Mujikitisha Yehova Mulong wa Rukat Rend Rudimukina Rufu ra Kristu ra Kuvurik pa Rish 24
1. Mutapu ik wamekeshay Yehova rukat rudimukina kud etu?
1 Nfund-a-kuseng walonda anch: “Apana bil kujikitish kwau kudi [Yehova, NW] mulong wa rukat rend rudimukina ni mulong wa midimu yend yijim kudiau an a antu.” (Kus. 107:8) Rukat rudimukina ra Nzamb ridiap kwau kusu riy ni ranaken rikwetay mulong wa antu. Chinech chimeken kamu patok mu mazu ma kushiman madiokila ku spiritu: “Rukat rey rudimukina, A Yehova, radandamena kwinkwash.” (Kus. 94:18 NW) Ridi rukat rudimukina kupandikan mud ik ramekeshay Yehova pa kumupan Mwanend kapokal mulong wetwetu!—1 Yohan 4:9, 10.
2. Mutapu ik tukutwisha kumekesh kujikitish kwetu kud Yehova?
2 Pashejina Chivurikish cha rufu ra Kristu piswimp, mutapu ik tukutwisha kujikitish mulong wa “rukat rudimukina ra Nzamb”? (Kus. 59:17, NW) Umwing ni umwing wetu uwapidil kwitekin chisu cha kutongijokin pa machuku ma nsudiel ma Yesu pa divu. (Kus. 143:5) Chikwikal kand cha ukwash kulondul program wa pakampwil wa kutang kwa Bibil wa Chivurikish mud mumutenchikinau mu Examinons les Écritures chaque jour—2005 ni, anch chitwishikin, kutang kukwau ni kukimbijol mu mashapitre wa 112-116 ma buku Le plus grand homme pamwing nich mikand ya pa dishin dia Bibil. Tongijokin pa mikand utangina, ni ikal wipaninamu. (1 Tim. 4:15) Kutongijokin mu malembil nakash pa Dizu dia Nzamb kukatap kusu kukasikesh muchim wetu pakwez kumekeshin kand rukat retu mulong wa Yehova.—Mat. 22:37.
3, 4. (a) Mutapu ik tukutwisha kuyimburij akadivar netu a mu Liberia? (b) Ov nany utongina kutazuk kwez ku Chivurikish?
3 Yikasikesha Antu Akwau Kumujikitish Nzamb: Muvu wadiap ou, antu 16 760 607 akumangen ku Chivurikish mu mangand mawonsu. Mu ul umwing mu Liberia, akadivar afunda mukand kud mwant wa ul, ni kumwijikish rutong rau ra kusal chivurikish cha Yakudia ya Urel ya Mwant mu ul wend. Mwant wayinkisha akadivar mbil ya kusadil chiwandj cha ndundu mulong wa chinship chinech ni wijikisha ndond yawonsu, ni kuyitazuk antu kwez mulong wa kukumangan. Ap anch kwadinga kwau in kulejan atan kusu mu ul winiwa, akumangana ku Chivurikish adinga antu 636!
4 Chawiy chimwing, tusotil kuyikwash antu avud mud chitwishikina kwibomb netu mulong wa kukumangan ku Chivurikish. Ov ukutwishap kusal dipang dia antu usotila kutazuk? Yilikej yidia panyim pa yibur ya Réveillez-vous ! wa Rish 8 ni La Tour de Garde wa Rish 15 yipanin diladikij dia Chivurikish. Ukutwish kusadil kand mapaper machapinau ma diladikij dia Chivurikish. Fund ku mashiny ap ku makas chisu ni ndond ya Chivurikish pa dipaper, ni mushila muntu ni muntu ukutazuka. Ngond wa Rish 24 pashejinay piswimp, yang kand ukamuvurisha muntu ni muntu ni kuwanyish yitenchik yawonsu.
5. Mutapu ik tukutwisha kuyikasikesh in kwilej a Bibil kwez ni kukumangan?
5 Mutapu ik tukutwisha kuyikwash in kwilej a Bibil akad kal kwezangap ku yikumangan chakwel akumangan ni kwisakin sens chinship chinech? Itekinaku aminit akemp mu chisu cha dilejan ni dilejan mulong wa kuyikwash kwov usey wa musambu winou. Ukutwish kutan malejan mawamp nakash mu La Tour de Garde wa Rish 15, 2004, paj wa 3-7, ni buku Comment raisonner, paj wa 241-245.
6. Ov Mulong wak chidi cha usey kuyak angendj nawamp ku Chivurikish?
6 Tuyakany Angendj Nawamp: Ku Chivurikish, isamba nau angendj ni kuyak nawamp. (Rom 12:13) Irijeka mulong wa kushakam nau antu watazukang, ni tal nawamp anch akwet Bibil ni buku wa miminy. Tusotil kwitenchik kamu nawamp nakash mulong wa kuyak nawamp akadivar ni anambaz awonsu akad kusalang kand mudimu asalang usu wa kukumangan. Kusanger kwetu kwa rukat kukutwish kuyikwash kuchirikin urund udandamedina ni chikumangen. (Luka 15:3-7) Pa chisu chinech chipandikena kutumb, tusalany amboku yawonsu tukutwisha chakwel kuyikasikesh antu akwau kwibomb netu mu kumujikitish Yehova mulong wa ‘rukat rend rudimukina ni rukwamushena.’—Kus. 31:21.