Yakany!
1. Ov, dichuku ik ditwikinshininga chisu chiwamp nakash chakwel tupana uman ni mulong wak?
1 Kwikil dichuku ap dimwing ditwinkishining chisu chiwamp cha kupan uman kupandakanamu kukumangan ku Chivurikish cha pa muvu. Shinshikinany anch: Muvu winou angendj mamiliyon dikum ni kusut achingejin kukumangan ku Chivurikish ni kutesh piur pa yisal yijim yaad ya rukat yamekeshau kusutil ku chakupesh. (Yoh. 3:16; 15:13) Akez kwilej piur pa yiyukish yikwetau mulong wa chipan cha Yehova. (Isay 65:21-23) Pakwez, mwin kulond kadiap umwing kusu ukeza kupan uman pa chisu chinicha bwat. In kukumangan awonsu akez kutan musangar ujim wa kupan uman kusutil ku kuyak angendj nich chirungil.—Rom 15:7.
2. Ov, mutapu ik tukutwisha kuyak angendj nich chirungil?
2 Pa ndond pa kutan kusu ndond yey ya kushakam ni kuchingel chakwel program asambisha, ov, mulong wak ukutwishap kukwat mupak wa kuyilangwish ni kwiyijikish amwiney kudi antu adia piswimp ney? Angendj akutwish kwov ujim ni kakutwishap kwikal ni ukashinsh wa yom yichingejinau. Mutapu wetu uwamp wa kumwemwet masip ni kulangwish kwa urund kukez kuyovish nawamp machuku mavud. Chakwel ujingunina anch muntu kanang udiaku mulong watambula diladikij, ukutwish kumwipul anch kawiy kapamp kend ka kusambish ka kukumangan ku chimwing cha chikumangan chetu ap anch wij muntu kanang mu chikumangen. Pamwing ap ukutwish kumwit chakwel ushakama nend pamwing ni kumulej mu Bibil wey ni mu buku wa muminy. Anch Chot cha Want kachisadidinap, chitwishikin kunyingumukaku nend. Kupwa kwa diskur, itekina chisu cha kwakul ku yipul yend. Anch chikumangen chen chikutwish kuya swa chakwel chikumangen chikwau chisadil ndond yiney, ukutwish kulond anch: “Nisotin kutesh chiutongina piur pa program winou. Ov, kudiaku mutapu umwing nikutwisha kukutan?” Kupwa sal yitenchik chakwel umuchirikina kand dichuku dikwau. Pakampwil amakurump akez kusot kwikal tayad chakwel ayikasikesha in kulejan akad kusalang kand mudimu akez kwikalaku.
3. Ov, mulong wak chidia cha usey kudi etu kukwat mupak wa kuyak angendj pa chisu cha Chivurikish?
3 Kudi angendj avud, chinech chikez kwikal chisu chau cha kusambish cha kuman musangar, chisambu ni uumwing wa paradis wa muspiritu tusangaredina mudi antu a Yehova. (Kus. 29:11; Isay 11:6-9; 65:13, 14) Ov, chitongijok ik cha musangar chikezau angendj kuvurik kupwa kwa kukumangan? Tukez kwimedin nakash pa kukwat mupak wa kuyak angendj etu.