“Panany Uyaj Kud Nzamb” Chikumangan cha Distrik cha Atuman’a Yehova cha 2003
1 Yehova wapana mbil kusutin kud muprofet wend ushinshamena Isay anch: “Tangany matu kud am, En antwam; ni yey muchid wam, tang matu mey kud am.” (Isa. 51:4, NW) Mu chisu chinech cha kwisudiel cha mar makash, ov twitiyidinap anch kuta matu ku yijil ya Yehova kudi kwa usey nakash kupandakanamu muchidinga mu yisu yikwau? Njil yimwing mutukata “kuta matu” kud Yehova yidi kusutin ku kuziyil ku chijil chend cha kukumangan mulong wa kwifukwil. Tuchingedin kamu nakash chisu chinech cha pakampwil chipanina yikumangan yetu ya distrik ya pa muvu! Chisak Chitakedila cha Atuman’a Yehova chakwatin kand yitenchik chakwel asala yikumangan yivud ya distrik mu teritwar wetu mu muvu wa 2003.
2 Mud muchilejenau mu nimero wa Tour de Garde wa Kafunfut 1, 2002, kukez kusadik kand yikumangan ya mangand mu misumb kanang yitondinau, ni in kukumangan akez kudiokal ku jindond kushalijan ja mangand. Mulong kudi kusu misumb yikemp mukusadinau yikumangan ya mangand, ching kusu yikumangen yikezau kutum ku yikumangan yiney yawiy yikeza kutwish kukumangan. Pakwez mikadil yiwamp ya yikumangan ya mangand yikez kumekan ku yikumangan yawonsu ya distrik. Kukwikal amishoner mu jindond jivud jikusadinau yikumangan, ni kukez kwikal mutapu wa kutesh yimwing ya yom yamanau. Chom ik tukutwisha kusal chakwel kutaninamu ukwash uvud udiokila ku yitenchik yirijekinau katat mulong wa yikumangan yetu?
3 Kumangan Dichuku ni Dichuku: Chakwel kutaninamu ukwash uvud udiokila ku malejan mapaninau kusutin ku chisak cha kashalapol wakin ukweta manangu, tufanyidin kutal nawamp anch tukumangen ku chikumangan mulong wa kulondul program mwawonsu wa kabuj. (Mat. 24:45) Ov ukwet kuswir kwa kumwit mukurump wey wa mudimu konje mulong wa kukumangan dichuku ni dichuku dia chikumangan? Kurutu Nehemi amwita Mwant Artaxerxes mbil ya kuya ni kutungiril jibumbu ku Yerusalem, ndiy “walembila kud Nzamb wa mwiur.” (Neh. 2:4, NW) Chilik chimwing kamu niyey ufanyidin kulembil kud Yehova mulong wa kukankaman chakwel kumwit mukurump wey wa mudimu konje mulong wa kukumangan machuku mawonsu masatu ma chikumangan. Ov chikwikal nchik anch mukurump wey wa mudimu kasotinap kukwinkish konje? Pamwing ap ukutwish kumurumburil anch, malejan tukata kutambul ku yikumangan yetu makat kutukwash kwikal antu akin, in kusal mudimu nich mushiku, ni in kusal mudimu a kashinsh kukutwish kumukwash kwakul nawamp. Chikwau kand, anch tukwet yid ya dijuku yakad kwikal akaritiy, chikez kwikal cha rukat kuyijikish program wa chikumangan chetu kurutu kwa chisu mud kamu chitwishikina.
4 Ndond ya Kulal: Arijekin kal chakwel anch antu ezina ni kukumangan ni akweta kuswir kwa ndond ya kulal atwish kuman ndond ku yikumbu ya antu a chijiken. Tufanyidin kumekesh kujikitish kud akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila kuyak kwayakinau kwinoku mutapu uyimp ni kwit anch ayiladika machuku mavud kurutu ap kwinyim kwa chikumangan. Ndond ya kulal ayipanining ching kamu pa chisu cha chikumangan. Antu inkinau ndond ya kulal mud yiney afanyidin kulimish yom ya muntu uyakina, pikil kuyipish chom ap chimwing, kangal aya kwi ndond kwakadau kuyitazuk, ni kutal nawamp anch anau asala chilik chimwing. Anch antu amwing atambwila angendj aman anch angedj akwet matat kanang , afanyidin lel kapamp kamwing kwijikish ku Departema wa Ndond ya Kulal, ni departema winou ukusangar kupan ukwash wend. Kusadil kuwamp ni kuwap kwa Departema wa Ndond ya Kulal kwimanyidin pa kusadil pamwing kwa muntu ni muntu. Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund nau ap muntu wa chijiken. Chinech chikat kurumbangesh mudimu wa akadivar a Departema wa Ndond ya Kulal. Tukwitinany amboku en awonsu kusadil pamwing ni Departema winou.
5 Chakin anch Yehova upanining ukwash wend ku yom yisadilau mulong wa yikumangan ya muvu. Mulong akadivar avud akata kukasang weny wa kuya ku chikumangan cha distrik akweting kuswir kwa ndond ya kulal, tukutwish kwitiy chakin anch Yehova ukuwanyish maswir mau mutapu ufanyidina. Milong yiney chiyitadila difukwil diakin, tufanyidin kulondul nich musangar yany yipaninau. Tumekeshany anch tudi in kushinshaman mu tuyom tukemp, ni tukutwish chad lel kutambul yisakin yivud yiyichingedina antu amukatina Yehova.— Luka 16:10.
