“Itwikany Mpand Yam”
1 Tutanin rongoj rakin kusutil ku kwitiyij diladikij dia Yesu ni kwipimish kudia mwi mpand yiney, mu mangand manam mizwila too mar ni yakamish. (Mat. 11:29, 30) Mu kwitiyij mpand ya kwikal mwin kwilej mudi kand kusal mudimu ukash ni utudishina. Mudi kand kulejan rusang ruwamp ra Want ni kuyikwash antu akwau atana kwipimish pamwing niyetu mwi mpand ya Yesu yiswakela.—Mat. 24:14; 28:19, 20.
2 Kwipimish Kudiokila ku Mudimu: Yesu kayitap in kwilej end ayiwejinaku kand ku chisend chadingau nich. Ndiy wayitazuka atula yisend yau yilimina chakwel asend chendendiy chiswapela. Yakamish ni kuburen ruchingej ra ditenchik dined dia yom kiyitwakamishinap kand; ni kitwimeshinap kand mar ma kusurab mapit ma chamwamu. (Luka 21:34; 1 Tim. 6:17) Ap anch tukwatiken ni tufanyidin tusala mudimu chakwel tutana yiswirikedina mulong wa dichuku ni dichuku, kumwifukwil Nzamb kwawiy kufanyidina kwikal pa ndond ya kusambish mu mwom wetu. (Mat. 6:33) Tukuuman mudimu chisu chawonsu mudi kwipimish, kangal mudi chisend, ching anch twikal nich chitongijok chitentamina pa yom ya usey.—Filip. 1:10.
3 Chakin, tukat kusanger kulond yom yitwija mu muchim wetu anch yidi yakin. (Luka 6:45) In Kristu awonsu akat kuta muchim nakash piur pa Yehova ni yiyukish ya Want yashilayimu Yehova. Komb, chidi kwipimish mudi ik kwisambin piur pa “rusangu ruwamp” ra yom yiwamp ni kudjibwil kwa yakamish yetu ya dichuku ni dichuku pitulejena rusangu ruwamp! (Rome 10:15) Chakin kamu, mu chilik tusadina chom kanang, chawiy tukwikal nich nkeu ya kuchisal ni chawiy kand tukuchisangera. Chawiy lel, kwipan nakash mu mudimu, pitutwishina, kukutuletin kwipimishaku kukwau. Chisangareshining mudi ik anch muntu kanang witiyij malejan metu! (Mid. 15:3) Ap anch twayitan antu akad kusanger ni ap twatan rupompat, mudimu ukutuletin kwipimish muspiritu anch twalam mu manangu anch usu utusadina umusangareshin Yehova ni anch chibudikin chin chawonsu chiwamp chikwikalaku mulong wa chiyukish chend.—Mid. 5:41; 1 Kor. 3:9.
4 Anch twitiyij diladikij dia Yesu, tukwitapil dilau dia kusal pamwing nend mudi Atuman a Yehova. (Isay 43:10; Kubur. 1:5) Kwikil chom chikutwisha kulet kwipimish chipandakenamu!