Njil Yiwamp ya Kwakan—Yidi ya Usey!

1. Milong ik yadingau nich in Kristu a mu mivu chitot ya kusambish?

CHISU chimwing pakach pa muvu wa 62 ni wa 64, kambuy Pita wafunda mukand kudi “[angendj] apalangena mu yibar ya ngand ya Pont, ni ya Galatia, ni ya Kapados, ni ya Aziy, ni ya Bitiniy.” (1 Pita 1:1) Akadivar nau anambaz inay adiokala ku jindond kushalijan. Ading arishin ni “ruteng ra kasu,” ap kuzengol ni ading akwet kuswir kwa kuyikasikesh ni kuyitakel. Ading kand ashich pa chisu cha ubaj nakash. Pita wafunda anch: “Disudiel dia yom yawonsu didi piswimp.” Mwinshin mwa mivu dikum, afanyina kushesh musumb wa Yerusalem. Yom ik yafanyina kuyikwash in Kristu adia ndond yawonsu chakwel apanda mu yisu yiney ya mar?—1 Pita 4:4, 7, 12.

2, 3. Mulong wak Pita wayikasikesha akadivar nend kwikal in kwakan? (Tal chipich cha kwinsambishin.)

² Pita wayikasikesha akadivar nend anch “akijanany amwing ni akwau.” (1 Pita 4:9) Dizu dia Grek dikarumwinau anch ‘kwakan’ dirumburikin anch “kumekesh uwamp mulong wa angendj.” Pakwez Pita wading uyikasikeshin akadivar nau anambaz nend kwakijan “amwing ni akwau,” ap anch ading ijikijadin amwing ni akwau ni ading asadin yom pamwing. Kwikal in kwakan kwafanyina kuyikwash mutapu ik?

³ Kwafanyina kuyisejish piswimp pamwing. Chidi nchik piur pey? Ov, uvurikin chisu cha musangar wasutisha pakutazukau kudi muntu kanang ku chikumbu chend? Ni anch wamutazuk muntu ku chikumbu chey, chinech chikat kusal anch wikalany pamwing. Mutapu uwamp wa kuyijik akadivar nau anambaz udi wa kuyak. In Kristu ading ashicha pa chirung cha Pita ading akwet kuswir kwa kwikal pamwing umwing ni mukwau mulong milong yading yidandamedin kwikal yikash. Niyetu tufanyidin kusal mwamu mu “machuku ma kwisudiel” minam.—2 Timote 3:1.

4. Yipul ik tukwisambina mu mutu wa mulong winou?

⁴ Mu mitapu ik tukutwisha kwikal in kwakijan “amwing ni akwau”? Yom ik yikutwisha kutukangesh kwikal in kwakan ni mutapu ik tukutwisha kuswimp? Yom ik yikutwisha kutukwash kwikal angendj awamp?

MITAPU YA KWIKAL IN KWAKAN

5. Mutapu ik tukutwisha kwikal in kwakan ku yikumangan yetu ya win Kristu?

⁵ Ku yikumangan: Yehova ni dirijek diend ditutazukin ku yikumangan. Tukatin anch muntu win mwawonsu ukumangena ku yikumangan yetu iyova nawamp, pakampwil antu asu. (Rom 15:7) Antu inay niyau adi angendj a Yehova, chawiy tufanyidin kusal anch iyova nawamp, chikalap nchik mutapu udiau ap mutapu udjadinau. (Jakobu 2:1-4) Anch waman anch ngendj udi amwinend, ukutwish kumutazuk kushakam pamwing niyey? Ngendj winou ukwikal mwin kujikitish anch wamukwash kwijik yom yikusadika chisu cha yikumangan ni mutapu wa kutan maverse matanginau. Winou udi mutapu uwamp wa ‘kulondul njil ya kwakan.’—Rom 12:13.

