“Alej a Dizu dia Nzamb” Chikunguril cha Distrik cha Atuman’a Yehova cha 2001
1 Muprofet Isay urumburil Yehova mud Mulej Mujim, mu mutapu wa Tatuku ukasikeshina anch: “Yiney yawiy njil. Endilanyimu, en antu.” (Isa. 30:20, 21, NW) Pakwez mutapu ik tukata kutesh mazu ma Yehova malondilau mulong wa ukwash wetu? Yehova ulondining ni antwend kusutin mapaj ma Baibel ni mikand ya pa dishin dia Baibel, yikumangan, yikumangan ya munyimuku ni yikunguril ya distrik yitenchikinau kud “kashalapol wakin ukweta manangu.” (Mat. 24:45) Tukutwish kumujikitish Yehova mulong wa kudandamen kututakel mwi njil tufanyidina etu kwendil.
2 Muvu ni muvu, chikunguril cha distrik chitwinkishining chisu cha kukumangan nau ambayetu akaritiy ni kuta matu ku mafundish ma Yehova. Muvu wasutina ou, antu 1 428 139 akumangana ku Yikunguril ya Distrik yikasikeshina muspiritu “In Kusadil a Dizu dia Nzamb.” Mu 2001, akusal Yikunguril ya distrik ya machuku masatu yikweta mutu wa mulong “Alej a Dizu dia Nzamb” mu Congo-Kinshasa ni mu Congo-Brazzaville.
3 Yikunguril yetu ya distrik ya 2001 yikutwinkish chisu chikwau cha kumushiman Yehova pamwing ni ambayetu “ajingunina uzweny wau muspiritu” ni asotina nakash ‘kutesh yilondina spiritu ku chikumangen.’—Mat. 5:3, NW; Kuj. 2:29.
4 Ov tukwikalaku? Tusambishany kwirijek kudiosh kamu katat. Tukwatany chiyul cha kukumangan machuku masatu ma musambu uwamp winou wa muspiritu, kudiosh ku muminy wa kusambish kushik ni ku dilembil dia nsudiel. Yisu yivud, akutazukin kukumangan ku chikunguril cha piswimp ni kolikwey. Sosait usadin usu wawonsu utwishikina chakwel yom yikuswapela. Awejidinaku ndond jikwau jisu kwi ndond ja muvu wadap ou mulong wa kumukwash muntu ni muntu pakach petu kwidishil pamwing muspiritu ni dijuku diend. (Kuv. 31:12, NW) Katat chawiy chisu cha kusambish kulam nfalang jifanyidina mulong wa weny wen. Amwing asala usu ufanyidina mulong wa kukumangan ku chikunguril cha distrik cha 2000. Nambaz umwing, ni nfumwend ni anau aad asala 150 Km ra pansh mulong wa kushik ndond ya chikunguril. Nambaz wading ni madikaj piswimp ni kuval ni wading ni kuchingel mwanend wa kasatu mu rubing ra chikunguril. Pakuman in kuya ku chikunguril akwau akat kuya chayikasikesha, dijuku dined diakwata chiyul cha kukas weny. Kushik mu 70 kilometre ni kolikwend, nambaz wavala mwan muwamp mukash. Uchuku, dijuku dined diadandamena nich weny wau ni diashika kurutu kwa chisu pa ndond ya chikunguril chakwel kukumangan ku yikunku yawonsu mu machuku masatu. Tukumekesh kujikitish kwetu mulong wa usu usadinay Sosait nich kusal yawonsu tukutwisha mulong wa kukumangan ku chimwing cha yikunguril yikusadika mu 2001.
5 Ndond ya kulal: Ndond ya kulal yiding chisu chivud yikumbu ya antu a chijikan. Tufanyidin kumekesh kujikitish kud akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila kuyak kwayakinau kwinoku mutapu uyimp ni kwit anch ayiladika machuku mavud kurutu ap kwinyim kwa chikunguril. Ndond ya kulal ayipanining ching kamu pa chisu cha chikunguril. Antu inkinau ndond ya kulal mud yiney afanyidin kulimish yom ya muntu wayakanga, pikil kuyipish chom ap chimwing, kangal aya kwi ndond kwakadau kuyitazuk, ni kutal nawamp anch anau asala chilik chimwing. Anch antu atwakina akwet matat kanang ku mutambu winou, afanyidin kapamp kamwing kwijikish departema wa ndond ya kulal, ni departema winou ukusangar kupan ukwash wend. Kusadil kuwamp ni kuwap kwa departema wa ndond ya kulal kwimanyidin pa kusadil pamwing kwa muntu ni muntu. (Heb. 13:17) Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund- nau ap muntu wa chijiken nau. Chinech chikat kurumbangesh mudimu wa akadivar a departema wa ndond ya kulal. Tukwitinany amboku en awonsu kusadil pamwing ni departema winou.
