‘Ov, Nany Udia ku Mutambu wa Yehova?’

1, 2. (a) Mulong wak chidi cha usey nakash kwikal ku mutambu wa Yehova? (b) Yom ik tukwisambina mu mutu wa mulong winou?

CHIDI cha usey nakash kudi etu kushal piswimp ni Yehova. Kwikil muntu ukweta dikand, manangu ni rukat mudi ndiy! Chakin kamu, tukatin yisu yawonsu kwikal ashinshamena kudi ndiy ni kushal ku mutambu wend. (Kuseng 96:4-6) Pakwez antu amwing amwifukwilang Nzamb akanganya kusal mwamu.

² Mu mutu wa mulong winou, tukwisambin yilakej ya antu amwing alonda anch adi ku mutambu wa Yehova, pakwez pa chisu chawiy chimwing asalang yom yikisinay Yehova. Malejan ma usey twilejidina ku yilakej yau makutwish kutukwash kushal ashinshamena kudi Yehova.

YEHOVA UKAT KUSHINSHIKIN MUCHIM WETU

3. Mulong wak Yehova wasala usu wa kumukwash Kain, ni yom ik yamulejay Kain?

³ Chilakej, tongin piur pa Kain. Kadingap kwifukwil anzamb a makasu, pakwez Yehova kitiyap difukwil diend. Mulong wak? Yehova wamana anch mu muchim wa Kain mwading yitongijok yiyimp. (1 Yohan 3:12) Yehova wamubabesha Kain anch: “Anch wakarumuk kusal yom yiwamp, ov, kakukuzambwishap piur? Pakwez anch ukarumukinap kusal yom yiwamp, chitil chikat kukubatamin ku chis, ni chisadin usu wa kukuyikel; pakwez ey ukutwish kuchipandakan?” (Disambishil 4:6, 7, NWT) Yehova wamwovikesha Kain patok anch ang wakarumuk ni watond kwikal ku mutambu wa Nzamb, Nzamb niyend wafanyina kwikal ku mutambu wa Kain.

4. Yom ik yasalay Kain padingay ni mutapu wa kwikal ku mutambu wa Yehova?

⁴ Anch Kain waswimpa chitongijok chend, Yehova wafanyina kwitiy kand difukwil diend. Pakwez Kain kamuteshap Nzamb, ni yitongijok ni maku mend ma choy yamushikija ku kusal yom yiyimp. (Jakobu 1:14, 15) Padingay Kain nsand, pamwing ap katonginap anch wafanyina kumubwambwil Yehova. Pakwez kupwa wavuramena kubabesh kwa Nzamb, wamubwambwila Nzamb ni wamujipa mwanamakwend!

5. Yitongijok ya mutapu ik yikutwisha kusal anch tushadisha dilau dia Yehova?

⁵ Mudi Kain, mwin Kristu nlel ukutwish kulond anch umwifukwidin Yehova pakwez ukat kusal kand yom yikisinay Yehova. (Jud 11) Ukutwish kusal mudimu wa kulejan nich mushiku ni kukumangan chisu chawonsu. Pakwez mu chisu chawiy chimwing, ukutwish kwizwish manangu mend nich yitongijok ya masandj, ya chibud ap ya rukis. (1 Yohan 2:15-17; 3:15) Yitongijok mudi yiney yikutwish kumushikij ku yisal ya yitil. Antu akwau kakutwishap kwijik yom tutongina ap tusadina, pakwez Yehova wij. Wij anch tudi chakin kamu ku mutambu wend.—Tang Jeremiy 17:9, 10.

6. Mutapu ik utukwashinay Yehova mulong wa kupandakan maku mayimp?

⁶ Ap anch twarumbuk, Yehova kakatap kutulik kapamp kamwing. Anch twaya ku mutambu uyimp, Yehova ukat kututazuk anch: “Chirikany kud am, ni yam nikez kuchirik chakin kud en.” (Malakiy 3:7) Yehova wij anch tukat kurish ni kuziy kwetu. Pakwez ukatin anch tulamata dang ku mutambu wend ni tukisa yom yiyimp. (Isay 55:7) Anch twasal mwamu, utukanin anch ukutukwash ni kutwinkish usu tuswiridina mulong wa kupandakan maku mayimp.—Disambishil 4:7.