6. Anany tufanyidina kamu kwak nakash?

⁶ Mulong wa yisakol ap ruku: Antu a pasak amekeshang kwakan mu kuyitazuk antu akwau ku yikumbu yau mulong wa yakudia, mulong wa kumekesh anch akatin kwikal arund ni mu chisambu. (Disambishil 18:1-8; Ankalansambu 13:15; Luka 24:28-30) Anany tufanyidina kamu kwak nakash? Adi akadivar nau anambaz adia mu chikumangen chetu. Mulong mangand minam madandamedin kuyip, tukwikal ni kuswir kwa akadivar nau anambaz netu ni kwikal arund nau ashinshamena. Mu muvu wa 2011, Chisak Chitakedila chaswimpa chisu cha Dilejan dia Chinong cha Kalam mulong wa dijuku dia Betel dia États-Unis kuchidiosh pa saa ya 18:45 mulong wa kuchitek pa saa ya 18:15. Mulong wak kuswimp kwinoku? Chijikish chalonda anch chikutwish kuyiswapel antu adia ku Betel kwitiy ni kumekesh kwakijan umwing ni mukwau anch yikumangan yapwa pa chisu. Ma biro makwau ma mitiy masala mwamu. Chinech chayikwasha antu adia mu dijuku dia Betel kwijikijan umwing ni mukwau.

7, 8. Mutapu ik tukutwisha kwikal in kuyak angendj ezina kusal madiskur?

⁷ Yisu yimwing akadivar a yikumangen yikwau, atulam a munyingumuku, ap atutum a Betel akutwish kusal diskur mu chikumangen chetu. Tukutwish kusadin yisu mudi yiney mulong wa kuyak akadivar inay? (Tang 3 Yohan 5-8.) Mutapu umwing tukutwisha kusal mwamu udi wa kuyitazuk ku chikumbu chetu mulong wa kudia nau yisakol ap ruku.

⁸ Nambaz umwing wa mu États-Unis uvurikin anch: “Mu kusut kwa mivu, am ni nfumwam twading ni mutapu wa kuyak akadivar avud ezang kusal madiskur nau akajau ku chikumbu chetu.” Nambaz winou wiyova anch mambamb mawonsu makasikesha ritiy rau ni chading chisu cha musangar nakash. Ulondin anch: “Kand kal twinanap mulong wa kusal mwamu.”

9, 10. (a) Anany akutwisha kushakam netu chisu chilemp? (b) Ov, antu akweta yikumbu yikemp akutwish kukwash? Let chilakej.

⁹ Angendj akutwisha kulab: Pakur, kwading chaku cha kuyinkish angendj ndond ya kushakam. (Job 31:32; Filimon 22) Nlel, tufanyidin kand kusal mwamu. Atulam a munyingumuku akweting kuswir kwa ndond ya kushakam chisu chendidinau yikumangen. Chinech chikutwish kand kwikal mwamu kudi ansand a ku ma shikol ma uteokras ni in kwipan a kwikatin asadina mu mudimu wa kutung. Chad chikwikal nchik piur pa antu akweta yikumbu yabumwokina kupwa kwa mar ma chitangil? Akutwish kwikal ni kuswir kwa ndond ya kushakam kushik ni pakutungirilau yikumbu yau. Tufanyidinap kutong anch ching antu akweta yikumbu yijim awiy akutwisha kukwash. Akutwish kwikal akwashin kal kand mwamu yisu yivud machuku ma kwinyim. Ov, ukutwish kumukwash muntu ndond ya kushakam ap anch chikumbu chey chidi kwau chikemp?

¹⁰ Mukadivar umwing wa mu Corée du Sud uvurikin chisu chashakamay pamwing ni ansand ading ku mashikol ma uteokras. Ufundin anch: “Kwinsambishin nidjidjeka mulong twading twatijan kal ni mukajam kand kal palaba ni twading tushich mu chikumbu chikemp. Pakwez kushakam pamwing nau asand a shikol inay kwading kwa musangar nakash. Mulong twading antu asu mu uruw, twatwisha kuman mutapu ukutwishau ambay a uruw kwikal ni musangar anch amusadin Yehova ni kulondul mipak ya mu spiritu pamwing.”

