Ov, Anany Asadina Rusot ra Yehova Nlel Unou?
1. Ov, chisu ik tukeza kusambish kushinshikin broshir Ov, Anany Asadina Rusot ra Yehova Nlel Unou? ni mutapu ik tukeza kutaninamu?
1 Kusambishin pa rubing ra Mwinkind 28, broshir ukweta mutu wa mulong ulondina anch: Ov, Anany Asadina Rusot ra Yehova Nlel Unou? akez kumushinshikin pa chisu cha Dilejan dia Bibil dia Chikumangen. Broshir musu winou, wabudika ku Chitentam cha Distrikt chadinga nich mutu wa mulong ulondina anch: “Kasikeshany Michim Yen!,” amufunda mulong wa kuyitakel kapamp kamwing in kwilej Bibil ku dirijek. Broshir winou tukushinshikina kakezap ching kusu kukudish musangar wetu piur pa kwikal ku mutambu wa dirijek dia Yehova pakwez ukez kutukwash kand kwijik nawamp usey wend mu mudimu wa kulejan.—Kus. 48:13.
2. Ov, mutapu ik ukezau kwilej broshir winou mu chikumangen?
2 Mutapu wa Kwilej Broshir Winou: Ntakel ukez kuswiridin kwangan chisu chend chakwel dilejan ni dilejan disadika mu mutapu wisikena. Ndiy ukez kusambish dilejan din diawonsu dia ku malejan 28 kusutil ku kutang chipul chidia mutu wa mulong wa dilejan. Kupwa, ndiy ukez kumwit mwin kutang chakwel atanga paragraf wa nsambishil. Chikwau kand, ntakel ukez kuyipul in kutesh chipul charijekay mulong wa mazu ma nsambishil. Kupwa, chikunku ni chikunku chisambishina nich mazu mafundinau mu ulomb ujal afanyidin kuchitang ni kuchisambin panrach. Kupwa kwa kutang chikunku, ntakel ukez kuyit in kutesh chakwel arumburila mutapu chikunku chinech chakwila ku chipul cha mutu wa mulong wa dilejan. Broshir ukwet kand yipich yivud yikutwishau kwisambin. Mifund yijim afanyidin kuyitang pa chisu chiwanyidina. Kurutu kwa kuya pa dilejan dikwau, ntakel ukez kuchirikin yipul ya dichirikin yidia kwishin kwa paj. Anch kudi paj ukweta mushet pafundinau anch “Chakwel Wijika Jinsangu Jivud,” ntakel ukez kuutang ni kupwa kand ukez kuyit in kutesh chakwel arumburila mutapu mwin kwilej Bibil ukezay kutaninamu kusutil ku kulondul chiyul cha kusadil. Anch kudi chisu chiwanyidina cha kupwish mazu ma nsudiel, ntakel ukutwish kusadil mitu ya milong ya dilejan mudi yipul ya dichirikin. Lamany mu manangu anch winou kiudiap kwau ching kusu mutapu wa kusadil mulong wa kutakel nich dilejan dia Bibil ku chikumbu.
3. Ov, mutapu ik tukutwisha kutaninamu nakash mu dilejan dia broshir winou?
3 Chakwel tutaninamu nakash, tufanyidin kwirijek nawamp kurutu kwa kuya kukumangan. Salany usu chakwel wakulany. Chisu cha minsamb, tongany bil mulong wak yom yidiamu yikutwish kwikal ya ukwash kudi in kwilej a Bibil. El kushinshikin kwetu kwa broshir musu winou kutukwasha chakwel tuyikwasha antu akwau inunga netu mu kusal rusot ra Nzamb chakwel niyawiy atwisha kwikal nich ruchingej ra kutambul mwom wa chikupu.—1 Yoh. 2:17.