Kushindil kwa antu ushicha nau ni chisend chey cha kulejan
1 Kushindil kwa antu ushicha nau chidi chibachikin chikash—cha kusal yiwamp ap yiyimp. Ambayetu atushalapol a Yehova akwet chibachikin chiwamp chikata kutubachikin ku midimu yiwamp ya Ukristu. (Heb. 10:24) Pakwez, yid ya dijuku yakad kwikal Atuman, arund a mudimu, arund a shikol, amutej, ap antu akwau twijikijadina nau akutwish kutushindil kulondul njil yidia chinyim ni yijidik ya Ukristu. Akutwish ‘atusal masaal mulong wa yaku [yetu] yiwamp ya win Kristu.’ (1 Pita 3:16) Ov mutapu ik tukutwisha kulam chiyul chetu cha kudandamen kulejan kwikalap nchik kushindil kuyimp tukutwisha kusankan?
2 Yid ya Dijuku: Yisu yikwau, ikundj watena ni tatuku wakad kwikal umwing wa Atuman’a Yehova kakutwishap kusot anch mukajend nau anend abudikinang mu mudimu wa kulejan. Mwamu mwadinga mwikadil mu dijuku dimwing mu Mexico. Mband wa ikundj umwing ni an sambwad andama mu uyakin. Pa kusambish nfumwend wading ni kuyipompat mulong kakatap anch dijuku diend dilejanang ni kupan mikand ya Baibel ku chikumbu ni chikumbu. Wading ni kutong anch chinech chading ni kupwish kalimish kau. Pakwez, mukajend nau anend, ajijamana mu chiyul chau cha kumusadil Yehova ni kwikal pakad kujing mu mudimu wa kulejan. Pa kusut kwa machuku, ikundj wasambisha kuman usey wa kwitiy ditenchik dia Nzamb dia mudimu wa kulejan, ni ndiy wipana kud Yehova. Wasala mivu 15 chakwel kwitiy uyakin, ov wela kwitiy uyakin anch dijuku diend diadandamenap nich chisend chau cha kulejan?—Luka 1:74; 1 Kor. 7:16.
3 Arund a Mudimu: Amwing kakutwishap itiy anch uyinkisha uman. Nambaz umwing walondil anch pasambishau kwambambin piur pa nsudiel ya mangand mu Biro, amuswingisha mulong wayileja kutang Mateu shapitre 24. Pakwez, kwinyim kwa machuku makemp, umwing wa arund nend a mudimu wamuleja anch watangin shapitre winiwa ni kushimok nakash. Wapana mukand, ni kwirijek mulong wa kwilej Baibel ni murund nend ni nfumwend. Kwilej kwa kapamp ka kusambish kwalaba kushik asaa aad a pamanch. Kupwa kwa dilejan dia kasatu, asambisha kwez ni kukumangan, ni kupwa alika kuna ruwand ni kusambish kubudikin mu mudimu wa kulejan. Ov chinech chela kushiken anch nambaz kasalap usu chakwel kwambambin ruchingej rend ni akwau?
4 Arund a Shikol: Yisu yivud ansand Atuman akat kusankanang kushindil kwa antu adiau nau ku shikol ni kwikal ni wom anch ansand akwau akuyiswingish mulong wa mudimu wa kulejan. Mukristu umwing changadim wa dikum dia mivu mu Etats-Unis walonda anch: “Nadinga ni wom wa kupan uman kud akwetu ansand mulong nading ni wom wa kwinsip.” Chawiy lel wadinga ni kwipuk mitapu ya kupan uman kud antu adinga ni kumushindil ku shikol ni mu teritwar. Ov mutapu ik ukutwisha kukudish ukash wa kujijamen kushindil kwa antu tushicha nau? Engamin padi Yehova, ni kukimb kwitiyik kwend. (Jnsw. 29:25) Sanger mu ukaliweny wey wa kusadil Dizu dia Nzamb mu mudimu wey. (2 Tim. 2:15) Changadim twajimbulanga wasambisha kulembil kud Yehova, ni kumwit chakwel amukwasha kukudish rusot ra kwambamb ni arund nend a shikol. Wasambisha kupan uman wa kukashimun ku shikol, wamana mabuj mawamp, ni wadinga katat ni kwambamb ni antu awonsu adinga ijay. Upwishidil anch: “Ansand inay aswiridin ni asotin ruchingej mulong wa machuku ma kurutu, ni Yehova ukat kutusadil mulong wa kuyikwash.”
5 Amutej: Tukutwish kwikal ni amutej ap antu akwau twija amekeshina ujim pad etu mulong wa mwikadil wetu ni yitiyij yetu. Anch wovil wom mulong wa yitongijok yitonginau, iyipula bil amwiney anch: ‘Ov ij uyakin utwadila ku mwom wa chikupu? Ov chom ik nikutwisha kusal chakwel kuyishik ku muchim?’ Kalam wa munyingumuku umwing walonda anch kuding yibudikin yiwamp anch tupanin uman kud amutej nich kubabal. Mwita kamu nakash Yehova mulong wa ukash uswiridikina ni manangu chakwel kudandamen kukimb antu a kashinsh.—Filp. 4:13.
6 Kuziyil kwetu ku kushindil kuyimp kwa antu tushicha nau kukutwish kuyisangaresh akankuny, pakwez ov usotil kusal mwamu mulong wa ukwash wau upandakena kuwap—ap mulong wetwetu? Yesu amupompata kud antu a mu dijuku diend. Wajijamena ap kand kuchirol kwa anchend. Pakwez wading wij anch ukutwish kuyikwash ching kusu anch washal wakin mwi njil yimutekidinay Nzamb. Chawiy lel, Yesu ‘wajijamena mar mu makas ma akayitil amupompata.’ (Heb. 12:2, 3) Tufanyidin kusal chilik chimwing. Kwat chiyul cha kusal chisend chey chijim cha kulejan rusangu ra Want. Anch wasal mwamu, “ukez kwipandish ey amwiney pamwing nau antu akuteshila.”—1 Tim. 4:16.