11. Mulong wak antu adia asu mu chikumangen chen akwet kuswir kwa kuyak?

¹¹ Akadivar nau anambaz asu adia mu chikumangen: Akadivar nau anambaz amwing ap majuku makutwish kushemunikin mwi ndond yen kudiokal ku yikumangen yikwau. Akutwish kwez mulong chikumangen chen chikwet kuswir kwa ukwash. Ap akutwish kwikal ayibol atuminau mu chikumangen chen. Kwinoku kudi kuswimp kujim mu mwom yau. Afanyidin kusal yom kukwatijan ni teritwar musu, chikumangen chisu, pamwing ap kand dizu disu ni yaku yisu. Ov, ukutwish kuyitazuk mulong wa kudia nau yisakol ap ruku ap kuya nau kutal ndond kanang? Chinech chikuyikwash kwikal nau arund asu ni kusal yom kukwatijan ni mashakamin masu.

12. Yom ik yashikena yimekeshina anch chitinap kwau kurijek yom yivud mulong wa kwakan?

¹² Ukwetap kuswir kwa kurijek yom yivud mulong wa kwakan. (Tang Luka 10:41, 42.) Mukadivar umwing uvurikin chom chashikena chisu chikalay mishoner ndiy ni mukajend. Ulondin anch: “Twading ansand, akad kwijik yom yivud ni twatongang nakash kwol kwetu. Urel umwing mukajam watonga nakash kwol kwetu ni usu nasala mulong wa kumukwash wading wa chamwamu. Kupwa, pamanch piswimp ni saa ya 7:30, twatesha akat kukokal ku chis. Mwin kwilej umwing wa Bibil mband watuletina malal ma orange masatu. Weza mulong wa kuyak amishoner asu. Twamuleja kwandam mu chikumbu ni twamwinkisha dikopu dia mem. Kupwa twasala chay ni ma shokola. Twadingap kwetu twija Swahili, niyend kadingap kija dizu dia Inglish.” Mukadivar ulondin anch yom yiney yayikwasha kuta urund nau akadivar a ndond yiniya ni kwikal nich musangar.

KANGAL WALIK CHOM AP CHIMWING CHIKUKANGESHA KWAKAN

13. Kwakan kukukwashin mutapu ik?

¹³ Widjidjekinap kal mulong wa kwakan? Anch chidi mwamu, washadisha chisu chiwamp cha musangar ni cha kuta urund ukudandamena chikupu. Kwikal mwin kwakan udi mutapu uwamp nakash wa kulik kwikal ni yovil ya kwikal amwiney. Chawiy mulong wak antu amwing akat kwidjidjek kwakan? Kudi mayingishin makemp.

14. Yom ik tukutwisha kusal anch tukwetap chisu ni usu wa kumekesh ap kwitiy kwakan?

¹⁴ Chisu ni usu: Antu a Yehova akwatiken nakash ni akwet yisend yivud. Amwing akutwish kuman anch kakwetap chisu ap usu wa kwikal mwin kwakan. Anch chidi mwam, ukutwish kuswimp program wey chakwel utwisha kumekesh ni kwitiy kwakan. Chinech chidi cha usey mulong Bibil utukasikeshin kwikal in kwakan. (Hebereu 13:2) Chawiy kwakijan chidi chom chiwamp nakash cha kusal. Pakwez mulong wa kumekesh kwakan, tufanyidin kusutish chisu chikemp mu kusal yom yakad usey nakash.

15. Mulong wak antu amwing akutwish kwiyov anch kakutwishap kwikal in kwakan?

¹⁵ Mutapu wiyovila amwiney: Watonginap kal kwakan pakwez wiyov yisu yimwing anch ukutwishap kusal mwamu? Pamwing ap wovil usany ni wiyakamishin anch angendj ey kakwiyovap nawamp. Ap pamwingap ukwetap nfalang ni wakamin anch ukutwishap kuyinkish angendj ey yom yikatau kuyinkish kudi akadivar nau anambaz akwau. Pakwez vurik anch chikumbu chifanyidinap kwikal cha ufun nakash mulong wa kwak angendj. Angendj akwov musangar anch chikumbu chey chinangin ni uchirijekin nawamp ni anch ukwet chisambu.

