Kimb Ukwash Mulong wa Kutesh Bibil

Tong bil anch uyil mwi ngand ya wingendj kapamp key ka kusambish. Mwinimwa, watanijan ni antu, mikadil, yakudia, nfalang, yiwakad ey kwijidin. Chakin, ukutwish kunenganan.

Ukutwish kwiyov mutapu umwing anch watang Bibil kapamp ka kusambish. Uchirikin mwi ngand ya pakuru yimekena mudi ya wingendj kudi ey. Mwinimwa, wasankanijan ni antu atazukinau anch in Filistin, watan mikadil yiwakad kwijidin mudi ‘kwapul yidjal,’ ap wilej piur pa yakudia yitazukinau anch mana ni nfalang yitazukinau anch drachme. (Kubudik 16:31; Joshua 13:2; 2 Samwel 3:31; Luka 15:9) Yawonsu yiney yikutwish kukurumbangesh. Mudi mwin kwendangan mwi ngand ya wingendj, ov, ukukatishap kutambul ukwash kudi muntu ukutwisha kukurumburil yom?

UKWASH CHISU CHA PASAK

Kudiosh chisu chasambishau kufund mifund yitumbila mu yitot ya mivu 16 K.C.C., kwading ukwash chakwel antu atesha mifund. Chilakej, Moses, muntu wa kusambish watakela muchid wa Isarel, “wasambisha kurumburil” yafundau.—Kuvurik Yijil 1:5.

Kwading in kufundish Mifund awanyidina kupwa kwa yitot ya mivu. Mu muvu wa 455 K.C.C., chisak chijim cha in Yuda, pamwing nau an akumanganang pamwing pibur mu musumb wa Yerusalem. In kufundish Bibil ading pinipa mulong wa ‘kutang ni dizu dia piur mukand [utumbila].’ Pakwez asala yom yivud. “Ading ni kukarumun ni kwovakesh nawamp mazu matangau.”—Nehemiy 8:1-8.

Kupwa kwa yitot yitan ya mivu, Yesu Kristu niyend wipana mu mudimu winou wa kufundish. Chawiy, antu ading amwij nakash mudi mulej. (Yohan 13:13) Wafundisha yisak ya antu, ni muntu panrend. Chisu chimwing, wambamba ni chisak cha antu avud, palonday Diskur dijim dia pa Mukandu, ni “yisak ya antu yashimoka [mulong wa] malejan mend.” (Mateu 5:1, 2; 7:28) Angond akemp kwinsambishil kwa muvu wa 33 C.C., Yesu wambamba nau in kwilejend aad padingau mwinjil mulong wa kuya mu ul wa piswimp ni Yerusalem, ‘wayirumburila Mifund.’—Luka 24:13-15, 27, 32.

In kwilej a Yesu ading niyawiy in kufundish Dizu dia Nzamb. Chisu chimwing, mukurump umwing wa mu Etiopi wading kutang yom yimwing mu Mifund. Mwin kwilej Filip wamusejina ni wamwipula anch: “Ov, wovil kurumburik kwa yom yiutangina?” Mwin Etiopi wamwakula anch: “Ov, nikutwish nchik kwov anch kwikil muntu mwin kwirumburil?” kupwa Filip wamurumburila kurumburik kwa mifund yiney.—Midimu 8:27-35.

UKWASH UPANINAU NLEL

Chilik chimwing ni alej nau in kufundish Bibil a pasak, nlel Atuman a Yehova ipanin mu mudimu wa kufundish Bibil mu jingand 239 pa mangand mawonsu. (Mateu 28:19, 20) Rubing ni rubing, akat kuyikwash antu ma miliyon chidivu ni kusut chakwel atesha Bibil. Avud pakach pa antu inay adiokil mu jindond mwakad in Kristu. Malejan minam mading makad kufut nfalang ni makutwish kusadikin ku chikumbu ap ndond yikwau. Antu akwau akat kwilej kusutil telefon ap video, akat kusadil ordinater ap yom yikwau ya tekinoloji.

Mwipula amboku Kaman wa Yehova mwawonsu mulong wa kwijik yom yivud piur pa mutapu ukutwisha kutaninamu mu kwilej. Ukujingunin anch, pa ndond pa kwikal buku ukasikena kutesh, Bibil udi ‘uwanyidina kulejan nich, ni kukand nich, kupup nich, ni kuyilej nich antu mu kutentam,’ chakwel wikala “uwanyidina ni kwikal kand nich ukash wa kusal midimu yawonsu yiwamp.”—2 Timote 3:16, 17.