“Ezany Kudi Am, . . . Chad Am Nikez [Kukukasikeshany]”

1. Kukwatijan ni Mateu 11:28-30, Yesu washilamu yom ik?

YESU washilamu yom yipandikena kuwap kudi antu ading amuteshina. Walonda anch: “Ezany kudi am, . . . chad am nikez [kukukasikeshany].” (Tang Mateu 11:28-30.) Mazu minam madingap kwau machamwamu. Chilakej, tong piur pa yom yasalay kudi mband wading uyedina mayej makash.

2. Yom ik yasalay Yesu mulong wa mband wading uyedina?

² Ap anch kadingap ni ruchingej ra kuyerik, mband winou wading uswirikedin ukwash. Waya kudi adokter avud nich ruchingej ra kuyerik. Kupwa kwa mivu 12 ya mayej, kwadingap muntu watwisha kumwok. Kukwatijan ni Chijil cha Moses, wading wijondil. (Lev. 15:25) Pateshay anch Yesu wading ukat kwokan, waya kumuman. Pamumany, wapukuna ku rizez ra kabwik wend, ni papinipa kamu wayerika! Pakwez Yesu kimenap kwend ching pa kumwok, wasala kand anch mband winou iyova anch amulimishin. Chilakej, chisu chading chambambinay nend wasadina mazu ma kalimish “mwanam mband.” Mband winou wiyova kamu kwikal ukasikeshinau!—Luka 8:43-48.

3. Yipul ik tukwakula?

³ Ijik anch mband winou waya kudi Yesu. Wasala usu kanang. Chilik chimwing ni nlel—tufanyidin kusal usu wa ‘kwez kudi’ Yesu. Nlel, Yesu kokinap kusutin chilay mayej ma antu ‘ezina kudi’ ndiy. Pakwez udandamedin kututazuk anch: “Ezany kudi am, . . . chad am nikez [kukukasikeshany].” Mu mutu wa mulong winou tukwakul ku yipul yitan: Mutapu ik tukutwisha ‘kwez kudi’ Yesu? Yom ik yakimbay kulond Yesu palonday anch: “Itwikany mpand yam”? Yom ik tukutwisha kwilejin ku chilakej cha Yesu? Mulong wak mudimu watwinkishay kusal ukat kutukasikesh? Ni mutapu ik tukutwisha kudandamen kutambul kukasikesh pitusendina mpand ya Yesu?

“EZANY KUDI AM”

4-5. Mu mitapu ik yimwing tukutwisha ‘kwez kudi’ Yesu?

⁴ Mutapu umwing wa ‘kwez kudi’ Yesu udi wa kusal usu wetu win wawonsu mulong wa kwilej piur pa yom yalonday ni yasalay. (Luka 1:1-4) Kwikil muntu ukutwisha kusal mwamu pa ndond yetu—tufanyidin kwilej ayinetu nsangu jinej. Tukutwish kand ‘kwez kudi’ Yesu kusutil kukwat mupak wa kutambul dibatish ni kwikal mwin kwilej wa Kristu.

⁵ Mutapu ukwau wa ‘kwez kudi’ Yesu udi kusutil kuya kudi amakurump a chikumangen anch tukwet kuswir kwa ukwash. Yesu ukat kusadin ‘yipan mudi antu’ yiney mulong wa kulam amikoku end. (Efes 4:7, 8, 11; Yoh. 21:16; 1 Pita 5:1-3) Tufanyidin kusal usu mulong wa kwit ukwash wau. Tufanyidinap kutong anch amakurump akutwish kujingunin yom yidia mu muchim wetu ap mu manangu metu ni kwijik yom tukweta nich kuswir. Shinshikin yom yilondinay mukadivar Julian: “Nafanyina kwimik chisend cham cha kusadin ku Betel mulong wa mayej, chad murund nam umwing wanleja anch nifanyidin kuyitazuk amakurump mulong wa kwinkasikesh. Kwinsambishin natongang anch chidiap cha usey kusal mwamu. Pakwez mu kusut kwa machuku nita ukwash, ni ukwash natambula kudi amakurump wading chipan cha usey nakash.” Amakurump ashinshamena mudi amukwasha Julian, akutwish kutukwash kwijik “chitongijok cha Kristu,” charumburik anch kwijik nawamp ni kwimburij mutapu wend wa kutong ni mwikadil wend. (1 Kor. 2:16; 1 Pita 2:21) Chakin kamu, chinech chidi chipan cha usey nakash pakach pa yipan ya usey tukutwisha kutambul.

