Dandamen Kutongijokin pa Yom ya Muspiritu

1, 2. Yom ik yisadina anch tushalijana ni annam?

WONG wa muntu chidi chom chishimokishena. Chilakej, antu akweting ukaliweny wa kwilej rudim. Rudim ritukwashin kutang, kufund, kulond ni kwov yom tuteshina. Ritwinkishin kand ukaliweny wa kulembil ni kumushiman Yehova ni miminy. Yom yiney yawonsu yisadin anch tushalijana ni annam. In siyans katwishinap kutesh nawamp mutapu usadina wong wetu yom yiney yishimokishena.

² Ukaliweny wetu wa kusadin rudim chidi chipan chidiokila kudi Yehova. (Kuseng 139:14; Kujingunik 4:11) Watwinka kand chipan chikwau chisadina anch tushalijana ni annam. Ayitanga antu “mu chifu cha Nzamb.” Tukwet want ipau, kwawiy kulond anch, want ipau wa kukwat mipak ayinetu. Mwamu tukutwish kutond kusadin rudim mulong wa kumusadin ni kumushiman Yehova.​—Disambishil 1:27.

3. Chom ik chatwinkay Yehova chikata kusal anch twikala ni manangu?

³ Yehova watuleja mutapu wa kumusadin ni kumushiman pa kutwinkish Bibil. Bibil wa kabuj ap chikunku udiaku mu jindim 2 800 ni kusut. Anch twatongijokin pa yom yilondinay Bibil, tukutwish kusambish kutong mudi mutonginingay Nzamb. (Kuseng 40:5; 92:5; 139:17) Mwamu yitongijok ya Yehova yikusal anch twikala ni manangu ni kututwal ku mwom wa chikupu.​—Tang 2 Timote 3:14-17.

4. Kutongijok kurumburikin ik, ni yipul ik tukwisambina?

⁴ Kutongijok kurumburikin kushinshikin pa chom kanang ni kutong nakash ni nawamp kamu piur pa chom chinech. (Kuseng 77:12; Jinswir 24:1, 2) Tukat kutaninamu nakash anch twatongijokin pa yom twilejina piur pa Yehova ni Yesu. (Yohan 17:3) Mu mutu wa mulong winou tukwakul ku yipul ey: Mutapu ik tukutwisha kutang mu mutapu uswapela kutongijok? Yom ik tukutwisha kutongijokin? Ni chom ik chikutwisha kutukwash kutongijok chisu chawonsu ni kusanger kutongijok?

IKAL NI KASHINSH ANCH UTANIDINAMU MU DILEJAN DIEY

5, 6. Chom ik chikutwisha kukwash kuvurik ni kwov nawamp yom utangina?

⁵ Wamenap kal anch kudi yom yimwing ukutwisha kusal pakad kuyitongin, mudi kupim, kwend, ap kwendish nking? Cha ushon, ukutwish yisu yimwing kutang pakad kutongin. Pamwingap, ukutwish kusambish kutongin pa yom yikwau chisu utangina. Chom ik ukutwisha kusal mulong wa kwipuk chom chinech? Chidi cha usey kushinshikin pa yom utangina ni kutong piur pa kurumburik kwa yom yiney. Kupwa, anch washik kwinsudiel kwa paragraf ap kwa mutu wa mulong wa mukand, imanaku ni tongijokin pa yom watanga kal. Tongin piur pa yom wilejina ni ikal ni kashinsh anch uyiteshin nawamp.

⁶ In siyans ajingunin kal anch chiswapel kuvurik yom yimwing anch tuyitangin ni dizu dia piur. Sakatang wetu wij mwamu, ni chawiy chamulejay Joshua kutang mukand wa Yijil ni “kutongijokang,” kwawiy kulond anch kushinshikin pa yom utangina. (Tang Joshua 1:8.) Kutang Bibil ni dizu dia piur kukukwash kand kushinshik nawamp ni kuvurik swa.

