Yakamish Piur pa Ubaj

Alona ulondin anch: “Pinatesha chidjimin cha kubabesh chikash, rudung rambula nakash ni naya mau mulong wa kwiyep bomb. Pakwez kurutu yisadika niyakamisha nakash. Chading chom chiyimp mulong nading pol, padingap ndond ya diking. Kupwa, ap anch nading niyil mwi njil, nasambisha kudil ni natwishap kupim. Kwasuta chisu mulong wa kuninet. Chidjimin cha kubabesh chasambisha kand.”

Njit jidi chom chimwing cha ubaj. Chilakej, anch wajingunin anch ey ap muntu ukatina ukwetany mayej ma rufu chikutwish kukumesh mar nakash. Ni kudi antu akwau, wom mulong wa machuku ma kurutu ukutwisha kulet yakamish. Antu iyakamishin mwamu: ‘Ov, anetu ap anau, akez kushakam ching mu mangand ma njit, kujipan, kuyip kwa rinkind, ni makweta yipupu kushalijan?’ Ov, mutapu ik tukutwisha kurish nich yakamish mudi yiney?

Kwijik anch yom yiyimp yikushiken, mwin ‘manangu anch waman ubaj ukat kwez ukat kujingam.’ (Jinswir 27:12) Mutapu tukata kusal usu mulong wa kulam mujimbu nawamp, tukutwish kand kusal usu wa kuking manangu ni yovil yetu. Masengan ma chisum ni jinsangu jisu jizwila nich yom yiyimp yikat kwiwej ku yakamish yetu ni ya anetu. Kwipuk kuvurik yom ya chisum kurumburikinap anch twijap yom yisadikina. Kadiap Nzamb usadina anch yom ya chisum yikala mu manangu metu. Pakwez, tufanyidin kwizwish manangu metu “nich yom yakin, . . . yom ya katumb, . . . yidia zwang, . . . yikatishena.” Anch twasala mwamu, “Nzamb ukata kutwinkish chisambu” ukez kutwinkish chisambu mu manangu ni mu michim yetu.​—Filip 4:8, 9.

USEY WA MALEMBIL

Ritiy rakin ritukwashin kurish nich yakamish. Bibil utuyudin anch: “babalany, chakwel ukutwishany kulembil.” (1 Pita 4:7) Tukutwish kumwit Nzamb ukwash ni manangu ni kutakaman mulong wa kujijaman mu milong, nich kashinsh anch “ukat kututesh ku yom yawonsu tukata kumwit.”​—1 Yohan 5:15.

Bibil urumburil anch kadiap Nzamb, pakwez Satan ndiy udia “mwin kutakel wa mangand minam” ni anch “ngand ya kabuj yidi mu chikas cha Satan.” (Yohan 12:31; 1 Yohan 5:19, TMK) Chawiy lel, Yesu walonda uyakin patufundishay kulembil anch: “Tukamunina ku kuyip [kudiay muyimp, NWT].” (Mateu 6:13) Alona ulondin anch: “Chisu chawonsu chadjimang chidjimin cha kubabesh, Namwitang Yehova chakwel ankwasha kushinshikin piur pa yovil yam. Chikwau kand, nfumwam mukatish wantazukang ni twalembilang nend pamwing. Malembil mankwasha chakin kamu.” Chawiy chilondinay Bibil anch: “[Yehova, NWT] udi piswimp kudi awonsu akata kumutazuk Ndiy, awiy kamu akata kumutazuk ndiy nich win yakin.”​—Kuseng 145:18.

RUCHINGEJ RETU RA MACHUKU MA KURUTU

Mu Malejan mend ma pa Mukandu, Yesu wayifundisha in kwilejend kulembil anch: “Want wey weza.” (Mateu 6:10) Want wa Nzamb ukez kadiosh yakamish yin yawonsu chikupu. Kusutil kudiay Yesu, “Mwant wa Chisambu,” Nzamb ukez “kukatwish njit ni kwisudiel ya mangand.” (Isay 9:6; Kuseng 46:9) “Ndiy ukez kukatul milong ya antu a michid yawonsu . . . Kwikil muchid ukeza kapuril mpak ya musamun kurish ni muchid ukwau. . . . Kwikil muntu ap umwing ukez kuyakamish.” (Mike 4:3, 4) Majuku makweta musangar ‘makez katung yikumbu ni kushakamamu ayinau. Makez kadim yir ya mitond ya nviny ni kudia mabuj mau.’ (Isay 65:21) “Kwikil muntu ap kusu umwing ushicha mwi ngand yetu ukeza kinan kand mulong wa kuyel.”​—Isay 33:24.

Nlel unou, ap anch wasalap nchik, chikasiken kukangesh ‘yisu ya mar yakad kuchingejin’ ap kwiyep ku yom yikutwisha kusadik pa ndond yiyimp ni pa chisu chiyimp kand. (Mulej 9:11) Kwasutin kal yitot ya mivu yivud, njit, rukis, ni yipupu yidandamedin kujip antu nakash. Ruchingej ik rikwetau antu akad mulong amena mar ku yipupu yiney?

Uvud wa antu wikalap nchik upandikena, Nzamb uyij awonsu, akez kwikal kand aom. Katat, alel, pakwez adi mu manangu ma Nzamb, kushik dichuku dikezau “kateshau afu awonsu adia mwi nzay dizu dined, chad akez kuvumbuk kwikal kand aom.” (Yohan 5:28, 29) Palondinay piur pa divumbuk, Bibil utwinkishin kashinsh anch: “Ruchingej riner ridi mudi chom chikwadikina ku mupim, ridi rakin ni kudandamen.” (Hebereu 6:19) Ni Nzamb “watenchika kal dichuku dia kuyirumburish antu awonsu a pa mangand nich dirumburish ditentamina ku chikas cha muntu [Yesu] watonday kal.”​—Midimu 17:31.

Nlel, ap antu akata kumusangaresh Nzamb akez kurish nich yakamish. Mu kusadil yiyul, kumushejin Nzamb kusutil ku malembil, kukudish ritiy retu mu ruchingej ra Bibil piur pa machuku ma kurutu, Paul, Janet, ni Alona akat kurish nawamp nich yakamish. Mudi mwalonday Paul piur pa mulong winou anch: “Nzamb ndiy mwin kupan ruchingej. Nikat kumulembil akwinkishany chisambu ni musangar nakash kupandakan, mulong umwitiyijany ndiy.”—Rom 15:13.