6 Chakin anch Yehova upanining ukwash wend ku yisadilau mulong wa yikunguril ya muvu. Mud akadivar avud chikatau kukas weny wa kuya ku chikunguril cha distrik chikwetau kuswir kwa ndond ya kulal, tukutwish kwitiy chakin anch Yehova ukuwanyish nswir jau mutapu ufanyidina. Milong yiney chiyitadila difukwil diakin, tufanyidin kulondul nich musangar yany yipaninau. Tumekeshin anch tudi in kushinshaman mu tuyom tukemp; tukutwish chad lel kutambul yisakin yivud yichingedina antu amukatina Yehova. — Luka 16:10.
7 Kuyitongin antu akweta nswir ja pakampwil: Amapal ap ayilim, atushalapol a chisu chawonsu ap kand antu akwau, chitwishikin anch aswiridin ukwash mulong wa kukumangan ku chikunguril. Anamakwau, amakurump ap yid ya chikumangen ija mwikadil wau wa pakampwil, akutwish nich rukat kusal yifanyidina, ni kwipuk kusha chisend chau pa mutu wa akadivar arijekina chikunguril.—Tal 1 Timote 5:4.
8 Kwirijek mulong wa kwikalaku machuku masatu: Ov Satan ukat kupakij kukuzuwol kutek muchim ku yom ya muspiritu? Cha ushon, akadivar avud nau anambaz ni majuku mau akat kuburenang yakudia yipandakena kuwap ya muspiritu. Mutapu ik? Mulong wa kuburen kukumangan ku yikunku ya Diakatan. Pa chisu cha yikunguril yimwing, chameken anch akadivar nau anambaz avud aburena mafundish ma muspiritu ni urund wa akadivar welau kutwish kwisakin pa chisu cha yikunku ya Diakatan. Chimeken anch amwing achirikin kwinyim mulong wa kukumangan ku yikunguril mulong ayiya ku chikumbu chau chisu chadiau aburedin ku chikumbu. Mulong wa kwipuk wij, amwing itenchikin chakwel yid ya dijuku yakad kwikal mu ritiy yilama ku chikumbu pa chisu chikumangenau ku chikunguril ni anau.
9 Ov kuwap ik tukata kumen ku yikunguril yetu? Mukadivar umwing washikau ku muchim nich dram ukweta mutu wa mulong “Yilikej Yibabeshina pa Chirung Chetu” walonda anch: “Mutu wa mulong winou ufanyidin pa chirung tushicha, chirung chifanikena ni cha in Isarel mwi mpay padingau piswimp ni kwandam mwi ngand ya kushilamu. Yitil yasalau in Isarel yidi chilik chimwing ni yisadinau antu nlel, mud kwifukwil akish (kwifukwil antu a katumb) ni kusotan. Chawiy lel dram winou utubabeshin.” Ov niyey difundish didiokila ku dram winou diakushikin?
10 Dipwishil: Muchishejina chisu piswimp mulong weyey kukumangan ku chikunguril chey cha distrik, chisala wikala mulong wa kulembil kwey kud Yehova chakwel utwisha kwikal ku yikunku yawonsu mu machuku mawonsu masatu ni kutambul ukwash ujim udiokila ku program. Ov witin kal konje ku mudimu mulong wa machuku masatu ma chikunguril usotina kukumangan? Anch kand kal, sal mwamu pichitwishikina kamu katat. Kwit kwa konje machuku makemp kurutu kwa chikunguril kakatap kukwitiy yisu yivud. Kashalapol wakin ukweta manangu warijekin muvu unou Chikunguril cha Distrik “Alej a Dizu dia Nzamb” mulong wa kutufundish muspiritu ni kukasikesh ritiy retu. Chawiy lel sambish kwirijek katat kamu ak chakwel kukumangan, nich kulondul chiyul cha mwin kuseng anch: “Muyukishany Nzamb mu kukumangan”!—Kus. 68:26.
[Caption on page 3]
[Box on page 3]
Program
Diakatan ni Diampos
9h:30—17h:00
Diarubing
9h:30—16h:00
[Caption on page 4]
[Box on page 4]
Yitenchik yimwing yifanyidina kusal mulong wa kukumangan ku yikunguril “Alej a Dizu dia Nzamb”
1. Anch ufanyidin kukas weny umwing ulemp mulong wa kukumangan ku chikunguril, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwatikesh dirijek dia chikunguril nich milambu yey. ‘Kangal muntu ap kusu umwing kwez kwimekesh kurutu kwa Yehova makas a makas,’ pakwez ‘mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Tukutumbish kand dijin dia Yehova anch twikal ni ngikadil muwamp pa chisu cha yikunguril ni kwikal ni yidjal yinangina ni yifanyidina.—1 Kor. 10:31.
4. Jijaman kusadil pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yid ya dijuku diey ap antu wezina nau pamwing.
5. Pa yisu ya kupim, ukutal nawamp anch udia yakudia yipipela mulong wa kutwish kwisakin sens yikunku ya urel. Yakudia yilimina yikat kuzedishanang tul.—Luka 8:18.
6. Kwinang kumulimishining Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikunguril yinangina nich kunonol mapapel ni yom yikwau yifanikena nich mulong wa kuyidjibul mu mashitil matekilau mulong wa yishoshot.—1 Pita 1:15, 16.