6 Tushinshikinany Adia mu Chikumangen: Anch twij anch mukadivar ap nambaz ukwet kuswir kwa yom kanang ya ku mujimbu yikutwisha kumukangesh kukumangan ku chikumangan, ov tukutwishap kwazuril “michim” yetu nich rukat ni kupan ukwash kanang? (2 Kor. 6:12, 13; Kuv. 15:7) Chawiy chitongijok chakasikeshinay Paul mu 2 Korint 8:14. Ov mulong wak kulik kuyitazukap antu mud inay kuya nau pamwing ku chikumangan? Anch adi ayibol, chakin kamu akwikal nich jinsangu jivud jitambwilau mu mudimu wa kulejan ja kushimunin chisu chiyilau mu weny. Anch adi amapal (antu ananapina kal) a mu chikumangen, akutwish kwikal nich rusangu ripandakena kuwap ra uteokras riwakad kal ey kuteshangap. Ov kwikal pamwing nau akadivar ni anambaz inay kukutwishap kwikal nich chibachikin chiwamp pad ey ni dijuku diey? Akusanger muchim wey wa kupan ni ukez kutambul difut kud Yehova.—Jinsw. 28:27; Mat. 10:42.
7 Ap anch antu akweta maswir ma pakampwil afanyidin bil kuyikwash kud anamakwau adia in Kristu, amakurump ni yid yikwau ya chikumangen ija mwikadil wau akutwish kuyikwash nich rukat kwirijek. (1 Tim. 5:4) Anch atumin Komite wa Midimu wa Chikumangen fomu Demande de chambre pour cas particulier, komite ufanyidin kushinshikin nawamp anch mwin kwit mwawonsu uwanyishin yitinau kurutu kwa kumupan ku Departema utadila milong ya ndond ya kulal.
8 Twitiyany Kamu Kusal Mud Mwin Kwikatin: Chisu cha chikumangan, yitot ya in kwikatin yikat kwipanang kamu swa nich kusadil kuwamp kwa madepartema. Akat kuyikwash in kukumangan mwi ndond ya kukumangen ni ndond ya kutek miotak ni jinking mu kupan umutakel mulong wa kutan ndond ya kushakam ni kulam miotak yetu ni jinking muten wawonsu wa kabuj. Departema utadila milong ya Kwinang ukwet chisend cha kulam katumb ketu kawamp mulong wa kwinang, kulam pa ndond yetu ya difukwil pinangina kupandakanamu mutapu padinga kurutu kwa kupasadil. Ov tukutwish kuyikwash, ov madepartema makwau makutwishap kwikal nich kuswir ni ukwash wetu? Ov ukez kupan ukwash wey amwiney chakwel kusadil “chikij ku chikij” pamwing nau akadivar ney?—Sof. 3:9, NW.
9 Tukwet kuswir kwa yikumangan yetu ya distrik chakwel yitukwasha kushal ababela muspiritu, mulong ‘yom ya mangand minam yikat kukarumok.’ (1 Kor. 7:31) Kusal yitenchik chakwel kukumangan dichuku ni dichuku kukez kwit usu, pakwez kudi kwa usey. Chikumangan cha Distrik cha muvu unou “Panany Uyaj Kud Nzamb” achirijekin mulong wa kutukwash kushal ajijamena pituchingedina dirumburish dia Yehova piur pa mangand ma Satan. Kangal twashil chom ap chimwing chitukangesha kutambul malejan maturijekidinay Yehova.—Isa. 51:4, 5, NW.
[Caption on page 3]
Program
[Caption on page 3]
[Picture on page 3]
Diakatan ni Diampos
9:30: pamanch — 5:00: urel
Diarubing
9:30: pamanch — 4:05: urel
[Caption on page 4]
[Picture on page 4]
Manans mamwing ma kushinshikin pa kuya ni kukumangan ku Chikumangan cha Distrik “Panany Uyaj Kud Nzamb”
1. Anch ufanyidin kukas weny umwing ulemp mulong wa kukumangan ku chikumangan, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwatikesh dirijek dia chikumangan nich milambu yey. ‘Kangal muntu ap kusu umwing kwez kwimekesh kurutu kwa Yehova makas a makas,’ pakwez ‘mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Tukutumbish kand dijin dia Yehova anch twikal nich mwikadil uwamp pa chisu cha chikumangan ni kudjal maswin minangina ni mafanyidina.—1 Kor. 10:31.
4. Jijaman kusadil pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yid ya dijuku diey ap antu wezina nau pamwing.
5. Pa yisu ya kupim, ukutal nawamp anch udia yakudia yipipela mulong wa kutwish kwisakin sens yikunku ya urel. Yakudia yilimina yikat kuzedishanang tul.—Luka 8:18.
6. Kwinang kukat kumulimish Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikunguril yinangina nich kunonol mapaper ni yom yikwau yifanikena nich mulong wa kuyidjibul mu mashitil matekilau mulong wa yishoshot.—1 Pita 1:15, 16.