Tumwovany Yehova wom dichuku ni dichuku
1 “Wom wa Nzamb udi disambishil dia chiyul.” (Kus. 111:10) Ukat kutubachik kusal midimu yiwamp ni kutukwash kudjibwil kulemp yom yiyimp. (Jnsw. 16:6) Wom winou kadi kalimish kajim nakash kud Sakatang wetu, ukat kutubachik kwipuk kumunenganesh ni kumubwambwil. Chidi chom chimwing tufanyidina kukudish ni kumekesh dichuku ni dichuku.—Jnsw. 8:13.
2 Dichuku ni dichuku, spiritu wa mangand ma Satan usadidil usu ukash padi etu chakwel kututek mu jinjil jend jiyimp. (Efe. 6:11, 12) Mujimbu wetu wakad kuwanyin udi wa chitil ni ukwet chibachikin cha chivadik cha kusal yiyimp. (Gal. 5:17) Chawiy lel, chakwel kuziyil yijil ya Yehova, chakwel kwikal ni musangar, ni kutambul mwom, tufanyidin kumwov wom dichuku ni dichuku.—Kuch. 10:12, 13, NW.
3 Mu Hebereu 10:24, 25 TMK atukasikeshin kukumangan pamwing chakwel kukasikeshijan muntu ni mukwau “chipandikenamu mudi” pa chirung chinech chitushicha. Kukumangan kwakad kujing kudi kwa usey anch tusotil kupand mu machuku ma kwisudiel minam. Wom wetu wa kulik kumunenganesh Nzamb utubachikin kukumangan ku yikumangan ni kuman nich usey ujim rutong ra kukumangan kwinoku. Antu akata kumwov Nzamb wom amening yikumangan ya Ukristu mud chisend chimwing chitumbila.
4 Kuziyil ku chijil cha kulejan rusangu ruwamp ra Want udi mutapu ukwau tukata kumekesh wom wetu kud Nzamb. (Mat. 28:19, 20; Mid. 10:42) Rutong ra kusambish ra mudimu wetu wa kulejan ridi ra kuyikwash akwetu kukudish wom wa Yehova ni kuziyil ku rusot rend. Tukat kuwanyish rusot riner nich kusal kuchirikinamu kusu ni kusal usu wa kusambish malejan ma Baibel, ni kupwa kuyifundish akwetu yijil yawonsu ya Nzamb. Mu mutapu winou tumekeshin wom wetu kud Yehova ni rukat retu kud mutej netu.—Mat. 22:37-39.
5 Antu akad kumwov Nzamb wom akangeny kukudish ngikadil yimwing ya kusanger piur pa yom ya muspiritu, ni akat kuwil ku rinkind wa kujipan wa mangand, ap ngikadil wa manangu ma mangand. (Efe. 2:2) Chifanyidin chiyul chetu chijikishina chikal cha “kusadil mudimu wa kumusangarish Nzamb nich wom ni kalimish.” (Heb. 12:28, TMK) Chad lel tukez mwamu kuman yiyukish ya antu akata kumwov Yehova wom dichuku diawonsu.