Uman Ukash Ukezau Kupan
1. Kudioshaku diskur, ov, chom ik kand chikwau chayikashimwisha antu watazukanya ku Chivurikish? Rumburil.
1 Ov, chisu ik? Urel wa Chivurikish. Chawiy lel, twasadin usu nakash wa kuyitazuk antu chakwel eza akumangan netu. Chom chiteshiningau kudi antu ezininga kukumangan chidiap chimwing kusu chikutwisha kuyikashimwish. Kupwa kwa kwikalaku ku Chivurikish, mband umwing wisambina pakampwil pa yom yamanay—urund uwamp pakach pa muntu ni muntu, kwinang kuwamp, ni kukomb chikumbu chatungau chilaminau kudi akadivar in kwipan. Pakwez, etu awonsu, kudiosh mwin kulond, twovijanany mutapu wa kupan uman pa chisu chinech chipandakena usey cha pa muvu.—Efes 4:16.
2. Ov, mutapu ik muntu ni muntu wa mukach mwetu ukutwishay kupan uman kudi angendj?
2 Tuyakany Nawamp Angendj: Mutapu wetu uwamp wa kumwemwet masip ni kulangwish kwetu kwa rukat kukez kulejan uman kudi angendj. (Yoh. 13:35) Ap anch ukutwishap kulond ni muntu mwawonsu, ukutwish kamu kuyilangwish ni kwiyijikish amwiney kudi antu adia piswimp ney. (Heb. 13:1, 2) Yimbanginany nawamp angendj amekena mudi kijap muntu ap umwing. Mudi ay atambula diladikij pa chisu cha kampany wa kupan diladikij. Ukutwish wipul anch: “Ov, chidi chisu chey cha kusambish kwez panap?” Yitazuka chakwel ashakam ney pamwing, ni akul ku chipul chawonsu chikutwishau kukwipul. Anch chikumangen chen chikutwish kuya swa chakwel chikumangen chikwau chisadila ndond, ukutwish kulond anch: “Nisotin kwijik chiutongina piur pa program. Mulong udi mutapu umwing nikutwisha kwambamb ney?”
3. Ov, mutapu ik tukutwish kuyak antu akad kusalang kand mudimu?
3 Tuyakany Alikinakal Kusal Mudimu: Pakad kwidjidjek, in kulejan akad kusalang kand mudimu akez kwikalaku, pamwing ni antu amwing alika kal kukumangan ni chikumangen chakwel eza ku chikumangan cha muvu chisu cha Chivurikish. Yakany, ni el amboku ijik anch udiany chakin kamu ni musangar wa kuyiman. (Rom 15:7) Amakurump akutwish kuya kuyital ku yikumbu yau katat chakwel ayikasikesha kudandamen urund wau ni chikumangen. Tukat kulembil antu avud twakumangana kal nau eza inunga netu chakwel tumutumbisha kamu Nzamb pakad anch chidi mulong wa yom yateshau kal pakwez kand mulong wa yom yimeningau ‘mudi midimu yetu yiwamp.’—1 Pita 2:12.