7. Chisu ik chiwapidina kutongijokin pa Bibil? (Tal chipich cha kwinsambishil.)

⁷ Chitin kusal usu nakash mulong wa kutongijok ni kushinshikin pa yom twilejina. Chawiy lel, chiwapinap kutongijok chisu uziyina ni chisu udia pa ndond yiyimp, padia yom yiletina kampuw. Nfund a Kuseng David watongijokina uchuku chisu chalankay pa ulal. (Kuseng 63:6) Yesu, muntu uwanyidina, watonda ndond yiwamp mulong wa kutongijok ni kulembil.​—Luka 6:12.

YOM YIWAMP YIFANYIDINA KUTONGIJOKIN

8. (a) Yom ik tukutwisha kutongijokin? (b) Mutapu ik ukatay Yehova kwiyov anch twayilej antu akwau piur pend?

⁸ Kuwejinaku yom tutangina mu Bibil, kudi kand yom yikwau tukutwisha kutongijokin. Chilakej, anch waman yitang yiwamp ya Yehova, iman ni iyipula anch, ‘Yom yiney yinfundishin ik piur pa Yehova?’ Yitongijok yiney yikukubachik kumujikitish Yehova mu malembil. Chikwau kand, anch udi pamwing ni antu akwau, ukutwish kuyilej yom yiney. (Kuseng 104:24; Midimu 14:17) Yehova ukat kutesh ni kusanger anch twatongijok, twalembil ni anch twayilej antu akwau piur pend. Bibil utukasikeshin anch: “kudi mukand wafundau yivurikish ya antu amwovila [Yehova, NWT] wom, ni kumulimish, ni [kutongijok] mulong wa dijin diend.”​—Malakiy 3:16.

9. (a) Chom ik chamulejau Timote kudi Paul kutongijokin? (b) Chom ik tukutwisha kutongijokin patwirijekina mulong wa mudimu wa kulejan?

⁹ Kambuy Paul wamuleja Timote kutongijokin pa mutapu wend wa kulond, wa yisalijok, ni wa kulejan kudi antu akwau. (Tang 1 Timote 4:12-16.) Niyey ukutwish kutongijokin pa yom yiney. Chilakej, ufanyidin kwitekin chisu cha kutongijokin paurijekina dilejan dia Bibil. Tongin pa mwin kwilej wey ni sal usu wa kukimb yipul ap yilakej yikumukwasha kuya kurutu. Anch warijek dileja diey dia Bibil mu mutapu winou, ritiy rey rikukasikan ni ukwikal mulej muwamp wa Bibil ukweta mushiku. Ukutaninamu kand anch watongijok kurutu kwa kusal mudimu wa kulejan. (Tang Esidera 7:10.) Pamwing ap ukutwish kutang shapitre wa mu mukand wa Midimu chakwel akukwasha kwikal nich mushiku mu mudimu wa kulejan. Ukutwish kand kutongijokin pa verse wa Bibil ukusadina ap uwatenchikang mulong wa kupan mikand. (2 Timote 1:6) Tongin piur pa antu a mu teritwar ni pa yom ukulonda yikutwisha kuyisangaresh. Anch witenchik mu mutapu winou, ukushiken ku kusadin nawamp Bibil mulong wa kupan uman kudi antu akwau.​—1 Korint 2:4.

