MASHAKAMIN MA MWIN KRISTU

Ikal ni Musangar mu Kulejan Rusangu Ruwamp

Ov, umen anch yisu yimwing mudimu wa kulejan ukukasikedining? Antu avud pakach petu akwakul anch mwaning ku chipul chinech. Mulong wak? Pamwing ap ukat kurish ni kulik kusanger ni rikis ra antu a mu teritwar ap ukweting wom wa kwambamb nau antu wakad kwijik. Chakin kamu, yom yiney yikutwish kukepish musangar wetu. Pakwez, tumwifukwidil Nzamb wa musangar ukatina anch tumusadin nich musangar. (Kus 100:2; 1Tm 1:11) Mayingishin ik masatu masadina anch tusangera mudimu wa kulejan?

Chakusambish, tulejen uruu wa ruchingej. Ap anch nlel unou antu avud kakwetap ruchingej, tukutwish kwizwish michim yau ni ‘rusangu ruwamp ra yom yiwamp.’ (Is 52:7) Pakwez rusangu ruwamp ra Want wa Nzamb rikutwish kand kutuletin musangar nakash. Kurutu kwa kuya mu kulejan, tongijokin piur pa yiyukish yikuletau kudi Want wa Nzamb panap pansh.

Cha kaad, rusangu ruwamp tulejena riyikwashining antu kutaninamu ku mujimbu ni mu spiritu. Akat kwilej mutapu wa kulik yisalijok yiyimp ni kwikal ni ruchingej ra kutambul mwom wa chikupu. (Is 48:17, 18; Ro 1:16) Tukutwish kutongin anch udi mudimu wa kukimb ni kuyipandish antu. Ap anch antu amwing kakatinap kupand, etu tukudandamen kukimb antu akatina kupand.—Mt 10:11-14.

Cha kasatu ni cha usey nakash, mudimu wa kulejan ukat kumutumbish Yehova. Ukwatin nich usey nakash mudimu wetu wa kupan uman. (Is 43:10; Heb 6:10) Chawiy, ukat kutwinkish spiritu wend utumbila mulong wa kuwanyish mudimu winou. Komb lel, mwita Yehova chakwel akwinka musangar, udia chikunku cha dibuj dia spiritu. (Gal 5:22) Ku ukwash wend, tukutwish kuwin yakamish ni kulejan nich mushiku. (Mid 4:31) Chawiy, chikalap nchik mutapu ukwakulau antu a mu teritwar wetu, tukwikal kamu ni musangar mu chisend chetu cha kulejan.—Eze 3:3.

Yipich yaad yishalijangena yilejan mwikadil kushalijan mulong wa mudimu wa kulejan—cha musangar ni chakad musangar — Mipak ik ukatina kwikal nich mu mudimu wa kulejan? Mutapu ik ukutwisha kumekesh musangar?

TAL VIDEO ULONDINA ANCH RETROUVE DE LA JOIE GRÂCE À L’ETUDE ET À LA MÉDITATION, NI KUPWA AKUL KU YIPUL YILONDWILAKU EY:

Mulong wak tufanyidin kupan usey mu kwilej kwetu kwa mu spiritu, ap anch tukat kusutish asaa avud mu kulejan ngond ni ngond?
Mu mutapu ik tufanyidina kumwimburij Mary?
Chisu ik ukata kwitekin mulong wa kutongijokin pa Dizu dia Nzamb?
Yom ik yikata kukuletin musangar chisu ulejening rusangu ruwamp?