“In kusadil dizu dia Nzamb” chikunguril cha Distrik cha Atuman’a Yehova cha 2000
1 “Nikakujikitishil mu kukumangan kujim, nikakushiman mukach mwa antu avud.” (Kus. 35:18) Tonginap bil mutapu welangay kusangar David nlel pa kuman tunan ni tunan twa antu akumangena pamwing mu chisambu mulong wa kutambul mafundish ma Nzamb ku chikunguril chetu! Ov wadinga pakach pa antu 250,000 ni kusut akumangana ku chikunguril cha distrik “Dizu dia Uprofet dia Nzamb”? Kudiosh pakach pa ngond wa sambwad kushik ku chikunku cha nsudel cha ngond wa chinan 1999, atenchikin kusal yikunguril 77 mu misumb 59 ya mu République démocratique du Congo ni mu Congo-Brazzaville.
2 Mu Kuseng 122:1 mwin kuseng walonda anch: “Am nasangara panlejau anch, tuyany ku chikumbu cha Mwant Nzamb [Yehova, NW].” Chakin anch wadinga ni musangar wa chilik chimwing piwatambula dipapel dia mukach (wenjil) dia Mudimu Wetu wa Want wijikisha mulong wa chikunguril cha distrik. Chakin anch uchivurikin yom yiwamp yitwileja ku chikunguril chinech. Mu mivu chitot ya kusambish, mupostol Pita wayivurisha in Kristu anch akutwish kusal nawamp kuta matu ku dizu dia uprofet mud “mwend ukata kumunyik mwi ndond ya mididim.” (2 Pita 1:19) Chidi kand chilik chimwing kudi etu nlel. Chitushicha mu mangand mamwing matakedilay Satan, tujikitishin nakash pa kututazuk kudiokal mu mididim ya muspiritu. (Kol. 1:13; 1 Pita 2:9; 1 Yohan 5:19). Chakwel kushal mu chitokish, chifanyidin kulam ritiy rimwing rikash nich kuta muchim ku Dizu dipepidilau dia Yehova. Mwamu kamu mwatukasikeshina chikunguril chetu kusal.
3 Ov antu akumangana ku chikunguril chinech ashikena yadingau ni kuchingel? Mauman mavud mamekeshin anch program winou wadinga chakin ufanyidina mulong wa chirung tushicha. Mukadivar umwing wafundin anch: “Program wa chikunguril ukwinkwash kubabal nich kuburen kuwanyidin kwam chakwel nitwisha kuchingel dichuku dia Yehova pakad manans ma mangand.” Mukadivar mukwau wasala kal mivu yivud mu uyakin walonda anch: “Program winou utuchirishin mwi njil yifanyidina. Utukwashin kuman anch tudi pichuku pichuku ku mutambu uwamp.” Mukwau walondil anch: “Anch twatal mwikadil ukash utwinkokidina nlel, kinatongap anch nikutwish kwikal ku chikunguril mud chinech. Chikunguril chinech chatulejin anch tudi chakin mu umwing mu ritiy kwikalap nchik yintampu yitwaurila. Yehova udi mwin kupan ni ndiy kamu rukat. Ukat kututongin.” Ov twinanin mulong wa usu utwasadina chakwel kukumangan ku chikunguril muvu unou? Bwat kwau.
4 Yikunguril yetu ya distrik ya 2000 yikutwinkish yisu yikwau yisu ya kumushiman Yehova pamwing ni ambayetu “ajingunina uzweny wau muspiritu” ni asotina nakash ‘kutesh yilondina spiritu ku chikumangen’—Mat. 5:3, NW; Kuj. 2:29.