10. Yom ik yikwau yiwamp tukutwisha kutongijokin?

¹⁰ Chom ik chikwau ukutwisha kand kutongijokin? Anch ufundining yom chisu cha diskur dia patok, cha yitentam, itekina chisu cha kuchirikin yom wafunda. Anch wasal mwamu, iyipula anch: ‘Chom ik nileja kal piur pa Dizu dia Nzamb ni dirijek diend?’ Ukutwish kand kutongijokin pa jinsangu ja nimero mwawonsu wa gazet wa Chinong cha Kalam ni Réveillez-vous ! ni yijikish ya chitentam chasutina. Anch watang Annuaire, imanaku kupwa kwa kutang uman, ni tonginap, kupwa el uman winou ukushika ku muchim wey. Anch utangin mikand yetu, ukutwish kutek mifund pa yitongijok ya usey ap kufund kuns kwa paj. Kusal mwamu kukukwash chisu wirijekina mulong wa kumuchirikin muntu, kusal mudimu wa ukafung, ap diskur. Cha usey nakash, anch wiman ni watongijokin pa yom utangina, el yom yiney yikushika ku muchim ni itekina chisu cha kumujikitish Yehova mu malembil mulong wa yom yiwamp wileja kal.

TONGIJOKIN PICHUKU PICHUKU PA DIZU DIA NZAMB

11. Buku ik udia wa usey nakash tufanyidina kutongijokin, ni kusal mwamu kukutukwash mutapu ik? (Tal kand mazu ma kwinshin.)

¹¹ Chakin kamu, Bibil udi buku wa usey nakash tufanyidina kutongijokin. Pakwez chikwikal nchik anch dichuku dimwing ukwetap Bibil?a (Tal mazu ma kwinshin.) Kwikil muntu ukutwisha kukukangesh kutongijokin pa yom ulamina mu manangu, mudi ma verse ap miminy ya Want ukatining. (Midimu 16:25) Mwiku wa Nzamb ukukwash kuvurik yom wileja, yikukukwash kushal ushinshamena.​—Yohan 14:26.

12. Mutapu ik ukutwisha kurijek pichuku pichuku kutang kwey kwa Bibil?

¹² Mutapu ik ukutwisha kurijek pichuku pichuku kutang kwey kwa Bibil? Machuku mamwing ukutwish kutang ni kutongijokin pa kutang kwa Bibil kwa pa rubing mulong wa Shikol ya Mudimu wa Uteokras. Machuku makwau ukutwish kutang mukand wa Mateu, Marko, Luka, ni wa Yohan ni kutongijokin pa yom yasalay ni yalonday Yesu. (Rom 10:17; Hebereu 12:2; 1 Pita 2:21) Tukwet kand buku urumburila yom ya mwom wa Yesu. Buku winou ukutwish kukukwash kutaninamu nakash chisu utangina Jinsangu jiwamp jinying.​—Yohan 14:6.

MULONG WAK LEL KUTONGIJOK KUDI KWA USEY?

13, 14. Mulong wak chidi cha usey kudandamen kutongijokin piur pa Yehova ni Yesu, ni chinech chikutubachik kusal ik?

¹³ Kutongijokin piur pa Yehova ni Yesu kukutwish kumukwash muntu kwikal mwin Kristu uswila ni kulam ritiy rikash. (Hebereu 5:14; 6:1) Muntu ukata kusutish chisu chikemp mulong wa kutongin piur pa Nzamb ukuyipish pakemp pakemp urund wend ni Yehova ap kuujip kamu. (Hebereu 2:1; 3:12) Yesu watubabesha anch, ang tuteshinap ap twitiyinap Dizu dia Nzamb ni “muchim uwamp wa kuziyil,” ‘tukudilamap’ kwetu. Pakwez chikutwish kutuswapel kuya mwi njil ya “yakamish, ni mapit, ni misangar ya mangand yikat[a] kuyikangesh kukul.”​—Luka 8:14, 15.

¹⁴ Chawiy lel, tudandamenany amboku kutongijokin pa Bibil ni kushiken ku kumwijik Yehova nawamp. Chinech chikutubachik kwimburij kamu mikadil yend ni untu wend. (2 Korint 3:18) Tukutwish kudandamen kwilej nakash piur pa Tatukwetu wa mwiur ni kumwimburij chikupu. Chidi chisend chiwamp mud ik tukweta!​—Mulej 3:11.

15, 16. (a) Mutapu ik utanidinamu mu kutongijokin piur pa Yehova ni Yesu? (b) Mulong wak chikasikening yisu yimwing kutongijok, pakwez mulong wak tufanyidin kudandamen kusal mwamu?

