“Munyikany Kutok Kwen”
1. Ov, chom ik tukusala chakwel twikal nich chisend cha kulejan?
1 Kudiokal ku muten wa musas djat ni urel, kuwap kwa chimunyik chimekena ni mes kukat kumushiman Yehova Nzamb. Chikwau kand, kudi mutapu ukwau wa chimunyik chitinay Yesu in kwilej end chakwel ikal nich—“chimunyik cha mwom.” (Yoh. 8:12) Kwikal nich chitokish chinech cha muspiritu didi dilau dia pakampwil dikweta yisend yikash. Yesu walejena anch: “munyikany kutok kwen kurutu kwa antu,” chawiy chikukwasha antu akwau. (Mat. 5:16, TMK) Nlel unou mukach mwa mididim yikash ya muspiritu, kandikal kuswir kwikal kujim, ni chimunyik chinech chikutwish kulejan! Ov, mutapu ik tukutwisha, mudi Kristu, kumunyik kutok kwetu?
2. Ov, mutapu ik wamekeshay Yesu usey wa kulejan kutok kwa muspiritu?
2 Kusutil ku Kulejan: Yesu wasadila chisu chend, usu wend, ni mapit mend chakwel amekesh chimunyik cha uyakin kudi antu mu yikumbu yau, mu mabur majim, pa mikandu—kwawonsu kukutwishay kuyitan. Ndiy wija usey wa chikupu upaninau kudi chimunyik chakin cha muspiritu. (Yoh. 12:46) Chakwel kand ayilej antu avud, Yesu wayitenchika in kwilejend kwikal “chimunyik cha mangand.” (Mat. 5:14) Amunyika kutok kwau kusutil ku kuyisadil amutej nau yom yiwamp ni ku kusal mudimu wa kulejan uyakin wa muspiritu.
3. Ov, mutapu ik tukutwisha kumekesh kusanger kwakin mulong wa chimunyik cha uyakin?
3 Antu a Nzamb atambwil ni usey nakash chisend cha kwikal “nich yaku yiwamp mudi antu adia mu kutok,” ni akat kulejan kwawonsu kukutwishau kuyitan antu. (Efes 5:8) Kutang kusu Bibil ap mikand yikwau ya win Kristu kumeken patok ku mes kwa antu pa chisu cha mudimu ap cha kupim ku shikol ni kukutwish kwazuril njil ya kwisambin pa Mifund. Mwinjil yiney, nambaz umwing changadim wasambisha dilejan dia Bibil ni wapana mikand 12 kudi ambay nend a ku shikol!
4. Mulong wak ‘kumunyik kutok kwetu’ kwitin kand mwikadil ukweta chilakej chiwamp?
4 Kusutil ku Midimu Yiwamp: Kumunyik kutok kwetu kudi kand mulong wa mwikadil wetu wa pichuku-pichuku. (Efes 5:9) Ku mudimu, ku shikol, ni jindond jikwau jidingau antu, mwikadil wa win Kristu ukumekan yisu yivud patok ni ukutwinkish chisu cha kulejan uyakin wa Bibil. (1 Pita 2:12) Chilakej, mwikadil uwamp wa mwan nsand wa mivu yitan wamushikija mulej wend ku kutazuk anvaj end. Ndiy walonda anch: “Kand kal nimanap mwan udia nich mwikadil uwamp nakash mudi winou!” Mwaning, mudimu wetu wa kulejan ni mwikadil wetu uwamp yikat kuyipwitin antu ku “chimunyik cha mwom wakin” ni kumushiman Nzamb wetu.