Tudi a Yehova

1. Mulong wak tukutwisha kulond anch yom yawonsu yidi ya Yehova? (Tal chipich cha kwisambishin.)

YOM YAWONSU yidi ya Yehova! Ndiy ukweta “diur, ni diur dia maur, ni pansh ni yom yawonsu yidiap.” (Kuvurik Yijil 10:14; Kujingunik 4:11) Mulong Yehova watanga antu, muntu mwawonsu udi wendendiy. (Kuseng 100:3) Pakwez pakach pa antu awonsu ikalaku kal, Nzamb watonda antu amwing kwikal aend mu mutapu wa pakampwil.

2. Kukwatijan ni Bibil, anany adia antu a Yehova mu mutapu wa pakampwil?

² Chilakej, Kuseng 135 urumburil piur pa in kumwifukwil Yehova ashinshamena a mu Isarel wa pasak anch ading “uswan wend.” (Kuseng 135:4) Chikwau kand, muprofet Ozey wasambela kulejan anch antu akad kwikal in Isarel akwikal antu a Yehova. (Ozey 2:23) Uprofet winou wawanyina chisu chasambishay Yehova kutond antu akad kwikal in Isarel mulong wa kuyikel pamwing ni Kristu mwiur. (Midimu 10:45; Rom 9:23-26) Antu inay azizidilau many nich spiritu utumbila ayitazukin anch “muchid utumbila.” Adi “antu a Nzamb a pakampwil.” (1 Pita 2:9, 10) Pakwez chidi nchik piur pa in Kristu awonsu ashinshamena nlel akweta ruchingej ra kushakam chikupu pa divu? Yehova uyitazukin niyau anch “antwam” ni anch ‘antu natonda.’—Isay 65:22.

3. (a) Anany adia mu urund wa pakampwil ni Yehova nlel? (b) Yom ik tukwisambina mu mutu wa mulong winou?

³ Nlel unou, “chisak chikemp” chikweta ruchingej ra kushakam chikupu mwiur ni “amikoku akwau” akweta ruchingej ra kushakam chikupu pa divu, amwifukwidin Yehova pamwing mudi “chisak chimwing.” (Luka 12:32; Yohan 10:16) Tukatin kumekesh kudi Yehova anch tujikitishin mulong tukwet urund wa pakampwil ni ndiy. Mu mutu wa mulong winou, tukwisambin mutapu tukutwisha kumekesh kujikitish kwetu kudi Yehova mulong wa chipan chinech cha pakampwil.

TUKAT KUPAN MWOM YETU KUDI YEHOVA

4. Mutapu ik tukutwisha kumujikitish Yehova mulong watwitiya kwikal mu urund ni ndiy, ni mutapu ik wasalay Yesu niyend mwamu?

⁴ Tukat kumekesh kujikitish kwetu kudi Yehova chisu tukata kwipan ayinetu kudi ndiy ni kutambul dibatish. Mwamu antu awonsu akutwish kuman anch tudi a Yehova ni tukatin kumuziyin. (Hebereu 12:9) Yesu wasala niyend mwamu chisu chamubatishau. Ap anch wading muntu wa muchid wading wipanina kal kudi Yehova, ndiy wipana amwinend kudi Yehova. Chading mudi ukat kulond anch: “Nikwet musangar pakusadil rusot rey, A Nzamb wam.”—Kuseng 40:7, 8.

5, 6. (a) Yom ik yalonday Yehova chisu chamubatishau Yesu? (b) Chilakej ik chikutwisha kutukwash kwov mutapu ukatay Yehova kwiyov piur pa kwipan kwetu?