“ITWIKANY MPAND YAM”

6. Yom ik yakimbay kulond Yesu palonday anch: “Itwikany mpand yam”?

⁶ Palonday Yesu anch: “Itwikany mpand yam,” wakimba kulond pamwing ap anch “Itiyany ulabu wam.” Ap pamwing ap wakimba kand kulond anch “Tusendany pamwing mpand yam, ni tukumusadilany Yehova pamwing.” Mazu minam mawonsu mamekeshin anch kusend mpand kwitin kusal mudimu.

7. Kukwatijan ni Mateu 28:18-20, mudimu ik watwinkishau kusal, ni kashinsh ik tufanyidina kwikal nich?

⁷ Tukat kwitiy kutazuk kwa Yesu chisu tukata kupan mwom wetu kudi Yehova ni kutambul dibatish. Yesu wamutazuka muntu win mwawonsu kwez kudi ndiy ni ukumwak chakin kamu muntu mwawonsu ukatina kumusadin Nzamb. (Yoh. 6:37, 38) In kwilej a Kristu awonsu akwet dilau dia kusal mudimu wamwinkishau Yesu kusal kudi Yehova. Tukutwish kwikal nich kashinsh anch Yesu ukwikal netu mulong wa kutukwash kusal mudimu winou.—Tang Mateu 28:18-20.

‘ILEJINANY KUDI AM’

8-9. Mulong wak antu ikepishina ading akatil kumusejin Yesu, ni yipul ik tufanyidina kwiyipul?

⁸ Antu ikepishina awiy amusejina Yesu. (Mat. 19:13, 14; Luka 7:37, 38) Mulong wak? El tushinshikinany kushalijan kudia pakach pa Yesu nau Afaris. Antakel inay a chirelijon kadingap ni rukat ni ading in kwitutul. (Mat. 12:9-14) Yesu wading ni rukat ni wikepishina. Afaris awiy ading akatin kwijikan nakash ni in kwitutul mulong wa maz yau ya piur yadingau nich. Yesu walonda anch chadingap chiwamp kwikal ni mikadil yiyimp mudi yiney ni wayifundisha in kwilejend kwikal antu ikepishina ni in kuyisadin antu akwau. (Mat. 23:2, 6-11) Afaris ayiyikelang antu akwau ni kuyovish wom piur pa yom yikuyishikena anch ayibwambwil. (Yoh. 9:13, 22) Yesu wayikasikesha antu akwau kusutil yisalijok yiwamp ni mazu ma rukat.

⁹ Ov, niyey wilejidinap kal malejan minam kudi Yesu? Iyipula anch: ‘Ov, antu akwau amening mudi muntu ukweta mwikadil wa kwitudish ni kwikepish? Ov, nikat kusalang kwa kwikatil tumidimu tumekena mudi twa antu akad usey mulong wa kuyisadin antu akwau? Ov, antu akwau amening anch niding muntu muwamp?’

10. Yesu wayisadinang mutapu ik antu asalangay nend mudimu?

¹⁰ Yesu wading mwin chisambu, chinech chasala anch antu asalangay nend mudimu amusejin, ni wakata nakash kuyifumb. (Luka 10:1, 19-21) Wayikasikesha in kwilejend kwipul yipul, ni wayipulang yipul mulong wading ukatin kutesh yitongijok yau. (Mat. 16:13-16) Mudi mbut jichidijinau ku ubaj, in kwilejend aya kurutu. Ata matu ku malejan mafundishay Yesu ni asonga mabuj kusutil ku midimu yiwamp.

11. Yipul ik tufanyidina kwiyipul?

¹¹ Ov, tukwet umutakel kampand padi antu akwau? Anch chidi mwamu, iyipula anch: ‘Mutapu ik nikata kuyisadin antu akwau ku mudimu ap ku chikumbu? Ov, nikat kusalang anch ndond nidia yikal ya chisambu ni yisangareshina? Ov, nikat kuyikasikeshang antu akwau kwipul yipul? Nikatining kutesh yitongijok yau?’ Tukatinap kwikal mudi Afaris, ajimanang anch antu akwau ayipul yipul ni ayizengolang antu apanang yitongijok yishalijadina ni ya awiy.—Mar. 3:1-6; Yoh. 9:29-34.

“NIKEZ [KUKUKASIKESHANY]”

12-14. Mulong wak mudimu watwinkishay Yesu kusal ukat kutukasikesh?

¹² Mulong wak tukat kwikal akasikeshinau anch twasal mudimu watwinkishau kusal kudi Yesu? Kudi mayingishin mavud, pakwez tushinshikinanyaku makemp.

¹³ Tukwet atulam awamp. Yehova kalam wetu mujim, kadingap kalam wa chisum ap wakad kujikitishang. Ukat kusanger mudimu tusadina. (Heb. 6:10) Ni ukat kutwinkish usu tuswirikedina mulong wa kusal mudimu watwinkishay. (2 Kor. 4:7; Gal. 6:5) Yesu mwant wetu, watushila chilakej chiwamp. (Yoh. 13:15) Ni amakurump atulamina akat kusal usu wa kumwimburij Yesu, “kafung mujim.” (Heb. 13:20; 1 Pita 5:2) Akat kwikasikesh kwikal antu awamp, in kukasikeshan, ni atakamena chisu chitufundishinau ni kutulam.

