Mutapu wa Kusadil Broshir Ov, Anany Asadina Rusot ra Yehova Nlel Unou?
Broshir Musu Udiaku Mulong wa Kuyitakel Kapamp Kamwing in Kwilej Bibil ku Dirijek
1. Ov, yisu mitapu yisatu ya rutong ra broshir Ov, Anany Asadina Rusot ra Yehova Nlel Unou?
1 Ov, Wasambishin kal kusadil broshir musu Ov, Anany Asadina Rusot ra Yehova Nlel Unou? Rutong rend ridi ra (1) kuyikwash in kwilej Bibil kwijik anch etu tudi mudi antu awonsu, (2) kuyikwash chakwel ileja piur pa midimu yetu ni (3) kuyilej chakwel ijika mutapu dirijek dietu dikata kusal. Broshir Ov, Anany Asadina Rusot ra Yehova Nlel Unou? ukweta dilejan dimwing pa paj ni paj dikutwishau kwilej mu mutapu uswapela kusu mu minit yitan djat ni mu minit dikum pa dilejan ni dilejan.
2. Rumburil mutapu ufundinau broshir winou ni yom yidiamu.
2 Mutapu Wamufundau: Broshir winou ukwet yikunku yisatu, chikunku ni chikunku chisambidina mu mutapu kushalijan wa dirijek dia Yehova mudi muchisambidinau kwiur oku. Mutu wa mulong wa dilejan ni dilejan dia ku malejan 28 aufundin mudi chipul, ni tumitu twa milong tufundinau nich ulombu ujal tulondwilaku twakwil ku chipul chinech. Yipich yidiokila mu jingand 50 ni kusut, ayilejen mulong wa kumekesh mutapu usadikina mudimu wetu mu mangand mawonsu. Malejan mavud makwet mishet yikwet mitu ya milong yilondina anch “Chakwel Wijika Jinsangu Jivud,” mudia yitongijok yiukutwisha kusadin chakwel uyikwasha in kwilej ey aya kurutu.
3. Ov, mutapu ik tukutwisha kusadil broshir Ov, Anany Asadina Rusot ra Yehova Nlel Unou?
3 Mutapu Ukutwisha Kumusadil: Sambish kupwitin manangu ma mwin kwilej pa chipul chidia mutu wa mulong wa dilejan. Chikwau kand, piutangina pamwing nend, kasikesh pa tumitu twa milong tufundinau nich ulombu ujal. Kupwa, shinshikin yipul ya dichirikin yidia kwishin kwa paj. Ukutwish kutang dilejan diawonsu ap kutang chikunku ni chikunku ni kudisambin. Sadin manangu mey piukwatina mupak wa kutond maverse ma kutang. Kangal wavuramen kushinshikin pa yipich ni pa mishet yikweta mitu ya milong yilondina anch “Chakwel Wijika Jinsangu Jivud.” Yisu yivud, malejan mafanyidina kumisambinam mu mutapu ulondulijadina nawamp. Pakwez, ikal ni want ipau wa kutond kurutu dilejan disambidina chom kanang chambatena nich maswir ma muntu. Chilakej, anch chitentam cha pakampwil, cha munyingumuku ap cha distrikt chashik kal piswimp, ukutwish kurijek dilejan dia 11.
4. Ov, mulong wak usangaredina kwikal nich broshir winou musu?
4 Chisu twilejena Bibil ni muntu kanang, tumukwashin chakwel ijikijana ni Tatukwetu wa mwiur. Pakwez, tuswiridin kand kumufundish piur pa dirijek dia Yehova. (Jinsw. 6:20) Tukwet musangar mud ik wa kwikal nich broshir musu winou utukwashina kusal mwamu mu mutapu uswapela!