Program Musu wa Chikumangan Cha Munyimuku

Dizu wom dirumburikin “kalimish kajim pantaliken ni Sakatang.” Winou udi kamu wom uwamp ujimbwilau mu Mifund mud “disambishil dia chiyul.” (Kus. 111:10) Pakwez, kudi kand mulad ukwau wa wom uyikedila mangand ma Satan matunyingumukina. Ov mutapu ik tukutwisha kwipuk chovil chinech chiyimp pitukudishina wom ukash pantaliken ni Yehova? Program musu wa chikumangan cha munyimuku cha muvu wa mudimu wa 2002 wakwil ku chipul chinech. Ukwet mutu wa mulong “Mwovany Nzamb Wom, Panany Uyaj Kudi Ndiy.” (Kuj. 14:⁠7) Ukutukwash kutesh mulong wak kumwov Yehova wom kudi kwa ukwash kud muntu ni muntu ukwash ni ku dirijek.

Ap anch wom ukutwish kulet chakamish ap kuburen kujijaman ni wom wa kurish nich mikadil yikash, Baibel ulondil anch: ‘Wayuk kwend muntu mwawonsu ukata kumwov Yehova wom.’ (Kus. 128:⁠1) Program wa chikumangan chinech ukez kutulej mutapu tukutwisha kupandakan yikangesh ya difukwil diakin. Tukez kuman kand mutapu wa kuyikwash antu asu kukudish wom winou uwamp wa Nzamb, chom chikuyikasikesha chakin kusot kumusadil ndiy nich muchim wau wawonsu, nich mupim wau wawonsu, nich manangu mau mawonsu, ni usu wau wawonsu. (Marko 12:30) Dichuku dia kusambish dikez kupwa nich diskur dia kalam wa distrik dikweta mutu wa mulong “Twikalany Pichuku Pichuku Piswimp ni Antu Itukatininga.” Ukez kuturumburil mutapu tukutwisha kushal adimukina ku usu wa Djabul wa kuturumbul kud Yehova, ku dijuku dietu, ni kud akadivar netu In Kristu.

“Mwovany Yehova Wom, Kangal Antu”, winou udi mutu wa mulong wa diskur dia yikunku yinying wa dichuku dia kaad. Mutu wa mulong winou ukez kurumburil mulong wak ni mutapu ik tufanyidina kupandakan mulad win wawonsu wa wom ukata kutukangesh kusal sens mudimu wetu ap kulam kushinshaman kwetu ni kwikal nich kom katok ku shikol ni kwi ndond ya mudimu. Diskur dia pibur “Mwovany Nzamb Wom ni Kulam Yijil Yend” dishindamedin pa kulondulijan kwa milong yirumburilau mu shapitre wa 14 wa Kujingunik. Chikumangan cha munyimuku chikez kupwa nich diskur dikasikeshina “Dandamenany Kwendil mu Wom wa Yehova.”

Tukwatany chiyul cha kulik kuburen ku yikunku yikwau yisangareshina, mud Shikol ya Mudimu ya Uteokras, chilikej cha Chikumangan cha Mudimu, diskur dia dibatish, ni diswipish dia dilejan dia Tour de Garde. Yitazuka antu ukata kwilej nau Baibel kwez ni kukumangan ney. Muntu mwawonsu usotina kubatishiu ufanyidin kumwijikish kalam-ntakel kurutu kwa chisu mud kamu chitwishikina. Etu awonsu tusotin kumekesh wom uwamp pantaliken ni Yehova ni kupan uyaj kud ndiy nich kulik kuburen chikunku ap chimwing cha program winou!