KANGAL AKUDIMB

7. Mutapu ik washadishay Salomon urund wend ni Yehova?

⁷ Padingay Salomon nsand, wading ni urund uwamp ni Yehova. Nzamb wamwinkisha Salomon manangu nakash ni wamwinkisha chisend chijim nakash cha kutung tempel upandakena kuwap mu Yerusalem. Pakwez Salomon washadisha urund wend ni Yehova. (1 Ant 3:12; 11:1, 2) Chijil cha Nzamb chading chilondin anch mwant kafanyidinap kwat ‘amband avud, chamwamu muchim wend ukez kupumbuk.’ (Kuvurik Yijil 17:17) Salomon wabwambwila chijil chinech. Kupwa chad, wata amband 700 ni amband a kuns 300! (1 Ant 11:3) Amband end avud ading angendj ifukwilang anzamb a makasu. Chawiy Salomon wabwambwila kand chijil cha Nzamb chijidikina kwat amband angendj.—Kuvurik Yiyil 7:3, 4.

8. Salomon wamubwambwila Yehova mutapu ik?

⁸ Pakemp pakemp, Salomon washadisha rukat rend mulong wa yijil ya Yehova. Kupwa, wasala kamu yom yiyimp. Watunga chintamb cha nzamb mband wa makasu Ashitoret ni cha nzamb mukwau wa makasu Kemosh, kupwa wifukwila anzamb inay a makasu pamwing nau akajend. Salomon watunga yintamb yiney ku mukandu udia pantaliken ni Yerusalem, ndond yading yitunginau tempel wa Yehova! (1 Ant 11:5-8; 2 Ant 23:13) Pamwing ap Salomon widimba amwinend mu kutong anch Yehova kakumanap kwend yom yawonsu yiyimp yading yisadinay mulong wading kupanang milambu mu tempel.

9. Yom ik yashikena chisu chalikay Salomon kutesh kubabesh kwa Nzamb?

⁹ Pakwez Yehova ukat kumanang yitil yawonsu. Bibil ulondin anch: “[Yehova] wamujimena Mwant Salomon, mulong muchim wend wadiokil kal kudi [Yehova].” Nzamb wasala usu wa kumukwash Salomon. Yehova “wamekana tupamp twaad kudi ndiy. Wamubabesha mulong wa chom chinech chakwel kangal alondul [anzamb akwau]. Pakwez ndiy kalamap malejan ma [Yehova].” Mudi chibudikin, washadisha dilau ni ukwash wa Nzamb. Yehova kitiyap anch an amakundj a Salomon ayikela muchid wawonsu wa Isarel, ni ikala ni milong yivud mu yitot ya mivu.—1 Ant 11:9-13.

10. Yom ik yikutwisha kuyipish urund wetu ni Yehova?

¹⁰ Anch twatond arund akad kwijik ni kulimish mbil ja Nzamb, akutwish kwikal ni yibachikin pa yitongijok yetu ni kuyipish urund wetu ni Yehova. Akutwish kwikal antu a mu chikumangen, pakwez kakwetap urund ukash ni Yehova. Ap akutwish kwikal anamakwetu, amutej netu, antu tusadina nau mudimu ap arund a shikol akad kumwifukwil Yehova. Anch antu tusutishina nau chisu kashichap kukwatijan ni mbil ja Yehova, akutwish kwikal ni yibachikin yikash padi etu mu chilik cha kushadish urund wetu ni Nzamb.

11. Yom ik yikutwisha kutukwash kutond arund netu?

¹¹ Tang 1 Korint 15:33. Antu amwing akwetaku mikadil yiwamp. Ni antu akad kumwifukwil Yehova kakusalangap kwau chisu chawonsu yom yiyimp. Pamwing ap wij antu a mutapu winou. Ov, chinech chirumburikin anch adi kamu arund awamp? Chakin, mutapu ik ukutwishau kwikal ni usu pa urund wey ni Yehova? Akukwashin kusej piswimp ni Nzamb? Yom ik yidia kamu ya usey nakash kudi antu inay? Yom ik yikatau kwisambin nakash? Ov, akat kwisambin chisu chawonsu piur pa masun ma katat, nfalang, yom ya tekinoloji ya katat, kwipuwangej ap yom yifanakena ni yiney? Ov, akat kuyilond antu akwau nayimp? Akatin kulond yom ya uses ni ya masaal? Yesu wababesha anch: “Kan ka muntu kakat kubudish yom yizwila mu muchim wend.” (Mateu 12:34) Anch wajingunin anch antu usutishina nau chisu akat kuyipish urund wey ni Yehova, kwat mupak! Kepish chisu ukata kusutish nau pamwing, ni anch chidi cha usey, jip urund winou.—Jinswir 13:20.

