Dilejan Dia Buku Le plus grand homme de tous les temps

¹ Rubing ra Kafunfut 30, tukusambish kwilej buku Le plus grand homme de tous les temps ku malejan ma buku. Chikez kwikal cha musangar mud ik kushinshikin mwom ni mudimu wa Yesu Kristu! Buku winou amusala mulad umwing ushalijadina ni abuku akwau twilejina, yiyul kanang yikutwishap kwikal yamwamu bwat.

² Mapaj ma buku winou chimaburedina manimero, program udia mu Mudimu Wetu wa Want ulejen mashapitre ma kwilej, chisu chivud maad ap masatu ku rubing. Mashapitre 35, 111 ni 116 madi malemp nakash; akez kumangan shapitre ni shapitre mu yikunku yivud ya malejan. Kupwa kwa kutang shapitre mwawonsu kud mukadivar umwing chifuvu (ap maparagraf ma kamutu kakemp, chilikej mu mashapitre 35, 111 ni 116), ntakel wa dilejan ukwipul yipul yidia kwisudiel kwa shapitre ni yambatena ni shapitre ap ni chikunku chapwishau kal kutang. Yakul yilondulijadinap chisu chin chawonsu mu shapitre. Yirumburil, yiswimp ni yiwanyidina, yikwikal yishindamedina pa yidia mu shapitre.

³ Kupwa kand, anch chisu chidiaku, ukutangany mifund yawonsu yiletinau kwisudiel kwa shapitre. Mifund yilemp nakash ukutwishany kuyangan yikunku yikunku chakwel kuyitwishish in kulejan kushalijan kuyitang; kupwa akurumburil yom yatangau kal. Nich ukwash wa yipul yiwanyidina yikurijekay, ntakel ukez kulangwish yirumburil yifundishina yikumekesha kwambatan kudia pakach pa maverse matanginau nich yitongijok yikasikeshidinau mu buku. Yipul yawonsu ni yirumburil yawonsu yifanyidin kuyikwash in kukumangan kumusanger nakash Yesu Kristu, ku mwom wend ni mafundish mend.

⁴ Buku Le plus grand homme wisambidin mwom wa Yesu mutapu ulondulijadina jinsangu. Chikutwish kwikal cha usey nakash, chakwel kuvurik yinship, kutongijokin yom yiney ni kulam mu manangu ndond yayisadikina. Shinshikinany amboku yipich ya ulombu ni kuchirikin chisu chawonsu ku kart udia kwisambishil kwa buku, kupwa kwa mazu ma kusambish nich.

⁵ Mazu ma kusambish akez kumilej rubing ra kusambish. Kupwa kwa kutang maparagraf mawonsu madia mwishin mwa kamutu kakemp, ntakel ukwipul yipul yifanyidina yarijekinay. Yiyukish yibudikina ku kushinshikin buku yikwikamen nakash pa mutapu wa kwirijek kwa muntu ni muntu ukukumangana. Ntakel ufanyidin kamu kwirijek nawamp rubing ni rubing mulong wa kuyikwash yid ya chirund cha dilejan dia buku kumwijik nakash muntu mujim nakash wa yirung yawonsu, Nsalejetu ni Mupandish wetu, Yesu Kristu.