Kutongijokin mu Malembil—Kudi Kwa Usey Kudi Atushalapol a Mushiku
1. Ov, chom ik chamukwasha Yesu kwipuk kwikal ukwatiken kusut midimu wend wa pakampwil?
1 Yesu wasutishanga chisu chend ni kuyok antu adinga ayej pamwing ni kuyidiosh ayilembil. Pamutanau kudi in kwilej end dichuku dikwau, awiy alonda anch: “‘Antu awonsu akat kukukimb,’” yikasikesha chakwel adandamen midimu yau ya usu. Pakwez, Yesu kadingap ukwatikena nich midimu yikwau kusut mudimu wend wa pakampwil wa kulejan rusangu ruwamp. Ndiy wakula anch: “‘Tufanyidin kuya ku mal makwau ma piswimp, chakwel nikayirumburil kand niyau mazu ma Nzamb. Wawiy mulong unezila.’” Ov, chom ik chamukwasha Yesu kudandamen rutong rend? Chakusambish ndiy wayanga kulembil ni kutongijokin pa mifund. (Mar. 1:32-39) Mutapu ik ukutwisha kutongijokin pa malembil kutukwash chakwel twikal in kulejan a mushiku?
2. Ov, chom ik tukutwisha kushinshikin chakwel chitukwasha kulam mushiku mu mudimu wa kulejan?
2 Kutongijokin pa Chom Ik? Yesu wamana anch antu ading “aziyil ni kujilijil mudi amikoku akad kafung.” (Mat. 9:36) Chawiy chimwing kand, tukutwish twamekesh mu mutapu ik antu avud uswiridinau rusangu ruwamp. Tufanyidin kutal bil yom yitufanyidina kusal swa pa yisu yimwing. (1 Kor. 7:29) Tukutwish twatongijokin pa midimu ya Yehova ni ngikadil jend, chisend chetu cha kwikal Atuman a Yehova, ni dipit dia usey dia muspiritu twilejina kusutil ku Dizu dia Nzamb diakadiau kwijik ni katat kudi antu a mu teritwar wetu.—Kus. 77:11-13; Isay 43:10-12; Mat. 13:52.
3. Ov, chisu ik tukutwisha kutongijokin pa mifund?
3 Chisu Ik Tukutwisha Kutongijokin? Mudi mwasalay Yesu, antu amwing ayiling kwindond kudia zoong. Antu akwau atanining ndond yipandakena kuwap ya kutongijokin pa chisu cha urel kurutu kwa kulangal tulu. (Dis. 24:63) Ap anch tukwet program ukwatikena, tukutwish twatan chisu cha kutongijokin pa mifund. Antu amwing asadining mwamu pa chisu chidiau mu weny. Antu akwau asadining pa yisu ya kudia mu chisambu pakad masok. Antu avud amening anch kushinshikin mifund kurutu kwa kuya mu mudimu wa kulejan, mu chisu chiswimp, kuyikwashining chakwel alejan nich mushiku ni kutakaman.
4. Ov, mulong wak tufanyidina kutongijokin mu malembil?
4 Kutongijokin mu malembil kukez kutwinkish maswir majim ma kumusadil Yehova, kutukwash kuman difukwil dietu mutapu didia ni usey ujim mu mwom wetu, ni kukasikesh mupak wetu wa kudandamen mu mudimu wa kulejan. Mwant wa Mudimu wa Nzamb, Yesu, wataninamu mu kutongijokin mu malembil, ni chawiy chimwing kand ni yetu tukez kutaninamu.