5 Ov tukwikalaku? Tusambishany kwirijek kudiosh kamu katat. Tukwatany chiyul cha kukumangan machuku masatu ma musambu uwamp winou wa muspiritu kudiosh ku muminy wa kusambish kushik ni ku dilembil dia nsudel. Yisu yivud, akutazukin kukumangan ku chikunguril cha piswimp ni kolikwey. Sosait usadin yawonsu yitwishikina chakwel yom yikuswapela. Awejidinaku ndond yikwau yisu kwi ndond ja muvu wadap ou mulong wa kumukwash muntu ni muntu kwidishil pamwing muspiritu ni dijuku diend. (Kuv. 31:12, NW) Katat chawiy chisu cha kusambish kulam nfalang jifanyidina mulong wa kuman mutapu wa kufut ditike dien. Amwing asala usu nakash mulong wa kwikal ku chikunguril cha distrik cha 1999. Mukadivar umwing ushichinga ku akilometre 300 washika ra nking ni mwanend mwi ngoj. Wadiokala mu ul wend machuku masatu kwinyim kwa rufu ra mukajend wafa pa kuval. Kupwa kwa kupan mwan kud atatuwenend, mukadivar, mukurump, wakasa weny wa kuya ku chikunguril kwasalay kand diskur! Tukumekesh kujikitish kwetu mulong wa usu usadinay Sosait nich kusal yawonsu tukutwisha mulong wa kukumangan ku chikunguril chikwikalaku mu 2000.
6 Ndond ya kulal: Ndond ya kulal yiding chisu chivud yikumbu ya antu a chijikan. Tufanyidin kumekesh kujikitish pantaliken ni akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila rak riner mutapu uyimp ni kwit anch ayiladika machuku mavud kwinyim kwa chikunguril. Ndond ya kulal ayipanining ching kamu pa chisu cha chikunguril. Antu inkinau ndond ya kulal mud yiney afanyidin kulimish yom ya muntu wayakanga, pikil kuyipish chom ap chimwing, kangal aya ndond kwakadau kuyitazuk, ni kutal nawamp anch anau asala chilik chimwing. Anch antu atwakina akwet matat kanang ku mutambu winou, afanyidin kapamp kamwing kwijikish Departema wa ndond ya kulal, ni departema winou ukusangar kupan ukwash wend. Kusadil kuwamp ni kuwap kwa Departema wa ndond ya kulal kwimanyidin pa kusadil pamwing kwa muntu ni muntu. (Heb. 13:17) Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund nau ap muntu wa chijikan nau. Chinech chikat kukadangesh mudimu wa akadivar a Departema wa ndond ya kulal. Tukwitinany amboku en awonsu kusadil pamwing ni departema winou.
7 Chakin anch Yehova upanining ukwash wend ku yisadilau mulong wa yikunguril ya muvu. Akadivar avud chikatau kukas weny wa kuya ku chikunguril cha distrik chikwetau kuswir kwa ndond ya kulal, tukutwish kwitiy chakin anch Yehova ukuwanyish nswir jau mutapu ufanyidina. Milong yiney chiyitadila difukwil diakin, tufanyidin kulondul nich musangar yany yipaninau. Tumekeshany anch tukwet kashinsh mu tuyom tukemp tukemp; tukutwish chad lel kutambul yisakin yivud yichingedina antu amukatina Yehova.—Luka 16:10.
8 Kuyitongin antu akweta nswir ja pakampwil: Amapal ap ayilim, atushalapol a chisu chawonsu ap kand antu akwau, chitwishikin anch aswiridin ukwash mulong wa kukumangan ku chikunguril. Anamakwau, amakurump ap yidi ya chikumangen ija mwikadil wau wa pakampwil akutwish nich rukat kusal yifanyidina, ni kwipuk kusha chisend chau pa mutu wa akadivar arijekina chikunguril.—Tal 1 Timote 5:4.
9 Kwirijek mulong wa kwikalaku machuku masatu: Ov Satan ukat kupakij kukuzuwol kutek muchim ku yom ya muspiritu? Cha ushon, akadivar avud nau anambaz ni dijuku diau akakuburenang yakudia yipandakena kuwap ya muspiritu. Mutapu ik? Nich kuburen kukumangan ku yikunku ya Diakatan. Pa chisu cha yikunguril yimwing, chameken anch akadivar nau anambaz avud aburena mafundish ma muspiritu ni urund wa akadivar welau kutwish kwisakin pa chisu cha yikunku ya Diakatan.
10 Chitwishikin anch akadivar amwing akat kwidjidjek kwisamb ni mukurump wau wa mudimu mulong wa kwit chisu cha kuya ni kukumangan ku chikunguril. Ov mwamu chidia ku mutambu wey? Ov mulong wak ukutwishap kulembil kud Yehova ni kumwit ukash wa kumurumburil mukurump wey wa mudimu mwikadil wey? Vurik chibudikin chiwamp cha Nehemi, wadinga mu mwikadil wa chilik chimwing. (Neh. 2:1-6, NW) Ijik anch Tatukwey wa mwiur usotin kukukwash, anch watek pa ndond ya kusambish nswir ja Want wend, ndiy ukuwanyish yawonsu yiuswiridina mu mwom.—Mat. 6:32b, 33.