¹⁴ Tukwet arund awamp. Kwikil muntu mukwau ukweta arund awamp akweta rukat ni mudimu uwamp mudi wetwetu. Tong bil: Tukwet chisend cha kusal mudimu pamwing nau antu akweta mikadil yishitwila ni akad kwiman mudi adi a usey nakash kuyisutamu antu akwau. Akwet ukaliweny nakash pakwez ikepishin, ni akat kuyiman antu akwau mudi adi a usey nakash kuyisutamu awiy. Kakatap kutuman ching kusu mudi ambay a mudimu, pakwez kand mudi arund. Ni rukat rau ridi rijim nakash mu chilik cha kupan mwom yau mulong wetwetu!

15. Mutapu ik tufanyidina kwiyov piur pa mudimu tusadina?

¹⁵ Tukwet mudimu uwamp nakash. Tukat kuyifundishang antu uyakin piur pa Yehova ni tukat kumekesh patok makasu ma Djabul. (Yoh. 8:44) Satan ukat kuyimesh antu mar nakash nich makasu mend ni chinech chiyisadin antu ashadisha ruchingej. Chilakej, ukatin twitiyij anch Yehova kakutulikishinap yitil yetu ni anch katukatilap. Minam madi makasu mayimp mayimeshina antu mar nakash! Anch ‘twez kudi’ Kristu, yitil yetu akat kuyilikishin. Ni uyakin udi anch Yehova utukatin etu awonsu nakash. (Rom 8:32, 38, 39) Musangar mudi ik wa kuyikwash antu akwau kwilej kumuchingejin Yehova ni kuyiman mutapu uwapishinau mwom yau!

DANDAMEN KWIKAL UKASIKESHINAU PIUSENDINA MPAND YA YESU

16. Mutapu ik ushalijadina chisend chitwinkishinay Yesu ni yisend yikwau?

¹⁶ Chisend chitwinkinay Yesu kusend chishalijadin ni yisend yikwau tufanyidina kusend. Chilakej, kwinsudiel kwa dichuku pitukata kupwish kusal mudimu wa ku mujimbu, antu avud kakatap kusu kwau kuziy pakwez akat kushadish kand musangar wau. Chinyim ni chinech, kupwa kwa kusutish chisu mu mudimu wa Yehova ni wa Kristu, tukat kov musangar nakash. Tukutwish pamwing ap kuziy kupwa kwa kusutish dichuku dia kabuj mu mudimu ni kusal usu wa kuya ku yikumangan chisu cha urel. Pakwez yisu yivud tukat kwikal akasikeshinau chisu tudiokila ku yikumangan ni usu ukat kuchirik kand. Yom yiney yikat kusadik kand chisu tukata kusal usu wa kulejan ni kusal dilejan dia Bibil dia muntu panrend. Difut tukata kutambul didi dijim kusutamu usu tukata kusadin!

17. Yom ik tufanyidina kwijik piur petu, ni tufanyidin kubabal piur pa chom ik?

¹⁷ Tufanyidin kwijik anch umwing ni umwing wa pakach petu ukwet mimbu piur pa yom yikutwishay kusal. Tufanyidin kubabal piur pa yom tusadina. Chilakej, tukutwish kushesh usu wetu mu kukimb mapit ma ku mujimbu. Shinshikin yom yakulay Yesu pamwipulau kudi nsand wading mpich anch: “Ov, chifanyidin nisala nchik [chakwel] nikala nich mwom wa chikupu?” Nsand winou wading kuziyinang ku Chijil. Chimeken anch wading nsand muwamp mulong rusangu ridia mu Evanjil wa Marko rilejen anch Yesu ‘wamukata.’ Yesu wamutazuka ikundj winou. Wamwela anch: “Yang ukalandish yom yawonsu yiukweta, chad wez wikal mwin kwilej wam.” Ikundj winou wakata kumulondul Yesu, pakwez kakatap kulik ‘mapit mavud’ madingay nich. (Mar. 10:17-22) Mudi chibudikin, kitiyap kusend mpand yamwinkishau kudi Yesu ni wadandamena kusadin “mapit.” (Mat. 6:24) Anch yeya yom ik wafanyina kutond?