⁵ Mutapu ik wiyovay Yehova pamubatishau Yesu? Bibil ulondin anch: “Chamubatishau Yesu, ndiy watuntuka mu mem. Pawiy kamu pinipa diur diamwanzurikina ndiy, chad wamana [spiritu] wa Nzamb wading mudi iyemb wamushirikina. Chawiy dizu diadiokala mwiur anch: ‘Ey udi Mwanam unikatila nakash. Am nikat kusangar mulong weyey.’” (Mateu 3:16, 17) Yesu wading kal wayen wa Nzamb. Pakwez Yehova wasangara pamanay anch Yesu wakata kusadil mwom wend mulong wa kumusadin Ndiy. Yehova ukat kusangar kand anch twapan mwom wetu kudi ndiy, ni ukutuyukish.—Kuseng 149:4.

⁶ Pakwez ndiy mwin yom yawonsu! Yom ik tukutwisha kumwinkish kand? Tong bil piur pa ikundj ukweta yisalamb yiwamp mu rupang rend. Dichuku dimwing mwanend changadim wapol chisalamb chimwing ni wamwinkish tatukwend. Ap anch yisalamb yawonsu yidi ya tatukwend, tatuku mwin rukat ukusanger chipandakena chipan chinech. Chinech chimekeshin anch mwanend changadim umukatin. Chisalamb chinech cha mwanend chidi cha usey nakash kudi ndiy kusutamu yisalamb yin yawonsu yidia mu rupang. Chilik chimwing, Yehova ukat kusangar anch twapan kwa kwikatin mwom yetu kudi ndiy.—Kubudik 34:14.

7. Mutapu ik utukwashinay Malakiy kutesh mutapu ukatay Yehova kwiyov piur pa antu amusadidina ndiy?

⁷ Tang Malakiy 3:16. Mulong wak chidi cha usey kupan mwom wetu kudi Yehova ni kutambul dibatish? Chidi chakin anch chisu usambishina kamu kwikalaku, udi kal muntu wa Sakatang wetu, Yehova. Pakwez tong mutapu ukatay Yehova kwov musangar anch wamwitiy ndiy kwikal Nyikel wey ni kupan mwom wey kudi ndiy! (Jinswir 23:15) Yehova wij antu akata kumusadin kwa kwikatin ni ukat kufund majim mau mu ‘mukand wa chivurikish.’

8, 9. Yom ik yitinay Yehova kudi antu asotina anch majin mau amafunda mu ‘mukand wa chivurikish’?

⁸ Anch tukatin anch majim metu mashala mu ‘mukand wa chivurikish’ wa Yehova, kudi chom kanang tufanyidina kusal. Malakiy ulondin anch tufanyidin kumwov Yehova wom ni kutongijokin pa dijin diend. Anch twamwifukwil muntu mukwau ap chom chikwau chin chawonsu, majin metu akumajimwangesh mu mukand wa Yehova!—Kubudik 32:33; Kuseng 69:28.

⁹ Chawiy tufanyidinap kwetu ching kumukan Yehova anch tukusal rusot rend ni kutambul dibatish. Yiney yidi yom tukata kusal kapamp kamwing, pakwez kumwifukwil Yehova chidi chom tufanyidina kusal mu mwom wetu wawonsu. Dichuku diawonsu, patudia ni mwom, tufanyidin kumekesh kusutil yisal yetu anch tumuziyidin Yehova.—1 Pita 4:1, 2.

TUKAT KWIPUK MAKU MA MANGAND

10. Kushalijan ik kufanyidina kwikal pakach pa antu amusadidina Yehova ni akad kumusadin?

¹⁰ Mu mutu wa mulong wasambelang, twilejang anch Kain, Salomon nau in Isarel alonda anch amwifukwidin Yehova pakwez kadingap kashinshamena kudi ndiy. Yilakej yiney yitufundishin anch chitinap kwau ching kulond anch tumwifukwidil Yehova. Tufanyidin kukis yom yiyimp ni kukat yom yiwamp. (Rom 12:9) Yehova ulondin anch kukwikal kushalijan ‘pakach pa muntu utentamina ni muntu muyimp, pakach pa muntu umusadidila Nzamb ni ndiy wakad kumusadilang.’—Malakiy 3:18.

