It ukwash
1 Mazu “makez kwikal ma mar,” madi mazu mapepidilau marumburila kamu chirung chetu chikash. (2 Tim. 3:1) Chawiy lel, chom ik ukutwisha kusal chisu chiukweta matat makash muspiritu ni kutong anch ukutwishap kurish nich?
2 Ov usotin kwisamb ni mwin Kristu wakudila kal muspiritu mu chikumangen? Amwing akutwish kwidjidjek kusal mwamu mulong wa usany, ni kulik kusot kushindil, ap kwikal ni ntad ku muchim anch muntu kampand ukutwish chakin kumukwash. Mwaning, tufanyidin kusal usu wa kukwat nich makas maad yisend yetu mutapu uwamp, pakwez tufanyidin pichuku pichuku kuman anch tukwet want ipau wa kukimb ukwash mu milong yitadila kuwap kwetu kwa muspiritu.—Gal. 6:2, 5.
3 Pa kusambishin: Ukutwish kusot kwisamb ni ntakel wen wa dilejan dia buku ni kumwit anch ukutwish kusadil nend pamwing mu chingand. Chinech chikukwinkish chisu cha kumulej rusot rey ra kuya kurutu muspiritu. Anch udi nkwash’a midimu, muleja kuswir kwey kwa ukwash wa muspiritu ni ndiy ukuyit amakurump chakwel akukwasha. Ukutwish ap kwisamb ni mukurump mwin mwawonsu ya milong yikutadila.
4 Ov ukwash wa mutapu ik ukweta nich kuswir? Ov kudi chom kampand chachirishina kwinyim mushiku wey? Ov udi nvaj ulidina an amwinend ni kupakish kuyilam an piswimp ni chikumangen? Ov udi ipal usotina ukwash? Ov kudi milong yikuchirishina kwinyim? Kushakam pa chirung chinech chikash kukutwish kwikal kukash—pakwez chikasikenap. Ukwash udaku.
5 Mutapu ukutwishau kukukwash amakurump: Amakurump akat kudimukin chakin. Akutesh milong yiukweta. Anch in kulejan akwau akwet milong ya chilik chimwing, amakurump akushinshikin chinech patakedilau ni kufundish chikumangen. Chidiau “chilik chiwamp kudi yisak ya amikoku,” adi tayad kusadil ney pamwing nich musangar. (1 Pita 5:3) Kuyitesh akadivar inay ija kal yivud pisambidinau yijidik ya Baibel kukutwish kurijek mudimu wey wa kulejan ni kukukwash mu mwom wey. —2 Tim. 3:16, 17.
6 Yesu watushila “yipan ya amakundj” avud. (Efe. 4:8, NW, note.) Chinech chirumburikin anch amakurump adi kwaku mulong wa kukusadil. Adaku mulong wa kukukwash. Mwaning, adi kamu ‘enen.’ (1 Kor. 3:21-23) Chawiy lel pa ndond pa kuchirikin kwinyim, isamba nau pakad kwidjidjek. Yita ukwash ukweta nich kuswir.