18. Yom ik tufanyidina kusal yisu yimwing, ni mulong wak?

¹⁸ Chisu ni chisu tufanyidin kutong piur pa yom tutekina pa ndond ya kusambish mu mwom wetu. Mulong wak? Chakwel twikal nich kashinsh anch tusadidin usu wetu nich manangu. Shinshikin chilakej cha nsand utazukinau anch Mark, ulondin anch: “Mu mivu yivud, nading nitongin anch nikwet mwom upipela. Nasalang mudimu wa uchibol, pakwez chisu chawonsu natonga piur pa nfalang ni mutapu nikutwisha kwikal ni mashakamin mawamp. Niyipulang anch mulong wak mwom wam wikala ukash. Kupwa najingunina anch nading nitakejin maswir mam kurutu ni nasadinang chisu ni usu ukemp mu mudimu wa Yehova.” Mark waswimpa yitongijok ni mashakamin mend ni witekina chisu cha kusal yom yivud mu mudimu wa Yehova. Ulondin anch: “Yisu yimwing niyakamishang piur pa nfalang, pakwez mulong wa ukwash wa Yehova ni wa Yesu, napandakana yakamish yam.”

19. Mulong wak kwikal ni chitongijok chiwamp kudi kwa usey?

¹⁹ Tukudandamen kwikal akasikeshinau chisu tusendina mpand ya Yesu anch twasal yom yisatu. Chakusambish, ikal ni chitongijok chiwamp. Mudimu tusadina udi wa Yehova, chawiy tufanyidin kuusal mudi mukatinay Yehova amwinend. Tudi ansalamudimu, ni Yehova ndiy Mwant wa mudimu. (Luka 17:10) Anch twasal mudimu mu mutapu tukatila etu, tukuman anch mpand yitulimidin. Ap ikwal a ngomb ukweta usu nakash ukutwish kwipuswol ni kuziy nakash anch wasambish chisu chawonsu kuya kwi ndond kukatinay amwinend ni kulik kuziyin kwi mpand ya nsalejend. Ku mutambu ukwau, tukutwish kusal yom yishimokishena ni kupandikan yikangesh anch twalondul umutakel wa Yehova. Vurik anch kwikil muntu ukutwisha kukangesh rusot ra Yehova kusadik!—Rom 8:31; 1 Yoh. 4:4.

20. Tufanyidin kwikal ni yibachikin ya mutapu ik mulong wa kusend mpand ya Yesu?

²⁰ Cha kaad, sal mudimu nich yibachikin yiwamp. Chitongijok chetu chidi cha kumutumbish Yehova, Tatukwetu wa rukat. Antu a pa chirung cha Yesu ading ni yibachikin ya choy ni ya ris, ashadisha musangar wau ni alika kusend mpand ya Yesu. (Yoh. 6:25-27, 51, 60, 66; Fil. 3:18, 19) Ku mutambu ukwau, antu ading nich rukat rakad choy mulong wa Nzamb ni mulong wa amutej nau asenda mpand nich musangar mu mwom wau wawonsu panap pa divu, nich ruchingej ra kusal pamwing ni Kristu mwiur. Mudi awiy, tukudandamen kusend mpand ya Yesu nich musangar anch tukwet yibachikin yiwamp.

21. Kukwatijan ni Mateu 6:31-33, tuchingejin anch Yehova ukutwish kusal ik?

²¹ Cha kasatu, ikal ni ruchingej ruwamp. Twatonda mwom wa kwipan ni wa kusal mudimu ukash. Yesu watakela kutubabesh anch akez katuzengol. Pakwez tuchingejin anch Yehova ukutwinkish usu chakwel tutwish kujijamen chakamish chawonsu. Anch twadandamen kujijaman tukwikal akash. (Jak. 1:2-4) Tukutwish kuchingej kand anch Yehova ukutwinkish yom tuswirikedina, Yesu ukutulam, ni akadivar nau anambaz netu akutukasikesh. (Tang Mateu 6:31-33; Yoh. 10:14; 1 Tes. 5:11) Tukwet yom yawonsu tukweta nich kuswir mulong wa kupandakan yikokujol!

22. Tukutwish kwikal ni musangar piur pa yom ik?

²² Mband wokau kudi Yesu wikala ukasikeshinau dichuku diayerikay. Pakwez ukutwish kudandamen kwikal ukasikeshinau chikupu ching anch wikala mwin kwilej ushinshamena wa Kristu. Utongin anch mband winou wasala ik? Anch watonda kusend mpand ya Yesu, tongijokin piur pa difut diafanyinay kwikal nich​—kusal pamwing ni Yesu mwiur! Yom yawonsu yashay mulong wa kumulondul Kristu yikutwishap kwilikan ni yiyukish yikutambulay. Ruchingej retu rikala ra kuya mwiur ap ra kushakam panap pa divu, tukutwish kwikal ni musangar nakash mulong twitiya kutazuk kwa Yesu kulondina anch: “Ezany kudi am!”