Ov Ukutwish Kusadil Ndond Yidia Kuswir Kujim?
1 Ov kand kal utonginap kushemunikin ndond jikweta kuswir kwa in kulejan avud? Ing anch akutazuk anch ‘ez . . . utukwasha,’ ov ukwitiy kuya mud mwasalay mupostol Paul? (Midimu 16:9, 10) Mu yikumangen yivud, mudi kuswir kwa majuku makudila muspiritu, ayibol mulong wa kuyikwash kuwanyish mwab wau, ap amakurump nau ankwash’a mudimu afanyidina mulong wa kukwash kutakel. Teritwar ukutwish kwikal ni mal makemp makemp madia kulemp kulemp. Chot cha Want chidia piswimp chikutwish kwikal kulemp nakash ku akilometre avud. Midimu ya ku mujimbu yikutwish kwikal ya kukimb. Chirung cha chisu chikutwishap kwikal chisu chawonsu chikatishena. Ov ukutwish kwitiy kukarumuk kwinoku kukash? Ov mutapu ik ukutwisha kupandakan pa chinech?
2 Kuswir Kwa Ritiy ni Ruchingej: Ku umutakel wa Nzamb, Aburaham wadiokala mu ul wau wa Ur ni kuya weny wa akilometre 1 000 kushik ku Haran, ndiy ni mukajend, mwipwend, ni tatukwend ipal, Tera. (Dis. 11:31, 32; Neh. 9:7, NW) Kupwa kwa kufa kwa Tera, Yehova wamuleja Aburaham, ukweta katat mivu 75, kudiokal ku Haran ni kuyisha anamakwend chakwel kuya kwi ngand yikezay kumulej Nzamb. Aburaham, Sarai, nend Lot ‘atumbuka ni kuya weny wau.’ (Dis. 12:1, 4, 5) Chakin anch Aburaham kashemunikap mulong wa kuya ni kusadil ndond yadinga yikweta kuswir kujim kwa in kulejan. Pakwez kushemunik kwend kwita chom kanang. Ov chom ik?
3 Chading chitin ritiy ni ruchingej kud Aburaham chakwel kupakish kusal mutapu winou. Yitongijok yend ni mwom wend yafanyidina kukarumuk. Ndiy wafanyidina kusha kand diking dia anamakwend. Pakwez wateka ruchingej rend mudi Yehova chakwel kumulam ndiy ni chikumbu chend chawonsu. Antu avud amekeshin chilik chimwing ruchingej rau mudi Yehova.
4 Midimu ya Chisu Chikemp: Ov wamanap kal yiyukish yikata kudiokal ku kusadil mudimu mu Teritwar wakad kupan kud muntu? Muvu wasutina ou in kulejan 5 699 a mwi ngand 48 jikweta mimbu ya piswimp piswimp, atwishin kulejan mu materitwar makad kupan kud antu 163 ni kusut pa materitwar 174 makad kupan kud antu. In kulejan akwau 5 676 akwashin yikumangen 380 kulejan mu teritwar mwawonsu mukatau kulejan pa chipatu. Kud antu amwing, chinech chayitin kuya weny ulemp nakash. Ov usu wasalau wadinga ufanyidina chakin?
5 Mukadivar umwing wa mu Californie waya ku Utah wafunda anch: “Pangitau kapamp kam ka kusambish kusend chirund ni kuya mu teritwar mukatau kulejan pa chipatu, nadinga ni kwidjidjek. Pakwez nakwata chiyul cha kwitiy mudimu. Chidiap kusu anch nikwinanangap, pakwez chakarumwin kal mwom wam. Nikat kumujikitish Yehova dichuku ni dichuku mulong wa chisend cha kwikal umwing wa chirund chinech chikata kushemunikang.” Mukadivar mukwau mu Florida wadinga ni kuya ku Tennessee walonda anch chading chivurikish chijim chikezay kuvurik mu mivu 20 yasalay kal mu uyakin! Nsangarum umwing wa dikum dia mivu wa mu Connecticut waya Kurand kwa Virginie walonda anch: “Winou wading uman upandikena kuwap mu mwom wam!” In kulejan avud itiyin anch kusadil ap chisu chikemp ndond yikweta kuswir kwajimbishin kusanger kwau mudimu wa kulejan. Isamba ni antu asadila mwamu. Ukez kuman anch awiy awejidinaku mwikadil wau wa muspiritu ni akutwish kand kuchisal anch kwamekan chisu.
6 Kwitiyang mudimu wa chisu chikemp mulong wa kusadil ndond yikweta kuswir kujim nakash kukutwish kukwash rutong rikwau. Antu akata kusal mwamu akutwish kutambul jinsangu ja ukwash jikuyikwasha “kurijek usey wa yom” mulong wa kushemunikin ndond yikwau ya ngand.—Luka 14:28.
7 Yehova ujijamen anch rusangu ruwamp ‘arulejan mu mangand mawonsu’ kurutu kwa disudiel dieza. (Mat. 24:14) Chiwija chinech, anch udi tayad, ov usotil kushemunikin ndond yikweta kuswir kujim nakash? Kuswir kudi mwi ndond jivud.
8 Kushemunikin Ndond Yikweta Kuswir Kujim Nakash: Ov watambwil kal panshon? Ov ukat kutambulang nfalang ngond ni ngond? Anch bwat, ov ukutwish kwirijek mulong wa mudimu wey amwiney? Ov ukutwish kushakam ndond yin yawonsu? Anch ukutwishap kushemunikin ndond yindjing, ov ukutwish kukwash chid cha dijuku diey kusadil ndond yindjing?
9 Anch kupwa kwa kushinshikin chom chinech mu kulembil nakash waman anch chiswapel kushemunikin ndond yikweta kuswir nakash, ukutwish kwisambin mulong winou ni dijuku diey kupwa kand nau amakurump mu chikumangen chen. Chad lel, fund mukand ni kuupan kud amakurump chakwel ni yawiy akutwish kuwejinaku yitongijok yau ni yiyul yau kurutu kwa kutum mukand ku biro wa mutiy.
10 Ov yom ik ukufunda mu mukand wey? Mivu yey ya kuvadik, dichuku dia ubatish, yisend ukweta mu chikumangen, anch waten kal, ni ap anch ukwet an achidia anikanch. Dijin dia ndond usotila kuya ni kusadil, kwambatan nich kuswir kwey. Chilikej, ov ukutwish kushakam ndond yikweta chirungil ni mashik nakash? Ov ukutwish kushakam ndond yizambukina nakash kwisikesh ni chilik cha wit? Ov ulondiling ndim kanang ja wingez?
11 Ov ukweting mushiku ni usu wa kukwat chiyul? Ov mikadil yey yikutwishishin kusadil ndond yikweta kuswir kujim nakash? Anch mwawiy, shinshikin kand mutapu Yehova mukatay kumwang yiyukish yipitishina pad antu akata kutek ruchingej rau mud ndiy pakatau kumekesh spiritu wa kwipan!—Kus. 34:8; Mal. 3:10, NW.