YEHOVA UTWITIN ANCH TUMUSHINSHAMENA

12. (a) Yehova wayileja in Isarel yom ik kupwa kwa kubudik mu Idjibit? (b) Yom ik yalondau in Isarel payilejau kudi Nzamb kwikal ashinshamena?

¹² Tukutwish kand kwilejin kusutin yom yashikena kupwa kwa Yehova kuyikwol in Isarel mu Idjibit. Pading pakumangenau antu ku Mukandu wa Sinay, Yehova wimekesha kudi awiy mu mutapu ushimwokishena! Amana didj dilimina, milayilay ni mish, ni atesha chidjimin mudi cha mpuny ni cha nzaj. (Kubudik 19:16-19) Kupwa atesha Yehova ukat kulond anch udi “Nzamb wa mukau.” Nzamb washilamu anch ukwikal ushinshamena kudi antu amukatina ni aziyidina yijil yend. (Tang Kubudik 20:1-6.) Yehova wasala chakwel in Isarel ijika anch ang ashal ku mutambu wend, niyend ukwikal ku mutambu wau. Anch wading mu chisak cha in Isarel inaya, mutapu ik wafanyina kwiyov pawatesha mazu ma Yehova? Wafanyina kamu kwakul mudi in Isarel alonda anch: ‘Mazu mawonsu malonday kal Yehova, tukumasadin.’ (Kubudik 24:3) Pakwez pasutap chisu chilemp kurutu kwa chom chimwing kushiken chapaka kushinshaman kwa in Isarel kudi Nzamb wau. Chading chom ik?

13. Chom ik chapaka kushinshaman kwa in Isarel?

¹³ In Isarel ova wom mulong wa mutapu ushimwokishena wamekeshay Nzamb usu wend, chawiy Moses waya ku Mukandu wa Sinay ni wambamba ni Yehova mulong wa awiy. (Kubudik 20:18-21) Pakwez mu kusut kwa chisu, Moses kachirikap swa mu chibeng mwadingau antu. Chimeken anch antu ading apatamen kal mwi mpay pakad ntakel wau. Chom ik chasalau? Chimeken anch in Isarel amuchingejina nakash ntakel wa chiuntu, Moses. Iyakamisha nakash ni amuleja Aron anch: “Tusadilap [nzamb] chakwel atutakela etu kurutu, mulong Moses ndiy kamu muntu watudiosha etu ku Idjibit, kitwijap chom ik chamutanyina kal.”—Kubudik 32:1, 2.

14. Yom ik yidimbau in Isarel mu yitongijok yau, ni mutapu ik wasalay Yehova?

¹⁴ In Isarel ading ij anch chidi chiyimp kwifukwil akish ap atupwany. (Kubudik 20:3-5) Pakwez asambisha pakad kulab kwifukwil musamb a ngomb wa or! Ap anch abwambwila chijil cha Yehova, idimba ayinau mu kutong anch adandamedin kwikal ku mutambu wa Yehova. Aron watazuka difukwil dia musamb a ngomb winou anch ‘musambu wa Yehova’! Yom ik yasalay Yehova? Wamuleja Moses anch antu “ijondish kal” ni alik kal njil “nayileja.” Yehova wajimana nakash ni watonga kushesh muchid wa kabuj.—Kubudik 32:5-10.

15, 16. Mutapu ik wamekeshay Moses ni Aron anch ading kamu ku mutambu wa Yehova? (Tal chipich cha kwisambishin.)

¹⁵ Pakwez Yehova udi Nzamb mwin riy. Kakwatap mupak wa kuyijiyish in Isarel. Pakwez, wayinkisha mutapu wa kumekesh anch adi ku mutambu wend. (Kubudik 32:14) Moses pamanay antu akat kutoy, kuwang ni kuja kurutu kwa mukish, wapuchola musamb a ngomb ni wamutwa wikal wung. Kupwa wayitoyina anch: ‘Nany udia ku mutambu wa Yehova? Eza kudi am!’ Ni “an amakundj a Levi aya amunyingumuk” Moses.—Kubudik 32:17-20, 26.

