Twikalany in kutesh awamp
1 Chakwel kutesh nawamp chifanyidin kwikasikesh nakash. Chitining kand kud mwin kutesh kwikal ni impu ya kwilej ni kuman ukwash udiokila ku yom yiteshinay. Pa chinech, Yesu wakasikeshina usey wa ‘kubabal, mutapu tukata kutesh.’—Luka 8:18, NW.
2 Chinech chidi kamu cha usey pitukata kukumangan ku yikumangan ya chikumangen, ya munyimuku, ni yikunguril. Yiney yiding yisu tufanyidina kutesh nawamp. (Heb. 2:1) Tal milong yimwing yikutukwasha kwikal in kutesh amwing awamp ku yikumangan yiney ya Ukristu.
◼ Tumanany yikumangan nich usey. Kudi mitapu yivud yikatau “kutufundish kud Yehova” kusutin “kashalapol wakin.”—Isa. 54:13, NW; Luka 12:42.
◼ Twirijekany kurutu kwa chisu. Tushinshikinany yom yikwisambinau, ni kutal nawamp anch tusendin Baibel wetu ni mukand wetu wa kwilej.
◼ Pa chisu cha yikumangan, tusalany usu wa pakampwil chakwel kwikuchik neeng mulong wa kutesh nawamp. Twipukany kwambamb nau antu tushicha nau pamwing ap kutal yisadilau in kukumangan akwau. Kangal twazuwol nich kutongin yom tukusala kupwa kwa kukumangan ap milong yikwau tukweta.
◼ Tushinshikinany yom yifundishinau. Twiyipulap ayinetu anch: ‘Ov yiney yintadil nchik? Ov chisu ik nikuyisadila?’
◼ Tufundany mu wiswimp milong ya usey ni maverse majimbwilau. Chinech chikutukwash kutek yitongijok yetu pa yom yisambidinau ni yikutukwash kuvurik milong ya usey chakwel kuyisadil machuku ma kurutu.
3 Yifundisha aney kutesh: An aswiridin mafundish ma muspiritu. (Kuv. 31:12) Pasak, “awonsu adinga ni manangu mawanyidina chakwel kutesh” pakach pa antu a Nzamb ading afanyidin kuta matu padingau ni kuyitangin Chijil. (Neh. 8: 1-3, NW) Anch anvaj akwatiken mu milong ya yikumangan ni kuta matu nakash, anau ni yawiy akat kusal chilik chimwing. Chiwapinap kuyiletin an yom ya kusengan nich ap mabuku ma yipich ya kutek ulomb mulong wa kuyisengesh. Kuyawol ku musalany kwakad kufanyin ni kwawiy kukat kuyikangesh kutesh. Mulong “usup aukasidil mu muchim wa mwanikanch,” anvaj afanyidin kukasikeshin anch anau ashakama pakad masok ni kutesh ku yikumangan.—Jinsw. 22:15.
4 Anch twikal in kutesh awamp, tukumekesh anch tukwet chakin manangu ni tusotil “kuwejuku kwilej.”—Jinsw. 1:5.