11. Mulong wak chifanyidin kumekan kudi antu awonsu anch tumwifukwidin ching kusu Yehova?

¹¹ Tukat kumujikitish Yehova mulong watutonda kwikal antu end! Chinech chifanyidin kumekan kudi antu awonsu anch tudi ku mutambu wa Yehova. (Mateu 5:16; 1 Timote 4:15) Iyipula anch: ‘Antu akwau akutwish kuman anch nishinshamen kamu kudi Yehova? Ov, nikweting musangar wa kuyilej antu akwau anch nidi Kaman wa Yehova?’ Tong mutapu ukwovay Yehova ushon anch tukwet usany wa kuyilej antu akwau anch tudi endendiy.—Kuseng 119:46; tang Marko 8:38.

12, 13. Mutapu ik chiyikasikedina antu amwing kuyijingunin kudi antu akwau anch adi Atuman a Yehova?

¹² Cha ushon, Atuman amwing imburijin ‘spiritu wa mangand.’ Mudi chibudikin, kashalijadinap kamu nakash nau antu akad kumwifukwil Yehova. (1 Korint 2:12) ‘Spiritu wa mangand’ ukat kuyibachik antu kwimen pa maku ma kwitongin. (Efes 2:3) Chilakej, chikalap nchik yiyul yawonsu tutambwila, antu amwing atondin kudjal mu mutapu wakad kuwanyin. Akat kudjal masun malamatina nakash ni miswimp ap mamekeshina mujimb, ni akat kumadjal ap ku yikumangan ya win Kristu. Ap akat kukudish nsuk mu mutapu wakad kuwanyin. (1 Timote 2:9, 10) Mudi chibudikin, chiyikasikedin antu akwau kwijik anch adi Atuman a Yehova ap bwat.—Jakobu 4:4.

¹³ Kudi mitapu yikwau yisadina anch Atuman amwing alika kushalijan nakash ni mangand. Chilakej, ku misambu, Atuman amwing akat kuja maj ni kumekesh mwikadil wakad kuwanyin kudi in Kristu. Akwau akat kutek yipich ya ayinau pa yom ya kupalangesh nich jinsangu ni kufundap mazu kanang yimekeshina yitongijok yau ya chiuntu. Pamwing ap anch kakutwishap kuyipup mu chikumangen cha win Kristu mudi asalang chitil chijim, pakwez akutwish kwikal nich yibachikin yiyimp padi akadivar nau anambaz asadina usu wa kwikal ashalijadina ni mangand.—Tang 1 Pita 2:11, 12.

14. Yom ik tufanyidina kusal mulong wa kuchidij urund wetu wa pakampwil ni Yehova?

¹⁴ Chom chin chawonsu chidia mu mangand achibudishin mulong tushinshikina pa “maku ma mujimbu wa mbij, maku ma mes ni kwibaz kwa yom.” (1 Yohan 2:16, TMK) Etu tudi a Yehova, chawiy tushalijadina. Tukat “kulik mwom uyimp ni maku mayimp ma yom ya mangand, chakwel twikal nich mwom wa kwilam ayinetu, utentamina, ufanakena nend Nzamb mu chirung chinech.” (Titus 2:12) Mwom wetu wawonsu, kuwejaku mutapu tulondina, tudila, tunila, tudjadila ni tusadina mudimu yifanyidin kumekan kudi muntu win mwawonsu anch tudi a Yehova.—Tang 1 Korint 10:31, 32.

TWIKALANY NICH ‘RUKAT RUPANDAKENA UMWING NI MUKWAU’

15. Mulong wak tufanyidin kwikal antu awamp ni in rukat mulong wa in Kristu akwau?

¹⁵ Tukat kumekesh anch tukwatin nich usey urund wetu ni Yehova kusutil mutapu tukata kuyisadil akadivar nau anambaz netu. Niyau adi a Yehova, mudi mutudia niyetu. Anch twavurik chom chinech, tukuyisadin chisu chawonsu nawamp ni rukat. (1 Tesalonik 5:15) Mutapu ik chidia cha usey? Yesu wayileja in kwilejend anch: “Anch niyen wakatijanany mwamu, chawiy antu awonsu akez kwijik anch, en udiany in kwilejam.”—Yohan 13:35.

