Atulam in Kututakel—Antakel’a Dilejan dia Buku dia Chikumangen
1 Chidi chiyukish chijim mud ik kud mukurump ap nkwash’a midimu awanyishinau kusadil mud ntakel’a Dilejan dia Buku dia Chikumangen. Ntakel ukwet chisend chimwing chijim nakash mu kulam nswir ja muspiritu ja antu adia mu chirund chitakedilay. Midimu yend ayangen mu yikunku yisatu.
2 Mafundish Mafanyidina: Chakwel kufundish mutapu uwamp chirund rubing ni rubing, ntakel’a dilejan dia buku ufanyidin kwirijek nawamp nakash. Ukimbining kutukwash kuman usey wa yom yitwilejina. Pa ndond ya kulond nakash pa chisu cha dilejan, pichiswiridikina ukwipul yipul yikwau yifanyidina mulong wa kubudish yitongijok yijim. Mudimu wend udi wa kusal anch dilejan dikala disangarishina, difundishina ni kutal anch muntu ni muntu inungina ku misamb; chinech chiswapelap. Rutong rend ridi ra kututung muspiritu, kukasikeshin usey wa kusadil dilejan, ni kwasil manangu metu ni muchim wetu.—1 Tes. 2:13.
3 Mudimu wa Ukafung wa Ukwash: Ntakel’a dilejan dia buku uding “mud ndond ya kwikangin ku rinkind ni ndond ya kuchinin ruval wa mayal.” (Isa. 32:2, NW) Ukat kutal chakin awonsu adia mu chirund chend ni kuman anch apana ukwash wa muspiritu anch umwing wachirikin kwinyim.—Ezek. 34:15, 16, NW; 1 Tes. 2:7, 8.
4 Kulejan Nich Mushiku: Ntakel’a dilejan dia buku ukat kusalang yitenchik ya kusadil chakwel awonsu mu chirund chend inungina sens mu mudimu wa kulejan. Utakediling mujikit winou, chijay anch kuburen kujing kwend, mushiku wend, ni kujijaman kwend, yikwikal ni usu padi yidi yikwau ya chirund chawonsu. (Kol. 4:17; 2 Tes. 3:9) Usadiling usu wa kubudikin mu chingand ni umwing ni umwing wa chirund chend. Anch tusotin kurijek ukaliweny wetu wa kulejan ni kufundish mu chingand, ntakel’a dilejan dia buku ukutwish kutukwash kushiken rutong retu.—1 Tim. 4:16; 2 Tim. 4:5.
5 Tudi ayukishinau chakin nich yipan yiney mu amakundj itenchikidina kutukwash ni kutukwatikesh muspiritu. (1 Tes. 5:14) Tumekeshany kujikitish kwetu mulong wa ditenchik dined dia Yehova kusutin kwinungin kwetu wakad kujing ku dilejan dia buku ni kukwatikesh mu kushishaman mudimu wa kulejan.—Heb. 10:25.