16, 17. Yom ik ukutwisha kusal anch wiyakamishin piur pa kwak angendj?

¹⁶ Anch wiyakamish piur pa kwak angendj, udiap amwiney. Mukurump umwing wa chikumangen wa mu Grande-Bretagne ulondin anch: “Kukutwish kwikal yakamish kanang mu kwirijek mulong wa kwak angendj. Pakwez anch yom yawonsu yikwatijadin ni kumusadin Yehova, kutaninamu ni musangar yidiokila ku kwak angendj yisutinamu yakamish yawonsu. Nasangera kushakam kwam pamwing nau angendj mulong wa kuna nau kafe ni kwambamb nau.” Chiding chiwamp nakash kuyibangin angendj. (Filip 2:4) Antu avud akat kusangerang kwambamb piur pa yom yayishikena mu mwom wau. Tukutwish kutesh yom yijau ching anch twambamb nau pamwing. Mukurump mukwau wa chikumangen niyend ufundin anch: “Kuyitazuk arund a mu chikumangen kwankwasha kuyitesh nawamp ni kwanginkisha chisu cha kuyijik nawamp, pakampwil mutapu washikenau kwijik uyakin.” Anch wayibangin kamu nakash angendj, ukutwish kwikal nich kashinsh anch muntu win mwawonsu ukusangar.

¹⁷ Nambaz udia chibol wakang yisu yivud ansand a ma shikol ma uteokras kushalijan walonda anch: “Kwinsambishin niyakamishang mulong chikumbu cham chading chikemp ni mwading yom yikur. Mband wa mulej umwing wa kushikol yiney wansangaresha nakash. Walonda anch chisu chading chisadinay ndiy ni nfumwend mu mudimu wa kwendangan, asutishang mbing jiwamp mu kushakam pamwing nau antu a mu spiritu akad kwikal ni yom yivud ya ku mujimbu pakwez akweta chitongijok chimwing mudi awiy—kumusadin Yehova ni kwikal ni mwom uswapela. Chinech chanvurisha yom yalondangay maku chisu twading an akemp anch: ‘Chidi chiwamp kudia yom ya mayij kusu anch kudi rukat.’” (Jinswir 15:17) Chiwapinap kwau kwiyakamish, mulong chom chidia cha usey kudi kwau kuyimekeshin angendj rukat.

18, 19. Mutapu ik kwikal in kwakan kukat kutukwash kupandakan yovil yiyimp piur pa antu akwau?

¹⁸ Mutapu uyimena antu akwau: Ov, kudi muntu wakwovishina nayimp mu chikumangen chen? Anch usadinap usu wa kupandakan yovil yiyimp yiney, yikuswimpap kwau. Ukutwishap kumutazuk muntu kanang ku chikumbu chey anch umukatinap. Ap pamwing ap kudi muntu wakwovisha nayimp pakur ni chikukasikedin kuvuramen.

¹⁹ Bibil ulondina anch ukutwish kuwapish urund nau antu akwau, ap kand nau akankuny ney anch udi mwin kwakan. (Tang Jinswir 25:21, 22.) Anch wamutazuk muntu kanang ku chikumbu chey, chikutwish kukuswapel kupandakan yovil yiyimp ni kukudish urund wa chisambu ni ndiy. Ukutwish kusambish kuman mikadil yimwing yiwamp mudiay ndiy mudi yamanay Yehova chisu chamupwitay ku uyakin. (Yohan 6:44) Anch rukat rakubachik kumutazuk muntu kanang pakad ndiy kuchingejin, dikutwish kwikal disambishin dia kusambish urund uwamp. Mutapu ik ukutwisha kwikal nich kashinsh anch rukat rawiy rikubachikina kusal mwamu? Mutapu umwing udi wa kusadin chiyul chidia mu Filip 2:3 chilondina anch: “Ikepishany, muntu ni muntu amumana mukwau mudi udi muwamp kumupandakanamu.” Tufanyidin kutong piur pa mitapu yidiau akadivar nau anambaz netu awamp kutusutamu etu. Pamwing ap tukutwish kwilejin kusutin ritiy rau, kujijaman kwau ap mikadil yikwau ya win Kristu. Kutongin piur pa mikadil yau yiwamp kukukasikesh rukat retu mulong wa awiy ni kukusal anch chituswapela kwikal in kwakan.