¹⁵ Kutongijokin piur pa Yehova ni Yesu kukukwash kulam mushiku wey mulong wa uyakin. Mushiku wey ukuyikasikesh akadivar ney ni antu utanina mu mudimu wa kulejan. Anch watongijokin pa yom yakusadinay Yehova pa kupan mulong weyey chakupesh cha difut dia Yesu, ukudandamen kuman ni usey urund wey ni Nzamb. (Rom 3:24; Jakobu 4:8) Mukadivar Mark wa mu Afrik du sud wasala mivu yisatu mu rukan mulong wa ritiy rend ulondin anch: “Kutongijok kudi mudi kusal weny usangareshina. Anch watongijokin nakash pa yom ya muspiritu ukujingunin kand yom yisu piur pa Nzamb wetu Yehova. Yisu yimwing anch niyov uziyina ap wiyakamishina piur pa machuku ma kurutu, nikat kunonang Bibil ni kutongijokin pa verse wa Bibil. Kupwa nikat kwiyovang pee.”

¹⁶ Mwom mu mangand mu mangand minam wizwil too ni yom yiletina kampuw, chawiy lel chikasiken kutan chisu cha kutongijokin pa Bibil. Patrick, mukadivar udia mu Afrik, ulondin anch: “Manangu mam madi mudi mushet wa mesaj wizwila ni jinsang kushalijan, jinikatina ni jinakad kukat, jinifanyidina kurijek dichuku diawonsu. Pinikata kukimb yidia mu manangu mam, nikat kutanang ‘yitongijok yakamishena,’ ni nikat kumulembil Yehova mulong wa yom yiney kurutu kwa kutongijokin nawamp. Ap anch nasal mwamu chikutwish kwit chisu chikemp kurutu nisambisha kutongijokin pa yom ya muspiritu, nisejining kamu piswimp ni Yehova. Yom yiney yikat kwinkwashang kutesh nawamp uyakin.” (Kuseng 94:19) Mwaning, tukutaninamu mu mitapu kushalijan anch twatang ni twatongijokin pichuku pichuku piur pa Bibil.​—Midimu 17:11.

MUTAPU IK UKUTWISHA KUTAN CHISU?

17. Mutapu ik ukutwisha kutan chisu cha kutongijok?

¹⁷ Antu amwing akat kulankang pamanch mulong wa kutang, kutongijok, ni kulembil. Akwau akat kusalang mwamu chisu cha yakudia ya pamanch. Pamwingap kudi ey, urel ap pa kulal chawiy chisu chiwamp cha kutang Bibil. Amwing akatining kutang Bibil pamanch ap kand kurutu kwa kulal. (Joshua 1:8) Chom cha usey chidi ‘kusadin nawamp chisu chey,’ kwawiy kulond anch kwitekin chisu mulong wa yom ya usey mudi kutongijokin pichuku pichuku piur pa Dizu dia Nzamb.​—Efes 5:15, 16.

18. Chom ik chikaninay Bibil kudi awonsu akata kutongijokin pichuku pichuku piur pa Dizu dia Nzamb ni kusadin yom yilejinau?

¹⁸ Bibil ukanin anch Yehova ukuyiyukish awonsu akata kutongijokin pa Dizu diend ni kusal usu wa kusadin yom yilejinau. (Tang Kuseng 1:1-3.) Yesu walonda anch: “Ayuk kwau antu akata kutesh dizu dia Nzamb ni kudisadil!” (Luka 11:28) Pakwez cha usey nakash, kutongijokin pichuku pichuku piur pa Dizu dia Yehova kukutukwash kusal yom yimutumbishina. Anch twasal mwamu, Yehova ukutufut kudiosh nlel ni kutwink mwom wa chikupu mwi ngand yisu.​—Jakobu 1:25; Kujingunik 1:3.