“Munyikany kutok kwen”
1 Mangand matunyingumukina madi mu mididim ya mu manangu ni muspiritu. Kutok kwa uyakin kumekeshin patok “midimu yakad mabuj” ya mididim chakwel kutwish kwipuk yikangesh yiney yiletina rufu. Chawiy lel, mupostol Paul wayikasikesha Akristu anch: ‘Dandamenany kwend mud an a kutok.’—Efe. 5:8, 11.
2 “Mabuj ma kutok” madi kamu chinyim nich mididim ya mangand. (Efe. 5:9, Testament Musu ni Kuseng) Chakwel kusongish dibuj dined chitufanyidin kwikal yilikej yiwamp mu mwom wa Ukristu, chitufanyidin kwikal mutapu wa antu itiyidinay Yesu. Tufanyidin kand kumekesh ngikadil yiney mu kusal nich muchim wawonsu, kashinsh, ni kusanger mulong wa uyakin. Dibuj dined chifanyidin kudimekesh mu mwom wetu wa dichuku ni dichuku ni mu mudimu wetu wa kulejan.
3 Tumunyikany chisu ni chisu: Yesu wayileja in kwilej end anch: “Munyikany kutok kwen kurutu kwa antu.” (Mat. 5:16, TMK) Mu kumwilikej Yesu, tukat kumekesh kutok kwa Yehova nich kulejan piur pa Want wa Nzamb ni jintong jend. Tukat kumunyik mud chitokish pituyendidila antu kwolikwau ni pitupalangeshina uyakin ku mudimu, ku shikol, pakach pa amutej netu, ap ndond yin yawonsu tumena mutapu wa kulejan.— Filp. 2:15.
4 Yesu walonda anch antu amwing akukis kutok. (Yohan 3:20) Chawiy lel tukatap kuchirik kwinyim anch antu avud alik “kutok kwa katumb kawamp ka uyaj wa Kristu” kuyimunyikin. (2 Kor. 4:4, TMK) Yehova utangining mu michim ya antu ni kasotinap antu akata kusal yom yakad kutentam pakach pa antu end.
5 Anch twalondul jinjil ja Yehova ni kushakam mu kutok kwa muspiritu, tukutwish kuchimekesh kud akwetu. Anch ajingunin kusutin ngikadil yetu anch ‘tukwet kutok kwa mwom,’ ni yawiy akutwish lel kwikal abachikinau kukarumuk mutapu uswiridikina chakwel ikala in kulet chitokish.—Yoh. 8:12.
6 Anch twamunyik kutok kwetu, tukat kumushiman Sakatang wetu ni kuyikwash antu a kashinsh kumwijik ndiy ni kutambul ruchingej ra mwom wa chikupu. (1 Pit. 2:12) Mulong tukwet kutok, tuchisadilany amboku chakwel kuyikwash akwau kuman njil yakad mididim ya muspiritu ni kusal midimu yambatena ni kutok.