IKAL NGENDJ MUWAMP

20. Mulong wak ni mutapu ik tufanyidina kwikal in kashinsh anch atutazuk?

²⁰ Nfund a kuseng David wipula anch: “A [Yehova] nany ukushakama mu dizang diey?” (Kuseng 15:1) Kupwa kwa yiney, David wisambina mikadil yikatinay Yehova anch angendj end ikal nich. Mwikadil umwing udi kwikal mwin kashinsh, mulong “ndiy kand ukat kuwanyish kushilamu kwend . . . , ap anch chikalap nchik chikash kudi ndiy.” (Kuseng 15:4) Anch twitiy kuya kwatutazukangau, tufanyidinap kulik kuya anch kwikil diyingishin dia usey dia kusal mwamu. Mwin kututazuk ukutwish kwikal warijekang kal nawamp mulong wa kwez kwetu, chad anch twalik kuya, usu wend wawonsu ukwikal wa chamwamu. (Mateu 5:37) Antu amwing akat kulikang kuya kwayitazukangau mulong akat kuman anch ndond yikwau yayitazukangau yidi yiwamp nakash. Ov, mwamu kudi kumekesh rukat ni kalimish? Tufanyidin kujikitish mulong wa yom yawonsu yitwinkishinau kudi muntu watutazukang. (Luka 10:7) Anch tufanyidinap kuya, chikwikal cha rukat ni cha manangu kumulej muntu watutazukang kurutu kwa chisu.

21. Mutapu ik kulimish yaku ya ndond tushicha kukutwish kutukwash kwikal angendj awamp?

²¹ Chidi kand cha usey kulimish yaku ya ndond ushicha. Mu jindond jimwing, angendj ezining pakad kukan akat kuyakang nawamp. Ku jindond jikwau, chiding chiwamp kwijikish kurutu kwa kwez kuyital antu. Ku jindond kanang, mwin kwakan ukat kuyinkishang angendj end yakudia yiwamp yikwetay, kupwa chad wayinkish antu a mu dijuku diend. Pakwez ku jindond jikwau, antu awonsu akat kuyisadin mutapu umwing. Jindond jimwing kand, angendj akat kuletang niyau yom kanang mulong wa kukwash yakudia. Mu materitwar makwau, in kwakan akatining anch angendj au kangal aleta kwau yom kanang. Mu yaku yimwing, angendj akat kulikang nich kalimish anch ayitazuk kapamp kakusambish ap ka kaad. Pakwez mu yaku yikwau, chiyipining nakash kulik kwitiy kutazuk kwa kusambish. Tufanyidin kusal usu wetu wawonsu mulong wa kwikal nich kashinsh anch muntu watutazukang ukwikal ni musangar.

22. Mulong wak chidi cha usey ‘kwakijan amwing ni akwau’?

²² Pita walonda anch: “Disudiel dia yom yawonsu didi piswimp.” (1 Pita 4:7) Nlel unou, turishin ni milong yikash yakad kal mangand minam kumanangap. Padandamedina mangand minam kuyip, tukuswiriken rukat rikurikina mulong wa akadivar nau anambaz netu. Chiyul cha Pita chilondina anch: “Akijanany amwing ni akwau” chidi cha usey nakash nlel kusutamu pakur. (1 Pita 4:9) Mwaning, kwakan kudi kwa musangar nakash ni kwa usey katat ni chikupu.