Ov Tukutwish Kupan Ukwash?
1 Mupostol Paul wayikasikesha yid ya chikumangen ‘kulamijan chidi ni chikwau kukwashijan.’ (1 Kor. 12:25) Chawiy lel, tufanyidin kumekesh kutongin akwau ni kusot kupan ukwash nich rukat pichiswiridikina. Chilikej, pakach petu, anambaz amwing a muspiritu akat kulil aan mu uyakin ayinau. Anambaz inay itwikin chisend chawonsu cha kuyifundish aanau. Chakin kamu anch afanyidin dikasikesh dietu dia rukat ni ukwash ufanyidina ‘kuyikwash nich yom yiswiridinau.’ (Rom 12:13a) Ov tukutwish kuyikwash?
2 Mitapu Tukutwisha Kuyikwash: Kuyikwash antu afanyidina kukandam motak ja antu awonsu kushik ku yikumangan ap ku yikunguril kukutwish kulamin dijuku dined nfalang jimwing jivud. Maku ukwashinau kulam aanend akemp ku yikumangan ukutwish kutambul ukwash wa kukumangan kwawonsu. Chawiy kand chimwing, ukwiyov nawamp anch amukwash payilay ni kulejan pamwing ni aanend. Anch twayitongin aan nich muchim umwing, anch twikal arund nau, tukutwish kwikal ni dipwichik dimwing diwamp padi awiy. Tutazukangany chisu chimwing ni chikwau dijuku mudia nvaj wilidila aan kwez ku dilejan dietu dia dijuku: chinech chikukasikesh dijuku dined muspiritu.
3 Tubabalany: Tufanyidin kutal nawamp anch kangal twamushindil muntu ukwash anch umen anch kauswiridinap. Tusotinap kwiyandjik mu milong yayen ya dijuku pitupanina ukwash. Chidi chakin anch anambaz ni antu atijadina kal adi mu mwikadil muwamp nakash mulong wa kupan ukwash kud nambaz uuswiridina.
4 In Kristu awonsu ayikasikeshin ‘kulondul njil ya kwak aeny’ ku umwing ni mukwau. (Rom 12:13b) Kupan ukwash kud akadivar netu ni anambaz a muspiritu udi umwing wa mu mitapu yivud ya kumekesh anch tukwet rukat ra Ukristu pakach petu. —Yohan 13:35.