Yehova wamubula nich musong wa mak!

10. Ov, mulong wak tufanyidinap kwikal nich kuswir kwa kukimb ching kurumburik kwa yom yasalay Yehova, ni mutapu ik tukutwisha kwikal nich kashinsh anch Yehova ukat ching kusalang yom yitentamina?

¹⁰ Dilejan ik tukutwisha kwilejin ku rusangu riner. Shinshikin anch karumburilap mu Dizu dia Nzamb milong yiney patok, ov, ufanyidin kusal ik nich jinsangu jikwau ja mu Bibil jakadiau kurumburil jawonsu? Ov, ukutwish kwiyipul anch Yehova wasala yom yitentamina chakin kamu? Ap ukutong anch mu Bibil muding jinsangu jivud jitwinkishina kashinsh anch Yehova usadining ching yom yitentamina ni yany yilondina piur pa yom yiwamp ni yiyimp? (Kuv. 32:4) Anch twashiken ku kumuman Yehova mudi muntu wakin, tukez kukudish rukat retu ni kusanger kwa yijil yend, ni tukezap kwikal nich kuswir kwa kukimb kurumburik kwa yom yawonsu yasalay. Ikal nich kashinsh anch kusanger kwinoku kukukul ching anch wasal usu wa kwilej ni kutongijokin pa yom yafundishay Nzamb mu Dizu diend. (Kus. 77:12, 13) Chom chinech chikukasikesh urund wey ni Yehova, ni kusal anch urund winou wikala wakin kamu.

AMBAMB NI YEHOVA​—KUSUTIL KU MALEMBIL

11-13. Ov, mutapu wija anch Yehova ukat kuteshang malembil? (Tal chipich cha kwinsambishil.)

¹¹ Pitukata kulembil, tukat kushej piswimp ni Yehova. Tukat kumushiman, kumujikitish, ni kumwit ukwash. (Kus. 32:8) Pakwez anch usotil kukasikesh urund wey ni Yehova, ufanyidin kwikal nich kashinsh anch ukat kuteshang malembil mey.

¹² Antu amwing alondining anch Nzamb kakatap kutesh malembil. Alondining kand anch ang waman anch Nzamb wakul kal ku malembil mey, chidi mulong ukat kutongin pa malembil minam, washinshikidin pa mulong wey, ni utongin mutapu wa kupwish mulong winou. Pakwez chisu usadina malembil, ov, mutapu ik ukutwisha kwijik anch malembil mey ma kashinsh akat kumatesh kamu kudi Yehova?

¹³ Shinshikin pa chom chinech: Kurutu kwa Yesu kwez pa divu, wamana mutapu wadingay Yehova kwakul ku malembil ma atushalapol End ashinshamena. Kupwa, mu mudimu wend wa kulejan pa divu, wasadila malembil mudi mutapu wa kwambamb ni Tatukwend wa mwiur mulong wa kumulej yovil yend. Ov, wafanyina kusal mwamu​—kusutish ma saa mavud uchuku mu kusal malembil—​anch wading wij anch Yehova kadingap kutesh malembil? (Luka 6:12; 22:40-46) Ov, Yesu wafanyina kuyifundish in kwilejend mulong wa kulembil ang wading wij anch Yehova kadingap kutesh malembil? Chakin, Yesu wading wij anch malembil udi mutapu wakin wa kwambamb ni Yehova. Chisu chimwing, Yesu walonda anch: “Tatuku, nakujikitish mulong ey ukat kwintesh. Am nij anch, ey ukat kwintesh yisu yawonsu.” Etu niyetu tukutwish kwikal nich kashinsh anch Yehova ukat ‘kuteshang malembil’ metu.​—Yoh. 11:41, 42; Kus. 65:2.

14, 15. (a) Ov, mutapu ik tukutwisha kutaninamu anch twalond yom patok mu malembil metu? (b) Ov, malembil ma nambaz umwing mamukwasha nchik kukasikesh urund wend ni Yehova?

¹⁴ Anch ukat kulond yom patok mu malembil, ukutwish kwijik nawamp nakash mutapu ukatay Yehova kwakul, ap anch wakul mu mutapu ujingamina. Kwakul ku malembil kukumekesh anch Yehova udi wakin kudi ey. Chikwau kand, anch ukat kumulej Yehova patok milong yawonsu yiukweta, ndiy ukusej kamu piswimp niyey.

¹⁵ Shinshikin yamushikena Kathy.b Kadingap ni kusanger mudimu wa kulejan, ap anch wading ni kuusal. Walonda anch: “Nadingap nikatina mudimu wa chingand. Nilondin anch, Nadingap kwam niukatin chakin kamu. Pinalika mudimu wam unadinga nich, mukurump umwing wankasikesha chakwel nikala chibol wa rawonsu; wanginkisha fomu. Nakwata mupak wa kwikal chibol, pakwez nasambisha kand kumulembil Yehova dichuku diawonsu chakwel nikata mudimu wa chingand.” Ov, Yehova wakula ku malembil mend? Nambaz winou ulondin anch: “Katat ak nawanyish kal mivu yisatu mu mudimu wa uchibol. Mudi chibudikin mu kwipan nakash mu mudimu wa chingand ni kwilejin kudi anambaz akwau, Nikat kukudish nakash pakemp pakemp ukaliweny wam wa kulejan. Nlel, Niukatinap mudi mudimu wa chamwamu​—Niukatin mudi mudimu wa usey nakash. Chipandikena, urund wam ni Yehova wakudin kal nakash.” Chakin, malembil ma Kathy mamukwasha chakwel urund wend ni Yehova wikal wakin.

SAL YIUKUTWISHA KUSAL

16, 17. (a) Ov, chom ik tufanyidina kusal chakwel tulama urund wetu ni Yehova ukasikena? (b) Ov, chom ik tukwisambina mu mutu wa mulong ulondwilaku?

¹⁶ Tukudandamen kuta urund ni Yehova chikupu ni chikupu. Tufanyidin kusal usu wa kusej piswimp ni Nzamb anch tusotil anch aseja netu piswimp. Chawiy lel, tudandamenany amboku kwambambang chisu chawonsu ni Nzamb kusutil ku kwilej Bibil ni kusal malembil. Mudi chibudikin, urund wetu ni Yehova ukukasikan nakash ni ukwash wend tukutwish kujijamen yoziu.

¹⁷ Yisu yimwing turishining nakash nich milong yetu, ap mwamu tudandamedin kumulembil Yehova. Yisu mudi yiney, tukutwish kushadish ruchingej retu mudiay Yehova. Tukutwish kusambish kwiyipul anch Yehova ukat kutesh malembil metu ap kand anch tudi arund nend akin. Anch wasambish kwiyipul mwamu, ov, chom ik ufanyidina kusal? Mutu wa mulong ulondwilaku ou ukukukwash.