Mutapu wa kukulish ukaliweny wa kutong
1 Dizu “kutong” dirumburikin “kusadil yitongijok, chakwel kumwitiyish muntu kanang.” Chakwel kurijek mulad wa mudimu wetu, chitufanyidin kurijek ukaliweny wetu wa kutong nau antu twambambina nau. (Mid. 17:2-4) Ov mutapu ik tukutwisha kukulish ukaliweny wa kutong?
2 Cha kusambish, kutongin: Pitwilejina uyakin wa Baibel, chidi cha usey kutongin yitwilejina. Anch chitongijok kanang chimeken mudi chitukasikedin, twitekinaku chisu cha kukimbol ni kutongin yakul yitumena. Tukimbany kutesh kangal kusu yirumburil yiletinau, pakwez kand yitongijok ya Baibel yikwatikeshina yakul yiney.
3 Chiwapidil kwirijek mulong wa kulejan: Tonginany mutapu tukurumburila uyakin ku milad ya antu kushalijan. Chakwel kuvuvurish kusanger kwa mwin kwisamb netu, chitufanyidin kwipul chipul chimwing chitongishina. Tukimbany chipul chimwing chikutwishisha kudandamen nich chitongijok cha Baibel chikutukwasha kutong. Tutonginany yikangesh misamb yitukutwisha kusankan ni mutapu wa kuyakwil. Tutondany mu mukand utupanina chitongijok chimwing chijim chambatena nich misamb.
4 Tulondulany chilikej cha Yesu: Yesu washa chilikej chimwing chipandakena kuwap piur pa mutapu wa kutong. Tushinshikinany mafundish mend nich kuchirikin rusangu ridia mu Luka 10:25-37. Tal yikunku kushalijan: (1) Kupwitin yitongijok ku Baibel pitwakwila ku yipul. (2) Kumwit muntu twisambina nend kulejan yitonginay, ni kumujikitish paletinay yakul yovikena. (3) Kukasikeshin kutanijan kudia pakach pa chipul chipwilau ni mufund wa Baibel anch Mifund ni chipul yitanijadin nawamp. (4) Kusadil chilikej chimwing chasidina muchim chakwel kumutwishish muntu kutesh nawamp kurumburil kwa chakul.—Tal Tour de Garde wa Rish 1, 1986, paj 27-8, paragraf 8-10.
5 Tusadilany yom ya mudimu yitukweta: Buku Comment raisonner à partir des Écritures amusadin mulong wa mudimu wa kulejan. Mazu ma kusambish nich misamb madiamu, yakul ku yikangesh misamb, ni yitongijok yidiamu yitukwashin kukulish ukaliweny wa kutong. Buku winou chidi chom chimwing cha mudimu cha usey chitufanyidina kwikal nich chisu chawonsu mu chingand ni tufanyidinap ap pakemp kwidjidjek kumusadil pitusambishina misamb ya Baibel. Tuchirikinany paj 7-8 wa buku chakwel kuman mutapu wa kumusadil mulad uwamp nakash.
6 Ukaliweny wa kutong ukutwikalish ni mabuj nakash mu mudimu wetu wa kulejan ni mu kufundish kwetu. Ukupan yiyukish yivud nakash kud in kulejan ni kud antu itukata kusankan mu chingand.