¹⁶ Ap anch Aron ndiy wasala musamb a ngomb wa or, wakarumuka, wabombakana pamwing nau in Levi ni watonda kwikal ku mutambu wa Yehova. Antu inay ashinshamena amekesha patok anch kadingap ku mutambu wa akayitil. Atonda kwa manangu, mulong urel wa dichuku dinadia, tunan twa antu ifukwila musamb a ngomb afa. Pakwez awonsu ading ku mutambu wa Yehova apanda ni Nzamb washilamu kuyiyukish.—Kubudik 32:27-29.

17. Yom ik twilejidina kusutil yom yafunday Paul piur pa musamb a ngomb wa or?

¹⁷ Dilejan in twilejidinaku? Kambuy Paul walonda anch: “Yikal kal yijingidij ya kutubabesh etu,” chakwel kangal “twifukwilany akish.” Paul warumburila anch yom mudi yiney “ayifunda mulong wa kutubabesh nich etu. Mulong etu tudi piswimp ni disudiel dia mangand. Chawiy chifanyidin muntu mwawonsu utongila anch: ‘Niminy dang mu ritiy,’ ababal, chamwamu ukuwa.” (1 Korint 10:6, 7, 11, 12) Mudi mwalonday Paul, ap antu amwifukwidila Yehova akutwish kwiyandjik mu kusal yom yiyimp. Akutwish pamwing ap kutong anch Yehova udandamedin kuyitiy. Pakwez chidiap kwau anch mulong muntu usotin kwikal murund wa Yehova ap kulond anch ushinshamen kudi ndiy chawiy chirumburikina anch Yehova umwitiyin.—1 Korint 10:1-5.

18. Yom ik yikutwisha kutupumbul kulemp ni Yehova, ni yibudikin yikutwish kwikal ya mutapu ik?

¹⁸ Padingay Moses kand kal achirika ku Sinay mudi mwading muchingejidinau in Isarel, iyakamisha nakash. Anch disudiel dia mangand dishikinap swa mudi mutwadia tuchingejidina, niyetu tukutwish kwiyakamish. Tukutwish kusambish kutong anch machuku ma kurutu mapandakena kuwap makanay Yehova madi kulemp nakash ap mapandaken kuwap mulong wa kuwanyin, ni tukutwish chad kusambish kushinshikin pa yom tukatina pa ndond pa yom yikatinay Yehova. Anch tubabelap, tukutwish kupumbuk kulemp ni Yehova ni kusal yom yitwakad kutong anch tukutwish kuyisal.

19. Yom ik tufanyidina kuvurik chisu chawonsu ni mulong wak?

¹⁹ Yehova utwitin anch tumuziyina kamu ndiy ni kumwifukwil ching ndiy. (Kubudik 20:5) Mulong wak utwitin anch tusala mwamu? Mulong utukatin. Anch tusadinap yom yikatinay Yehova anch tusala, tukusambish chad kusal yom yikatinay Satan ni chinech chikutusal etu nayimp. Paul walonda anch: ‘Kiukutwishanyap kuna rupas ra Yehova ni rupas ra ayilembil; kiukutwishanyap kudia ku mes ma Yehova ni ku mes ma ayilembil.’—1 Korint 10:21.

SHAL PISWIMP NI YEHOVA!

20. Mutapu ik ukutwishay Yehova kutukwash ap anch tukat kurumbuk?

²⁰ Kain, Salomon nau in Isarel awonsu ading ni mutapu wa kukarumuk ni kuswimp mwikadil wau. (Midimu 3:19) Chakin kamu, Yehova kakatap kapamp kamwing kuyilik antu mulong kwau arumbuk kal. Tong mutapu wamulikishinay Aron. Nlel unou, Yehova ukat kutubabesh kwa rukat mulong wa kutuchidij ku kusal yom yiyimp. Ukat kusadin Bibil, mikand yetu ap kand in Kristu akwau. Anch twata matu ku kubabesh kwa Yehova, tukutwish kwikal nich kashinsh anch ukutwovil riy.

21. Yom ik tufanyidina kusal anch apak kushinshaman kwetu kudi Yehova?

²¹ Ranaken ra Yehova rikwet chitongijok. (2 Korint 6:1) Ritwinkin mutapu wa “kulik mwom uyimp ni maku mayimp ma yom ya mangand.” (Tang Titus 2:11-14.) Mu mangand minam, mukwikal chisu chawonsu yom yikutwisha kupak kushinshaman kwetu kudi Yehova. Kwat mupak wa kushal kamu ku mutambu wa Yehova, ni vurik anch ‘Yehova Nzamb wey ndiy ukwova wom, ni kumusadil ni kulamat kudi ndiy’!—Kuvurik Yijil 10:20.