Program wa Dijuku—Yikumangan ya Chikumangen
1 Anch udi nvaj mwin Kristu, usotil aney akudila mu kumukat ni kumusadil Yehova ni, nsudiel, kutambul mwom wa chikupu mwi ngand yisu yakanay Nzamb. Mutapu ik ukutwisha kuyikwash awiy chakwel kutek difukwil dia Yehova pa ndond ya kusambish mu mwom wau? Mutapu wa kusambish udi kusutil ku chilikej chey. (Jinsw. 20:7) Mu kuvurikang chilikej cha makwend Kaman, nambaz umwing walonda anch: “Kwadingap kwidjidjek ap pakemp win kamu twadinga ni kuyang ku chikumangan.” Chinech chashala rawonsu mu manangu mend.
2 Ov dijuku diey diovil kurumburik kwa rutong ra yikumangan ya chikumangen? Malejan tutambwiling ku yikumangan yiney matukasikeshin kudandamen kusal rusot ra Nzamb, ni urund tukata kusanger nau akadivar netu udi musul wa dikasikesh upandakena usey. (Is. 54:13; Rom 1:11, 12) Pakwez, rutong ra kusambish ra yikumangan mud yiney ridi mulong wa kumushiman Yehova “mu kukumangan.” (Kus. 26:12) Yikumangan ya Ukristu yitwinkishin mitapu ya kumekesh rukat retu mulong wa Yehova ni kumwifukwil ndiy.
3 “Babalany”: Kusangar mulong wa rutong ritumbila ra yikumangan yetu kukutubachik kulond anch “babalany” chakwel kangal twakudish pakemp-pakemp chaku cha kuburenang yikumangan mulong wa kukimb yom ya usey ukemp nakash. (Ef. 5:15, 16; Heb. 10:24, 25) Chisu usadila program wa dijuku diey, ukutwish kusambish nich kutek mu program yisu mulong wa yikumangan ya chikumangen. Kupwa babal chakwel kangal kulikin mijikit yikwau yez yishatina yikumangan pansh. Shinshik anch kuya ku yikumangan chidi chom cha usey mulong wa dijuku diey.
4 Ov tudiap akasikeshinau chisu tutangina jinsangu ja akadivar netu awinina yikangesh chakwel kuya ku yikumangan, ku yikumangan ya munyimuku, ya pakampwil ni ya distrik? Ap anch mikadil yey yikutwish kwikal yikash, akwen ni yawiy arishin nich yikokujol yawiy yimwing. Satan ukat kuchisal chikala chikasikena nakash kud antu a Nzamb kumwifukwil Yehova. Ap mwamu, ijik anch aney akuman chakin kamu usu wakinakin wa dijuku wa kuya ni kukumangan ku yikumangan ya chikumangen. Chakin, mu kusal mwamu, ukutwish kuyinkish awiy chipan cha muspiritu chakad kez kavuramen.