Tudi ‘Antu Amekeshinau Mud Yom ya Kusengan Nich’!
1 Mupostol Paul wafunda anch: “Mulong twikadin kal antu amekeshinau mudi yom ya kusengan nich ku mangand, ni kudi angel ni kudi antu.” (1Kor. 4:9, NW) Ov chinech chirumburikin chom ik, ni mutapu ik chitutadina nlel mu mudimu wetu?
2 Kud mwin Korint, mazu ‘amekeshinau mudi yom ya kusengan nich’ mading ni kumuvurish masengan ma in Rom, madingau ni kutek antu afishinau nich kurutu kwa tunan twa antu kurutu kwa kuyijip nich chisum. Chawiy chimwing, in kukumangan avud—antu ni angel—adinga ni kutal mar mamanau In Kristu a mu mivu chitot ya kusambish mulong wa kulet kwau uman piur pa Want. (Heb. 10:32, 33) Kudandamen kwau kujijaman kwikala ni usu padi antu avud in kutal, mud kamu mutapu udia kujijaman kwetu pa chirung cha katat. Ov kud anany tudia mud yom ya kusengan nich?
3 Ku Mangand ni Kud Antu: Chisu chimwing yisaj ya kupanin jinsangu yikat kupalangesh jinsangu piur pa mijikit ya antu a Yehova. Ap anch tujingunin nich kujikitish jinsangu jiwamp jengamidina pa yom ya kashinsh ni yakad kasolikany piur pa mudimu wetu, tuchingejin kand jinsangu jiyimp jikupalangeshau kud akankuny netu chisu ni chisu. Chikalap nchik mwamu, tufanyidin kudandamen kwimekesh mud atushalapol a Nzamb ‘ku jinsangu jiwamp ni ku jinsangu jiyimp.’ (2 Kor. 6:4, 8) Kud in kushinshikin akweta michim yiwamp chikat kumekan patok anch tudi in kwilej akin a Yesu Kristu.
4 Kud Angel: Yitang ya muspiritu ni yawiy yikat kututal. Djabul ni ayilembil end akat kutal—pakwez nich ‘ujim ukash,’ akat kusot kwimik ‘mudimu wa kupan uman piur pa Yesu.’ (Kuj. 12:9, 12, 17) Aruu atentamina a Nzamb akat kutalang ni kusangar chisu chikatay kukarumuk mwin yitil kudiokal ku yitil yend. (Luka 15:10) Kwijik anch angel amening mudimu wetu mud mudimu umwing wa kusal swa, mudimu umwing wa ukwash usadilau pa divu nlel kufanyidin kamu kutukasikesh!— Kuj. 14:6, 7.
5 Piusankena rupompat ap kutong anch mudimu wey usongishinap mabuj, vurik anch udi ushinshikidinau nakash mu mangand. Kujijaman kwey kushinshamena kumekeshin yivud. Chawiy lel, ‘kurish kwey kuwamp kwa ritiy’ kukez kukutwishish ‘kutambul mwom wa chikupu.’—1 Tim. 6:12.