16. Yom ik twilejidina ku Chijil cha Moses piur pa rukat ra Yehova mulong wa antu end?

¹⁶ Chilakej chimwing cha mu Chijil cha Moses chikutwish kutukwash kutesh mutapu tufanyidina kuyisadin antu akwau mu chikumangen. Mu tempel wa Yehova, mwading yom yasadinangau ching kusu mulong wa difukwil. Chijil chading chirumburil patok mutapu wafanyinau in Levi kulam yom yiney ni muntu mwawonsu walikang kulondul mbil jinej afanyina kumujip. (Kuchind Michid 1:50, 51) Anch Yehova wabangina nakash mutapu ulaminau antu yom yasadinangau mulong wa difukwil, komb ukuyibangin nakash in kumwifukwil end ipanina kal kudi ndiy ni ashinshamena! Usotin anch twijika mutapu tukweta usey nakash kudi ndiy palonday anch: “Muntu mwawonsu ukukupukunanya en ukwet mulong ni yamam.”—Zakariy 2:12.

17. Yom ik yikatay Yehova ‘kuta matu ni kutesh’?

¹⁷ Malakiy walonda anch Yehova ukat ‘kuta matu ni kutesh’ mutapu usalijadidinau antu end umwing ni mukwau. (Malakiy 3:16) Yehova “uyij aend.” (2 Timote 2:19) Udumukidin nakash chom chawonsu tulondina ni tusadina. (Hebereu 4:13) Anch twayisadin nayimp akadivar nau anambaz netu, Yehova umen kwend. Pakwez tukutwish kwikal nich kashinsh anch Yehova umening kand anch tudi in kwakan, in kupan, in kulikishin ni antu awamp.—Hebereu 13:16; 1 Pita 4:8, 9.

“[YEHOVA] KAKUYIDJIBULAP ANTWEND”

18. Mutapu ik tukutwisha kumujikitish Yehova mulong watutonda kwikal antu end?

¹⁸ Tukatin kumekesh kudi Yehova anch tumujikitishin nakash mulong tudi antu end. Twij anch chisu twapana mwom wetu kudi ndiy, wading mupak wa manangu nakash twakwata. Ap anch tushich “mukach mwa in matung ni akayitil a chirung chinech,” tukutwish kudandamen kwikal “akad kufa nich” ni kumunyik “mudi chimunyik mukach mwa antu a mangand minam.” (Filip 2:15) Chawiy tukwatin mupak wa kwipuk kusal yom yin yawonsu yikisinay Yehova. (Jakobu 4:7) Ni tuyikatin ni tuyilimishin akadivar nau anambaz netu mulong niyawiy kand adi a Yehova.—Rom 12:10.

19. Mutapu ik uyifutinay Yehova antu adia aend?

¹⁹ Bibil ushidinamu anch: “[Yehova] kakuyidjibulap antwend.” (Kuseng 94:14) Chinech chidi chizu. Chikalap nchik chikushikena, Yehova ukwikal niyetwetu. Ap anch twafa, kakutwishap kutuvuramen. (Rom 8:38, 39) “Anch tudi aom, tudi aom mulong wa [Yehova], anch twafa, tufil mulong wa [Yehova]. Chawiy anch twapandap nchik, ap anch twafap nchik, tudi ayen a [Yehova].” (Rom 14:8) Tuchingedin chisu chikuyivumbulay Yehova arund nend awonsu ashinshamena afila kal. (Mateu 22:32) Ap katat tusangaredin yipan yivud yiwamp yidiokila kudiay Tatukwetu. Mudi mulondinay Bibil, “wayuk muchid umutekina [Yehova] kwikal Nzamb wend, ayuk antu atonday [kwikal] uswan wend amwinend.”—Kuseng 33:12.