“Jikitishany mu Yom Yawonsu”

OV, WIMENING amwiney anch uding mwin kujikitish? Chinech chidi chipul chifanyidinay muntu ni muntu wa pakach petu kwiyipul. Bibil watakela kulejan anch antu avud mu chirung chetu akwikal “akad kujikitishang.” (2 Tim. 3:2) Pamwing ap wamenap kal antu akimbining anch ching antu akwau ayisadinang awiy ap kuyinkish. Chimeken anch iyoviling anch kakwetap kwau kuswir kwa kujikitish piur pa yom yikatau kutambul. Ov, niyey wajingunin kal anch chisangareshiningap kushakam pamwing ni antu a mutapu winou?

Chinyim ni chinech, antu a Yehova ayilejin anch: ‘Ikalany in kujikitish.’ Tufanyidin “[kujikitish] mu yom yawonsu.” (Kol. 3:15; 1 Tes. 5:18, TMK) Chawiy chidi chiwamp kukudish mwikadil wa kujikitish. Kudi mayingishin mavud matubachikina kusal mwamu.

KUJIKITISH KUKAT KULETANG MUSANGAR

Diyingishin dimwing ditubachikina kwikal ni mwikadil wa kujikitish didi anch kukat kutukwash kwikal ni musangar. Anch muntu wajikitish ukat kwovang kamu yisu yimwing musangar, ni muntu utambwila kujikitish ukat kwovang niyend musangar. Mulong wak kujikitish kukat kutusangareshang ayinetu ni antu tujikitishina? Shinshikin chilakej ech: Anch muntu witekin chisu cha kusal chom kanang mulong weyey, chinech chimekeshin anch uwanyidin kukusadin chom chinech. Ukubangidin. Anch wajingunin chom chinech, ukutwish kusangar. Chimeken anch Rut niyend wiyova mwamu. Bowaz wamukwasha Rut. Pakad kwidjidjek Rut wova musangar nakash pajinguninay anch kwading muntu umubangidina.—Rut 2:10-13.

Chidi cha usey kumujikitish pakampwil Nzamb. Chakin kamu, yisu yimwing ukat kutongijokinang pa yipan yivud ya mu spiritu ni ya ku mujimbu yakwinkishinay kal ni yidandamedinay kukwinkish. (Kuv. 8:17, 18; Mid. 14:17) Pakwez pa ndond pa kutongijokin kwau piur pa kuwap kwa Nzamb, itekina chisu cha kutongijokin chikurikina pa yiyukish yivud yakwinkishinau kal ey ni akatish ney kudi Nzamb. Kutongijokin pa muchim wa kupan wa Sakatang wey kukukubachik kumujikitish chikurikina ni kuman kamu chakin anch ukukatin ni ukubangidin.—1 Yoh. 4:9.

Tufanyidin kutongijokin pa yom yitwinkishinay Yehova ni tufanyidin kumujikitish. (Kus. 100:4, 5) Alondining anch “kuyijikitish antu akwau kukat kusal anch antu ova musangar.”

KUJIKITISH KUKAT KUKASIKESHANG URUND

Diyingishin dikwau dimekeshina anch kujikitish kudi kuwamp, didi mulong kukat kukasikesh urund. Etu awonsu tukatining kutujikitish. Anch wamujikitish muntu mukwau nich muchim wa kashinsh mulong wa yom yiwamp yisadinay, chinech chikusal anch wikalany arund awamp. (Rom 16:3, 4) Chikwau kand, antu akata kujikitish ading yisu yivud antu akata kuyikwash akwau. Akat kushinshikin yom yiwamp yiyisadidinau ni kupwa akat kwiyov abachikinau kuyikwash antu akwau. Chakin kamu, kuyikwash antu akwau kukat kulet musangar. Yidi kamu mudi yom yalonday Yesu anch: “Chiyukish cha mwin kupan chipandakenamu cha mwin kutambul.”—Mid. 20:35.

Pading pilejinau chikurukina piur pa kujikitish ku Iniversite wa Californie, Robert Emmons nkwash wa muntu wading utakedina kukimbijol kwinoku walonda anch: “Mulong wa kwikal mwin kujikitish, tufanyidin kwijik anch mu mwom tukat kukwashijanang. Yisu yimwing tukat kuyinkish akwetu ni yisu yikwau akwetu niyau akat kutwinkish etu.” Uyakin udi anch mulong wa kudandamen kwikal mwom ni kwikal ni musangar mu mwom, tukwet kuswir kwa antu akwau. Chilakej, akutwish kutwinkish yakudia ap kutukwash kwiyokish. (1 Kor. 12:21) Muntu mwin kujikitish ukat kusanger kamu yom yikatau antu akwau kusal. Chawiy, ov, ukweting chaku cha kuyijikitish antu akwau mulong wa yom yikusadidinau?