11 Ov kuwap ik tukata kumen ku yikunguril yetu? Nambaz umwing wa kwingangel kwa États-Unis wafundin anch: “Twajikitish nakash mulong wa chikunguril cha distrik cha 1999. Kumanijan nau akadivar ni anambaz nikata kuman kusu kapamp kamwing ku muvu kwinletidin musangar ujim. Chisu nijika uyakin nadinga changadim,nadinga ni madikaj, ni katat nichivurikin kand nich musangar ujim pantwalay nambaz utwadinga ni kwilej nend Baibel kapamp kam ka kusambish ku chikunguril. Pitwadinga ni kuwang muminy ‘Des Myriades des frères,’ mu dibur dined, nazambula mes natal mwiur (ku madj), nadila. Niyipula: ‘Antu awonsu inay adi awamp, ov mutapu ik ukutwishay Yehova kwitiy muntu mud am?’ Dichuku dinidia nakwata chiyul cha kumusadin sens Yehova.” Chisangarishin mud ik! Chidi chakin cha musangar kwibomb pamwing nau atushalapol a Yehova, ov kimwawiyap?
12 Chitushicha pa chikunku cha nsudel cha machuku ma kwisudiel, tuswiridin kamu nakash yikunguril yetu ya distrik ya muvu ni muvu. Didi ditenchik dia Yehova mulong wa kulam mwom wetu wa muspiritu ni kwisakan kwetu muspiritu. Chawiy, twikwatinany chiyul cha kukumangan machuku masatu ma Chikunguril chetu cha distrik cha muvu unou, chikweta mutu wa mulong “In Kusadil Dizu dia Nzamb.” Ov mutapu ik ukutwisha kushiken chiyul chey? Mwita mukurump wey wa mudimu kurutu kwa muten chisu chiukutwisha kudiokal ku mudimu mulong wa kuya ni kukumangan ku chikunguril chawonsu. Anch nfalang jikasiken, sambish kudiosh kamu katat kusal usu wa kutek nfalang jifanyidina mulong wa kukumangan. Mwita Yehova akukwasha kupandakan yikangesh yawonsu. Anch wasal mwamu, ukutwish kuchingej kuman urund wa chirungil wa akadivar nau anambaz ni kutesh mazu ma mwom wa chikupu madiokila kud Tatukwetu wa mwiur ukweta rukat, Yehova.—Tal Yohan 6:68.
[Caption on page 3]
[Box on page 3]
Program
Diakatan ni Diampos
9h:30 – 17h:00
Diarubing
9h:30 – 16h:00
[Caption on page 4]
[Box on page 4]
Yitenchik yimwing yifanyidina kusal mulong wa kukumangan ku yikunguril “in kusadil dizu dia Nzamb”
1. Anch ufanyidin kukas weny umwing ulemp mulong wa kukumangan ku chikunguril, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwatikesh dirijek dia chikunguril nich milambu yey. ‘Kangal wakamekan kurutu kwa Yehova wakad chom ku makas,’ pakwez ‘mulimisha Yehova nich yom yey yawonsu ya usey.’—Kuv. 16:16, NW; Jnsw. 3:9.
3. Tukutumbish kand dijin dia Yehova anch twikal ni ngikadil muwamp pa chisu cha yikunguril ni kwikal ni yidjal yinangina ni yifanyidina.—1 Kor. 10:31.
4. Jijamen kusadil pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yidi ya dijuku diey ap antu wezina nau pamwing.
5. Pa yisu ya kupim, ukutal nawamp anch udia yakudia yipipela mulong wa kutwish kwisakin sens yikunku ya urel. Yakudia yilimina yikat kuzelishang tul.—Luka 8:18.
6. Kwinang kumulimishining Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikunguril yitok kusutin kunonol mapapel ni yom yikwau yifanikena nich mulong wa kuyidjibul mu mashitil matekilau mulong wa yishoshot.—1 Pita 1:15, 16.