“Amband asadila mudimu ujim wa nsalejetu”
1 Mazu madia kwiur am, madi mazu masadilay Paul, padingay ni kwisambin Trifen ni Trifoz, anambaz aad asala mudimu ujim mu chikumangen cha Rom. Piur pa mukwau, Perisid, walonda anch: “Wasadila mudimu ujim wa Nsalejetu.” Wisambina kand mutapu uwamp Febe mud muntu “wakwasha kal antu avud.” (Rom 16:2, 12) Mifund yisambidin Dorkas mud chilikej cha mband umwing ‘wizwila sens nich midimu yiwamp ni ya riy yadingay ni kusal.’ (Mid. 9:36) Amband a muspiritu mud inay adi chiyukish ku chikumangen.
2 Ov ukat kuyijikitish anambaz a mu chikumangen chen asadila mudimu ujim? Asadiling mudimu ujim mu kulejan, akat kutakelang malejan mavud ma Baibel, ni kuyikwash antu avud achidia asu. Itekidining kand chisu chivud mu kuyikwash an kuya kurutu muspiritu. Amband in Kristu akwashining chakwel rukat, musangar, chisambu, ni mushiku yikala mu chikumangen. Mulong wa ukwash wau mu mitambu kushalijan, amfumwau ni yidi yikwau ya dijuku yikutwish kwipan nakash mu mudimu wa Yehova.
3 Anambaz adia mu mudimu wa chisu chawonsu: Pakach pa antu asadila mudimu ujim wa Nsalejetu padi anambaz adia amishoner; avud akwashin mu kusambish kwa mudimu mwi ngand jivud. Mu yikumangen yendidilau kud amfumwau, amband a atulam in kwendangan akat kwipan nakash mu chingand ni kuyikasikesh anambaz avud. Kangal twayivuramen anambaz asadila mudimu wa Betel, asadil mudimu utumbila nich mushiku mulong wa kukwash dirijek dia Yehova. Ni anambaz adia ayibol a rawonsu akwashina tunan twa antu kwijik uyakin nich usu wau ukatau kusal nich kushishaman mulong wa kumushiman Nzamb.
4 Amband inay ashishamena akwet musangar ujim mu mutapu upaninau mwom wau. (1 Tim. 6:6, 8) Afanyidin kamu kujikitish kwetu, kukasikesh kwetu ni ukwash wetu.
5 Amband in Kristu adi ukwash wa usey mu dirijek dia Yehova, asadil mudimu ushishamena uletina chiyukish kud awonsu. Tudandamenany kuyijikitish amband mud inay ni kumwit Yehova ayiyukisha, mulong “asadil mudimu ujim wa Nsalejetu.”