Ov Nikutwish kwit Ukwash Mwi Ngand ya Wingendj?

Yisu yimwing, in kulejan amwing akat kufundin mitiy ya Atuman’a Yehova yidia mu jingand ja wingendj chakwel kwit yom kushalijan. Chilikej, amwing akat kwipul chakwel kutan arund a kwifundin nau mikand, muntu wa kwatijan nend, maband kaset ap maband video, ni kwit kand mabaz. Tusotin muntu mwawonsu ijika anch mitiy yikutwishap kupwish milong yiney.

Sosait Watch Tower didi dirijek dikata kupan ukwash kudi antu adia mu kuswir, pakwez didiap dirijek mwa kukimbin ukwash wa yom kanang. Dikat kutambul ukwash wa nfalang kusutin milambu ya kwikatin yidiokila kud antu a mu mangand mawonsu mulong wa rutong rimwing kusu rakwel anch uruu wa Want wa Nzamb aulejana kud antu awonsu ashicha pa divu. (Mat. 24:14) Mutapu chidia mwamu, milambu yawonsu akat kuyisadilang mulong wa mudimu wa kulejan ni chawiy lel kakutwishap kuyisondjik kud antu.

Yisu yimwing ni yikwau antu akat kuyifundin arund ap kand atulam adia mwi ngand ja wingendj, mulong wa kwit ukwash wa yom ya ku mujimbu. Amwing pakad ap kwikal ni nfalang jifanyidina akat kukas weny kuya mwi ngand ya wingendj ap ku misumb yijim, ni kuchingejin kusu pa ngikadil ya kupan ya akadivar a mwi ngand ap mu musumb muchingejinau kushakam. Ov tukutwish kulond anch “machuku ma kwisudiel ma mar nakash” matukwatin ching kusu etu ni kimakwatinap antu akwau, ap kand akadivar netu a muspiritu adia mu yikunku yikwau ya mangand?​—⁠2 Tim. 3:⁠1.

Chikumangen cha Ukristu chikwet ditenchik dia kuyikwash antu adia mu kuswir ni antu akwachikina nich mar pakach petu. Ditenchik dined adirumburil mu buku Organisés pour bien remplir notre ministère, paj 122-123. Chawiy lel chifanyidinap kufundin yikumangen ni mitiy yidia mwi ngand ja wingendj chakwel kwit ukwash.

Chikwau kand, maadres ma yikumangen ni ma antu asadila ma abonema ku mutiy madi mafanyidina kulam nich ujindj ni madiap ma kupan kud antu akweta kuswir kwa kwikal ni arund a kwifundin nau ap mulong wa antu akimbina antu a kwatijan nau. Anch uyil kwendil mwi ngand yindjing, ukutwish kufundin biro wa mutiy wa ngand yiniya ni kwit adres wa Chot cha Want chidia piswimp ni yisu ya yikumangan.

Kuziyil ni kusadil kwetu yany yiney kukez kutulamin chisu chivud cha kusal mudimu.​—⁠1 Kor. 14:20.