Ov Urund wa Ukristu Ukwet Usey Ik?
1 “Muntu kadiap ditung” (kwikil muntu ukutwisha kwishakamin amwinend wakad antu akwau). Mazu minam ma mwin kufund wa mu mivu chitot ya 17 mamekeshin kwau yilondina Baibel piur pa kuswir kwa kusambish kwa muntu—urund. (Jinsw. 18:1) Urund wetu wa Ukristu uwanyishin nswir jinej. Ov mwi njil ik yikweta ukwash?
2 Mu Mudimu: Ukwash umwing wa kusambish udi mutapu ukatau kutukasikesh akadivar netu ni kutukwash mu mudimu wetu wa kuyilej antu awonsu. Yesu wayituma in kwilej end “aad aad” chakwel kulejan. (Marko 6:7; Luka 10:1) Kulondwish nich chilikej chinech, pitusadidila pamwing ni antu akwau mu mudimu wa chingand, tukat kumanang uyakin wa Mulej 4:9, 10. Pitusadidila pamwing mudimu wetu, ritiy, kuziyil, ni rukat ra ambay netu yitubachikin nich kukankaman ni kuchirish kand mushiku wetu.
3 Mulong wa Ukwash Wetu Ayinetu: Akadivar netu ni awiy adi kand musul wa dikasikesh ni chiyul chakwel kurish nich yipwichik ni kujijaman ku yoziu. Urund wetu wa Ukristu ukutwish kupwitin manangu metu ku mifund yitadina milong yitukweta. Akutwish pamwing ap kulembil mulong wetwetu, mud kamu mutapu tukata kusal mulong wa awiy. (2 Kor. 1:11) Chakin kamu chilikej chau chiwamp chikutubachik ku midimu yiwamp ni kutukasikesh.
4 Ku Yikumangan: Tukat kutambulang chiyukish cha urund wa Ukristu chisu tukata kukumangan pakad kujing ku yikumangan ya chikumangen. (Heb. 10:24, 25) Program wizwil too nich mafundish ma muspiritu, ni kwikalaku kwetu ku yikumangan kukat kutushejish piswimp nau ambay netu in ritiy. Yikumangan yiney yikat kutwinkish chisu cha kuyitesh akadivar ni anambaz etu kurumburil ritiy rau, chikalap ku chimet ap pakach pa in kukumangan. (Rom 1:12) Urund wetu ukat kukasikan nakash chisu tukata kuyendil kurutu ni kupwa kwa yikumangan. Yisu mud yiney yikat kutwinkish mitapu ya kushimunin piur pa milong yikasikeshina ya ritiy retu ayinetu. Untu wetu ukat kukwachik mwi njil yimwing ya ukwash pitukata kwikat urund nau antu amukatina Yehova, Dizu diend, mudimu wend, ni antwend.—Filp. 2:1, 2.
5 Tuswiridin nakash urund wetu wa Ukristu. Pakad awiy, kwendil mwi njil yikash yiyila ku mwom kukutwish kwikal kwa mar nakash. Pakwez, nich rukat rau ni kukasikesh kwau, tukutwish kudandamen kamu kuya ku mangand masu matentamina ma Yehova.—Mat. 7:14.