Ov, Ukat Kusadilang Buku Comment raisonner?
1. Mutapu ik wadingau kambuy Paul ni Yesu, kuyilej antu akwau?
1 Kambuy Paul wasalanga usu wa kulond “nau yom ya mukand wa Nzamb.” (Mid. 17:2, 3; 18:19) Wamwimburija Yesu padingay ni kusal mwamu, Yesu wadinga ni kujimbul chisu chawonsu Mifund ni kusadil yilakej mulong wa kuyikwash in kumutesh atesha nawamp rusot ra Nzamb. (Mat. 12:1-12) Buku Comment raisonner à partir des écritures amusala mulong wa kutukwash ni yetu tusadila mifund.
2. Ov, mutapu ik tukusadila buku Comment Raisonner mulong wa kurijek mazu mawamp kusambish nich?
2 Kurijek Mazu Mawamp ma Kusambish Nich: Mu buku Comment raisonner à partir des écritures mudi mazu mawamp ma kusambish nich pa paj wa 9-15. Kwilej ni kusadil mazu ma kusambish nich ma mitapu kushalijan, pakampwil anch ukat kulejanang chisu chawonsu mu teritwar wey, ku kukukwash wijika mazu kushalijan ma kulond mu mudimu wey ukwikal nich nkeu ja kusambish nich mambamb. Ukutwish wamatang mazu ma kusambish nich mu buku chisu chiulejena kusutil ku telefon ap piulondidila ku kamikro kadia mudi ka televizion katekinau ku chis cha rupang ku yikumbu yilaminau nakash.
3. Yom ik yidia pa paj wa 16-24 mu buku Comment raisonner yikutwisha kutukwash mu mudimu?
3 Kupandakan Yikangesh Mambamb: Ov, ukutwishap wasambel kutongijokin piur pa yikangesh mambamb yikutwisha kulank mu teritwar wey chakwel witekinaku minit yikemp kurutu uya mu kulejan chakwel ushinshikina yakul yidia pa paj wa 16-21? Ov, in yikumbu amwing akutwish ikal in Buda, in Hindu, Ayuda ap Amizilima? Anch mwawiy chidia, jinsangu jidia pa paj 21-24 jikutwish kutukwash.
4. Ov, mutapu ik tukusadila buku Comment Raisonner anch ipul chipul ap kwalank jinsangu jiletininga ntad?
4 Kwakul Yipul: Buku Comment Raisonner ukutwish kutukwash chisu chipwilingau yipul ap palangwishiningau jinsangu jikata kuletish ntad. Ukutwish wamulej muntu anch ukimbin umuleja chom chimwing chisangareshina piur pa rusangu riner ni kupwa budish buku wey Comment Raisonner. Mulong mitu ya milong ayilongil kulondwish alufabe, tal mutu wa mulong ujim utongidina anch mwawiy mudia jinsangu jiuswirikedina. Kupwa, tal yipul yifundilau nich mamuny majim majaurikina. Anch umenap swa yom ukimbina, tal ku index udia kwisudiel kwa buku. Anch watan jinsangu jiuswirikedina, jitanga kamu mudi mujidia mu mukand winou. Anch wisambidinany mufund kanang, ukutwish kutang yiuswirikedina pa paj 445 palondila anch “Textes bibliques souvent mal compris.”
5. Mitapu ik yikwau kand ya ukwash ya kusadil buku Comment Raisonner?
5 Mitapu Yikwau ya Kusadil: Amwing asendining buku Comment Raisonner payilingau ku midimu ap ku shikol mulong wa kuyikwash kwakul ku yipul mudi yiney, ‘Mulong wak en ukusalanganyap misambu ya machuku matumbila?’ Ansand amana kal anch jinsangu jidia mu mutu wa mulong ulondila anch “Création” ni “Evolution” jidi ja ukwash mulong wa kurijek jinsangu ja ku shikol. Ov, ukumwendin muntu uyedina ap wafishina mukatish nend? Yom yidia mu mutu wamulong ulondila anch “Encouragements” yikutwish ya kukwash usadila Mifund chakwel umwongoja. Mu buku Comment Raisonner mudi kand jinsangu jikutwisha kuyikwash antu arijekina madiskur ni akata kutakel yikumangan ya mudimu wa chingand.
6. Rutong ik tukwetinga pa chisu tulejena?
6 Chisu tulejena, rutong retu ridiap kusu ra kupandakan ntad; ni kiridiap kwau ra kwambulijan yitongijok. Tusotining tulonda kamu nawamp yom yidia mu Mifund. Anch twasadil nawamp buku Comment Raisonner, tukumekesh kamu anch tubabedil pa malejan metu.—1 Tim. 4:16.