KUJIKITISH NI MUTAPU WEY WA KUMAN YOM MU MWOM

Diyingishin dikwau dia kwikal mwin kujikitish didi anch kujikitish kukat kutubachik kushinshikin pa yom yiwamp pa ndond pa kushinshikin pa yom yiyimp. Mu kufanakesh, manangu mey makat kusal mudi chom cha kutaat nich. Makat kusal anch ushinshikin pa yom yimwing yidia yiwamp ni kulik kushinshikin pa yom yidia yiyimp. Ufanyidin kutal pa yom yiwamp ni kudiul yom yiyimp. Anch udi mwin kujikitish nakash, ukushinshikin kand pa yom yiwamp ni chinech chikukubachik kwikal mwin kujikitish chipandikena. Anch wikal mwin kushinshikin pa yom yikutwisha kukubachik kujikitish, chinech chikukukwash kusal yom yalonday kambuy Paul anch: “Sangarany machuku mawonsu mwi Nsalejetu.”—Fil. 4:4.

Kwikal mwin kujikitish kukat kukwash kulik kutong mu mutapu uyimp. Chikasiken nakash kwov mukau, ushon ap ujim anch tudi in kujikitish. Antu in kujikitish kakatap kand kushinshikin nakash pa yom ya ku mujimbu. Akat kusanger yom yikwetau ni kakatap kurish mulong wa kwikal ni yom yivud nakash.—Fil. 4:12.

TONGIJOKIN PA YIYUKISH WATAMBWILA KAL!

Mulong udi mwin Kristu, wij anch Satan ukukat anch yakamish urishina nich yikuziyish ni kukunenganesh mu machuku minam ma nsudien. Ndiy ukukat nakash anch ey wikal ni chaku cha kuman yom mu mutapu uyimp ni kwikal mwin kwinan piur pa chom chawonsu. Anch ukwet mwikadil winou, chikuyikasiken antu ulejina rusangu ruwamp kukutesh. Chimeken anch mwikadil wa kujikitish ukwatijadin ni dibuj dia spiritu wa Nzamb. Chilakej, tukweting musangar mulong tumen yom yiwamp yatusadidinay kal Nzamb ni tukwet ritiy mu kushilamu kwend.—Gal. 5:22, 23.

Mulong udi umwing wa antu a Yehova, chimeken anch witiyijin yom yitwisambina kal kwiur oku piur pa kujikitish. Pakwez, tuvadikiningap nich mwikadil wa kujikitish ni wa kuman yom mu mutapu uwamp. Ap mwamu, kangal waziy. Ukutwish kukudish ni kulam mwikadil wa kujikitish. Mutapu ik? Itekina dichuku diawonsu chisu cha kutongijokin pa yom yimwing mu mwom wey yikutwisha kukubachik kujikitish. Anch wikal mwin kusal mwamu, yovil ya kujikitish yikutwish kwiyezin ayinau. Chinech chikukwovish musangar nakash kusutamu antu akata kushinshikinang pa yakamish yau. Tongijokin pa yom yiwamp yikusangareshina yisadinay Nzamb nau antu akwau mulong wa kukukasikesh. Ukutwish kand ap kuyifund yom yiney. Pakach pa yom yiney ukutwish kushinshikinap yaad ap yisatu yikubachikina kwikal mwin kujikitish dichuku dinidia.

In kukimbijol amwing alondin anch: “Kwikal in kujikitish chisu chawonsu kukutwish kuswimp mutapu usadining wong wetu ni chikutwish kutuswapel kusanger mwom.” Muntu mwin kujikitish uding mwin musangar. Chawiy, tongijokin pa yom yawonsu watambwila kal, sanger yom yiwamp yishikedina mu mwom wey, ni chisu chawonsu ikal mwin kujikitish! Pa ndond pa kuman yom yiwamp mudi ukwet mbil ya kuyitambul, “[mujikitisha Yehova], mulong ndiy udi muwamp.” Inge, “jikitishany mu yom yawonsu.”—1 Jsng. 16:34; 1 Tes. 5:18, TMK.